Connect with us
48 birthday
top banner (1)

Featured

സ്വതന്ത്ര പലസ്തീൻ വിഷയത്തിൽ
സിപിഎമ്മിന് എന്തു കാര്യം?

Avatar

Published

on

  • പിൻപോയിന്റ്
    ഡോ. ശൂരനാട് രാജശേഖരൻ

“പലസ്തീൻ വിഷയത്തിൽ കോൺ​ഗ്രസിന് നിലപാടില്ല.”
മുഖ്യമന്ത്രി പിണറായി വിജയനും സിപിഎം സംസ്ഥാന സെക്രട്ടറി എം.വി. ​ഗോവിന്ദനും പല തവണയായി ആവർത്തിക്കുന്ന തികഞ്ഞ ഈ അജ്ഞതയെ അർഹിക്കുന്ന അവജ്ഞയോടെ തള്ളിക്കളയുന്ന ജല്പനങ്ങളായി മാത്രമേ ചരിത്രം അറിയാവുന്നവർക്കു കാണാൻ കഴിയൂ. രാഷ്‌ട്രപിതാവ് മഹാത്മാ ​ഗാന്ധിയും പ്രഥമ പ്രധാനമന്ത്രി പണ്ഡിറ്റ് ജവഹർലാൽ നെഹ്റുവും മുതലിങ്ങോട്ട് കോൺ​ഗ്രസ് നേതാക്കളെല്ലാം സ്വതന്ത്ര പലസ്തീനെ അനുകൂലിച്ചവരാണ്. ഇന്ത്യൻ നാഷണൽ കോൺ​ഗ്രസ് ഇന്ത്യാ മഹാരാജ്യം ഭരിച്ച 60 വർഷത്തിലധികം കാലം സ്വീകരിച്ച നിലപാട് അജ്ഞത കൊണ്ടു മൂടി വയ്ക്കാമെന്ന് കേരളത്തിലെ സഖാക്കന്മാർ കരുതുന്നത് മഹാമൗഢ്യമാണ്.


പലസ്തീൻ വിഷയത്തിൽ സിപിഎമ്മിന്റെ നിലപാട് എന്തു തന്നെയായാലും ആരു ശ്രദ്ധിക്കാൻ? ഇന്ത്യൻ പാർലമെന്റിലേക്കു ജനങ്ങൾ തെരഞ്ഞെടുത്തുവിട്ട മൂന്ന് അം​ഗങ്ങൾ മാത്രമുള്ള കേവലമൊരു പ്രാദേശിക പാർട്ടിയായ സിപിഎമ്മിന്റെ ശബ്ദം കേരളത്തിന്റെ നാലതിർത്തികൾക്കപ്പുറം എവിടെ എത്താൻ? അതിനപ്പുറം എന്തു ചലനമാണ് അവർക്കുണ്ടാക്കാൻ കഴിയുന്നത്? പലസ്തീൻ വിഷയത്തിൽ ബിജെപിയുടെ നിലപാടിനെ ഇതുവരെ സിപിഎം തള്ളിപ്പറഞ്ഞിട്ടില്ല. അതുകൊണ്ടു തന്നെ ബിജെപിയെ പിന്തുണയ്ക്കുന്ന നിലപാടാണോ പാർട്ടിക്കുള്ളതെന്നു പിണറായിയും ​ഗോവിന്ദനും ആദ്യം വെളിപ്പെടുത്തട്ടെ.
പൊന്നുരുക്കുന്നിടത്തു പൂച്ചയ്ക്കെന്തു കാര്യം എന്നു ചോദിക്കുന്നില്ല. ​സ്വതന്ത്ര പലസ്തീനു വേണ്ടി മുക്കാൽ നൂറ്റാണ്ടായി വാദിക്കുകയും പോരാടുകയും ലോകത്താദ്യമായി പലസ്തീൻ എന്ന രാജ്യത്തിനു വേണ്ടി നയതന്ത്ര ഓഫീസ് തുറന്നു കൊടുക്കുകയും ചെയ്ത രാഷ്ട്രീയ പാർട്ടിയാണ് ഇന്ത്യൻ നാഷണൽ കോൺ​ഗ്രസ്. അങ്ങനെയൊരു പാർട്ടിക്ക് ഇക്കാര്യത്തിൽ നിലപാടും നയവുമില്ലെന്ന ആവർത്തിച്ചുള്ള ആക്ഷേപം കുരുടൻ ആനയെ കാണുന്നതിനു സമമാണെന്നു പറയാതെ വയ്യ.


നമ്മുടെ രാഷ്ട്രപിതാവ് മഹാത്മാ ഗാന്ധി മുതലിങ്ങോട്ടുള്ള കോൺ​ഗ്രസ് നേതാക്കളെല്ലാം പലസ്തീൻ വിഷയത്തിൽ വളരെ വ്യക്തമായ നിലപാടുള്ളവരായിരുന്നു. ഇംഗ്ലണ്ട് ഇംഗ്ലീഷുകാർക്കും ഫ്രാൻസ് ഫ്രഞ്ചുകാർക്കും അവകാശപ്പെട്ടതു പോലെ പലസ്തീൻ അവിടത്തുകാരായ അറബ് ജനതയ്ക്ക് അവകാശപ്പെട്ടതാണെന്നായിരുന്നു ഗാന്ധിജി സ്വീകരിച്ച നിലപാട്. ഇസ്രയേലിനെ ഒരു രാജ്യമായി അംഗീകരിച്ചു കൊണ്ടു തന്നെ പലസ്തീൻ ജനതയ്ക്ക് സ്വതന്ത്രമായ പരമാധികാര രാജ്യം വേണമെന്ന പലസ്തീൻ ആവശ്യത്തെയും ഇന്ത്യ പിന്തുണച്ചു പോന്നു. ​ഗാസ, വെസ്റ്റ്ലാൻഡ്, കിഴക്കൻ ജെറൂസലേം തുടങ്ങിയ മേഖലകൾ ഉൾപ്പെടുന്ന പലസ്തീൻ രാജ്യം അവിടെയുള്ള ഇസ്ലാമിക ജനതയുടെ ആവശ്യമാണ്; അവരുടെ അവകാശവുമാണ്. ഇന്ദിരാ ​ഗാന്ധി, രാജീവ് ​ഗാന്ധി, പി.വി. നരസിംഹറാവു, ഡോ, മൻമോഹൻ സിം​ഗ് തുടങ്ങി എല്ലാ കോൺ​ഗ്രസ് പ്രധാനമന്ത്രിമാരും ഇതേ നിലപാടിലാണ് ഉറച്ചു നിന്നത്. രാജീവിന്റെ കാലത്ത് പലസ്തീൻ നേതാവ് യാസർ അറാഫത്തുമായി ഇന്ത്യ പങ്കുവച്ച സൗഹൃദം മാതൃകാപരമായിരുന്നു.


സ്വതന്ത്ര പാലസ്തീൻ രാഷ്ട്രം രൂപീകരിക്കുക എന്നതാണ് പ്രശ്ന പരിഹാരത്തിനുള്ള ഏക മാർഗ്ഗമെന്നു യുപിഎ അധ്യക്ഷ സോണിയ ഗാന്ധി അടക്കമുള്ള മുതിർന്ന കോൺഗ്രസ് നേതാക്കൾ ഇപ്പോഴും അടിവരയിട്ടു പറയുന്നു. കഴിഞ്ഞ പ്രവർത്തക സമിതി യോ​ഗത്തിൽ കോൺ​ഗ്രസ് ഇതു സംബന്ധിച്ച പ്രമേയവും പാസാക്കി. ഇതൊന്നും കാണാതെയും അറിയാതെയുമാണ് സിപിഎം കോൺ​ഗ്രസിനെ പഴിക്കുന്നത്. അവരുടെ പ്രശ്നം പലസ്തീനല്ല. അതിന്റെ പേരിൽ കേരളത്തിലെ വോട്ട് ബാങ്ക് പ്രീണനമാണ്. അതു കോൺ​ഗ്രസിന്റെ ചെലവിലാകരുതെന്നു മാത്രം. കോൺഗ്രസ് എന്നും സമാധാനത്തിന്റെ പക്ഷത്താണ്. ഈ വിഷയത്തിൽ കോൺ​ഗ്രസിന് ഒരു നിലപാട് മാത്രമേയുള്ളൂ, പശ്ചിമേഷ്യൻ മേഖലയിൽ ഇസ്രയേലിനു പുറത്ത് സ്വതന്ത്ര പരമാധികാരമുള്ള പലസ്തീൻ രാജ്യം. അതു നേടിയെടുക്കുന്നതു വരെ കോൺ​ഗ്രസ് പലസ്തീൻ ജനതയ്ക്കൊപ്പം നിൽക്കും.
പലസ്തീൻ വിഷയത്തിൽ കോൺ​ഗ്രസിനു നയമില്ലെന്നു സിപിഎം പറയുന്നതിനു പിന്നിൽ ഒരു ലക്ഷ്യമുണ്ട്. മുസ്ലിം സമുദായങ്ങൾക്കിടയിൽ ആശയക്കുഴപ്പം സൃഷ്ടിച്ച് വെള്ളം കലക്കി മീൻ പിടിക്കുക എന്ന ​ഗൂഢ ലക്ഷ്യം. കഴിഞ്ഞ കുറേ ദിവസങ്ങളായി സിപിഎം പുറത്തെടുക്കുന്ന അടവ് നയമാണ് മുസ്ലിം ലീ​ഗിനെ പ്രലോഭിപ്പിക്കുക എന്നത്. കേരള ബാങ്ക് ഡയറക്റ്റർ ബോർഡിലേക്ക് ലീ​ഗ് എംഎഎൽഎ പി.അബ്ദുൾ ഹമീദിനെ നാമ നിർദേശം ചെയ്തതോടെ ലീ​ഗ് യുഡിഎഫ് വിട്ടു പോകുമെന്നാണ് സിപിഎം കരുതിയത്. അബ്ദുൾ ഹമീദ് കേരള ബാങ്ക് ഡയറക്റ്റർ ബോർഡിൽ വരുന്നത് ആദ്യമല്ല. കേരള ബാങ്ക് ആകുന്നതിനു മുൻപ് അദ്ദേഹം സംസ്ഥാന സഹകരണ ബാങ്ക് ഡയറക്റ്റർ ബോർഡിൽ ദീർഘകാലം മലപ്പുറം ജില്ലാ സഹകരണ ബാങ്കിന്റെ പ്രതിനിധിയായിരുന്നു അദ്ദേഹം.


അബ്ദുൾഹമീദിനെ ബാങ്ക് ഡയറക്റ്റർ ബോർഡിൽ ഉൾപ്പെടുത്തിയാൽ കേരളത്തിലെ മുഴുവൻ മുസ്ലീംകളുടെയും പിന്തുണ അട്ടിപ്പേറാകുമെന്നു വല്ലാതങ്ങു വിശ്വസിച്ചു പോയി, സിപിഎം. അതിനു രാഷ്‌ട്രീയ കേരളം കൊ‌ടുത്ത മറുപടിയാണ് കോഴിക്കോട്ട് കഴിഞ്ഞ ദിവസം കോൺ​ഗ്രസ് നടത്തിയ പലസ്തീൻ ഐക്യദാർഢ്യ റാലി. സമീപകാലത്ത് കോൺ​ഗ്രസ് നയിച്ച വലിയ റാലികളിലൊന്നായി അതു മാറി. അതിനു കാരണം മലബാർ മേഖലയിലെ മുസ്ലിംകൾ നൽകിയ ആവേശകരമായ പിന്തുണയാണ്.


പലസ്തീൻ വിഷയത്തിൽ കോൺ​ഗ്രസ് ആരുടെ പക്ഷത്താണെന്ന് കൃത്യമായി ബോധ്യപ്പെടുത്താൻ ഈ റാലിയിലൂടെ കോൺ​ഗ്രസിനു കഴിഞ്ഞു. സിപിഎമ്മിന്റെ കുതന്ത്രങ്ങളുടെ മുനയൊടിക്കാനും. മുസ്ലീം ലീ​ഗ് സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങൾ, ജനറൽ സെക്രട്ടറി പി.കെ. കുഞ്ഞാലിക്കുട്ടി, സമസ്ത പ്രസിഡന്റ് മുഹമ്മദ് ജിഫ്രി മുത്തുക്കോയ തങ്ങൾ, കേരള മുസ്ലിം ജമാ അത്ത് സംസ്ഥാന ജനറൽ സെക്ര‌ട്ടറി സയ്യിദ് ഇബ്രാഹിമുൽ ഖലീൽ അൽ ബുഖാരി, കെഎൻഎം നേതാവ് പി.ടി അബ്ദുല്ല കോയ മദനി, ഡോ. ഐ.പി അബ്ദുസ്സലാം (മർക്കസുദ്ദഅ്‌വ), പി.എൻ. അബ്ദുൾ ലത്തീഫ് മ​ദനി (വിസ്ഡം), ജമാ അത്തെ ഇസ്ലാമി അമീർ പി. മുജീബ് റഹമാൻ തുടങ്ങിയ നേതാക്കൾ റാലിക്കെത്തിയത് അവരെയെല്ലാം കോൺ​ഗ്രസ് പ്രീണിപ്പിച്ചതു കൊണ്ടല്ല. ഇന്ത്യയിലെ മുസ്ലുംകൾക്ക് വിശ്വസിക്കാൻ കഴിയുന്നത് ഇന്ത്യൻ നാഷണൽ കോൺ​ഗ്രസിനെ മാത്രമാണെന്ന തിരിച്ചറിവുള്ളതു കൊണ്ടാണ്. കേരള ബാങ്കിൽ ഒരു ഡയറക്റ്റർ സ്ഥാനം നൽകിയതു കൊണ്ടു സിപിഎം പക്ഷത്തേക്കു മുസ്ലിംകളും മുസ്ലിം ലീ​ഗും എടുത്തു ചാടുമെന്ന മഹാമൗഢ്യത്തിനുള്ള ചുട്ട മറുപടിയാണ് കോഴിക്കോട്ട് ബീച്ചിൽ ആർത്തിരമ്പിയ മനുഷ്യ മഹാസാ​ഗരം. അതു കാണാനുള്ള കണ്ണും തിരിച്ചറിയാനുള്ള വിവേകവും സിപിഎമ്മിനുണ്ടായാൽ ഇനിയും നാണം കെടാതിരിക്കാൻ അത്രയം നല്ലത്. വരാനിരിക്കുന്ന പാൽലമെന്റ് തെരഞ്ഞെടുപ്പിൽ പത്ത് വോട്ടു കിട്ടാനുള്ള വിഷയമായി മാത്രമേ സിപിഎമ്മിന് പലസ്തീൻ കാണാനാവൂ. കോൺ​ഗ്രസിനെ പഴിക്കുന്നതുവഴി കിട്ടിക്കൊണ്ടിരുന്ന വോട്ടു കൂടി അവർക്കു നഷ്ടമാകും.
ഇന്ത്യയിലെ കമ്യൂണിസ്റ്റ് പാർട്ടികളെല്ലാം പലസ്തീൻ വിഷയത്തിൽ നിസം​ഗരാണ്. അതിനവരെ കുറ്റപ്പെടുത്തുന്നില്ല. അതിനേ അവർക്കു കഴിയൂ. ​പലസ്തീൻ വിഷയത്തിൽ സിപിഎം ജനറൽ സെക്രട്ടറി സീതാറാം യെച്ചൂരിക്കു പോലും വ്യക്തതയില്ല. വോട്ട് ബാങ്ക് പ്രീണനത്തിന്റെ ഭാ​ഗമായി കേരളത്തിൽ ചില പ്രചാര വേലകൾ നടത്തുന്നതല്ലാതെ, പലസ്തീൻ ജനതയെ വിശ്വാസത്തിലെടുത്തു കൊണ്ടുള്ള എന്തു നടപടിയാണ് സിപിഎം ദേശീയ നേതൃത്വം കൈക്കൊണ്ടതെന്ന് ആദ്യം വ്യക്തമാക്കട്ടെ. മുക്കാൽ നൂറ്റാണ്ടിലേറെയായി സ്വതന്ത്ര പലസ്തീനു വേണ്ടി വാദിക്കുകയും പിന്തുണയ്ക്കുകയും ഒരു സ്വതന്ത്ര പരമാധികാര ജനതയാണ് അവരെന്ന് അം​ഗീകരിക്കുകയും ചെയ്യുന്ന ഇന്ത്യൻ നാഷണൽ കോൺ​ഗ്രസിനെ സിപിഎം വിമർശിക്കുന്നത് അതു കഴിഞ്ഞു മതി.

Advertisement
inner ad

Featured

കുവൈത്ത് തീപിടിത്തം; അനുശോചിച്ച് പ്രതിപക്ഷ നേതാവ്

Published

on

തിരുവനന്തപുരം: കുവൈത്തില്‍ മംഗെഫില്‍ ഫ്‌ളാറ്റ് സമുച്ചയത്തിലെ തീപിടിത്തത്തിലുണ്ടായ മരണങ്ങളില്‍ ദുഃഖം രേഖപ്പെടുത്തുന്നുവെന്ന് പ്രതിപക്ഷ നേതാവ് വിഡി സതീശൻ. 45ല്‍ അധികം മരണങ്ങളും നിരവധി പേര്‍ക്ക് ഗുരുതരമായി പരുക്കേറ്റതുമായാണ് പുറത്തു വരുന്ന വാര്‍ത്തകള്‍. അപകടത്തില്‍ നിരവധി മലയാളികള്‍ക്ക് ജീവന്‍ നഷ്ടപ്പെട്ടതായാണ് റിപ്പോര്‍ട്ടുകള്‍. കേരളത്തെ ആകെ കരയിക്കുന്ന ദുരന്തമാണ് ഉണ്ടായത്. കുവൈത്തിലെ മലയാളി സംഘടനകളുമായി ബന്ധപ്പെടുന്നുണ്ട്. കേന്ദ്ര – സംസ്ഥാന സര്‍ക്കാരുകളുടെ ഏകോപനത്തില്‍ മരണപ്പെട്ടവരുടെ വിവരങ്ങള്‍ ലഭ്യമാകും എന്ന് പ്രതീക്ഷിക്കുന്നുവെന്നും പ്രതിപക്ഷ നേതാവ് പറഞ്ഞു.

Continue Reading

Featured

കുവൈത്ത്‌ തീപിടിത്തം; അനുശോചിച്ച് പ്രധാനമന്ത്രിയും മുഖ്യമന്ത്രിയും, വിദേശകാര്യ സഹമന്ത്രി കുവൈത്തിലേക്ക് പുറപ്പെട്ടു

Published

on

ന്യൂഡൽഹി: കുവൈത്ത്‌ തീപിടിത്തത്തില്‍ ദുഖം രേഖപ്പെടുത്തി പ്രധാനമന്ത്രി നരേന്ദ്ര മോദി. പരിക്കേറ്റവര്‍ എത്രയും വേഗം സുഖം പ്രാപിക്കട്ടെ എന്ന് പ്രാര്‍ഥിക്കുന്നതായും മോദി പറഞ്ഞു. കുവൈത്തിലെ ഇന്ത്യന്‍ എംബസി സ്ഥിതിഗതികള്‍ സൂക്ഷ്മമായി നിരീക്ഷിക്കുകയാണ്. ദുരിതബാധിതരെ സഹായിക്കാന്‍ അവിടത്തെ അധികാരികളുമായി ചേര്‍ന്ന് പ്രവര്‍ത്തിക്കുമെന്ന് പ്രധാനമന്ത്രി അറിയിച്ചു.

വിദേശകാര്യ സഹമന്ത്രി കീര്‍ത്തി വര്‍ധന്‍ സിംഗ് കുവൈത്തിലേക്ക് പുറപ്പെട്ടു. മരിച്ച ഇന്ത്യക്കാരുടെ മൃതദേഹങ്ങള്‍ കാലതാമസമില്ലാതെ നാട്ടിലെത്തിക്കാന്‍ മന്ത്രി ഇടപെടും. തീപിടത്തില്‍ പരുക്കേറ്റവര്‍ക്കുള്ള സഹായത്തിന് മേല്‍നോട്ടവും വഹിക്കും.

Advertisement
inner ad

കുവൈത്ത് തീ പിടിത്തത്തില്‍ അടിയന്തര ഇടപെടല്‍ ആവശ്യപ്പെട്ട് മുഖ്യമന്ത്രി പിണറായി വിജയന്‍ കേന്ദ്ര വിദേശകാര്യ മന്ത്രി എസ്. ജയശങ്കറിന് കത്തയച്ചു. ദൗര്‍ഭാഗ്യകരമായ സംഭവത്തില്‍ മലയാളികള്‍ ഉള്‍പ്പെടെ നിരവധി ഇന്ത്യക്കാര്‍ക്ക് ജീവന്‍ നഷ്ടപ്പെട്ടതായും ചിലര്‍ക്ക് ഗുരുതരമായി പരുക്കേറ്റതായും റിപ്പോര്‍ട്ടുണ്ട്. കുവൈത്ത് സര്‍ക്കാരുമായി ബന്ധപ്പെട്ട് ദുരിതാശ്വാസ പ്രവര്‍ത്തനങ്ങളും രക്ഷാപ്രവര്‍ത്തനങ്ങളും ഏകോപിപ്പിക്കുന്നതിന് ആവശ്യമായ നിര്‍ദ്ദേശങ്ങള്‍ ഇന്ത്യന്‍ എംബസിക്ക് നല്‍കണമെന്നും മുഖ്യമന്ത്രി കത്തിലൂടെ അഭ്യര്‍ത്ഥിച്ചു.

Advertisement
inner ad
Continue Reading

Featured

300 കോടിയുടെ സ്വത്ത് സ്വന്തമാക്കാൻ മരുമകളുടെ ക്രൂരത; ഭർതൃപിതാവിന്റെ മരണം ക്വട്ടേഷൻ കൊലപാതകം

Published

on

മുംബൈ: മുന്നൂറുകോടി രൂപയുടെ സ്വത്ത് സ്വന്തമാക്കാൻ ഭർതൃപിതാവിനെ കൊല്ലാൻ ക്വട്ടേഷൻ നല്‍കിയത് മരുമകള്‍. നാഗ്പുർ സ്വദേശിയായ പുരുഷോത്തം പുട്ടേവാർ(82) കാറിടിച്ച്‌ മരിച്ച സംഭവവാണ് ക്വട്ടേഷൻ കൊലപാതകമാണെന്ന് പോലീസ് കണ്ടെത്തിയത്.കേസില്‍ പുരുഷോത്തം പുട്ടേവാറിന്റെ മകന്റെ ഭാര്യയായ അർച്ചന മനീഷ് പുട്ടേവാറി(53)നെ പോലീസ് അറസ്റ്റ് ചെയ്തു. നാഗ്പുരിന് സമീപം ഗദ്ഛിരോളിയില്‍ ടൗണ്‍ പ്ലാനിങ് വകുപ്പിലെ അസി. ഡയറക്ടറാണ് പ്രതി.

മേയ് 22-നാണ് നാഗ്പുരിലെ ബാലാജി നഗറില്‍വെച്ചാണ് വ്യാപാരിയായ പുരുഷോത്തം പുട്ടേവാർ കാറിടിച്ച്‌ മരിച്ചത്. മകളുടെ വീട്ടിലേക്ക് നടന്നുപോകുന്നതിനിടെയാണ് അപകടം സംഭവിച്ചതെന്നാണ് ചില മാധ്യമങ്ങളുടെ റിപ്പോർട്ട്. എന്നാല്‍, ആശുപത്രിയില്‍ കഴിയുന്ന ഭാര്യയെ സന്ദർശിച്ച്‌ മടങ്ങുന്നതിനിടെയാണ് അപകടമുണ്ടായതെന്നും റിപ്പോർട്ടുകളുണ്ട്. നടന്നുപോവുകയായിരുന്ന പുരുഷോത്തമിനെ അതിവേഗത്തിലെത്തിയ കാർ ഇടിച്ചിടുകയും റോഡിലൂടെ വലിച്ചിഴക്കുകയുമായിരുന്നു. ഗുരുതരമായി പരിക്കേറ്റ ഇദ്ദേഹത്തെ ആശുപത്രിയില്‍ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല.

Advertisement
inner ad

സംഭവം സാധാരണരീതിയിലുള്ള അപകടമാണെന്നായിരുന്നു പോലീസിന്റെ പ്രാഥമിക കണ്ടെത്തല്‍. ഇതേത്തുടർന്ന് കാർ ഡ്രൈവറെ അറസ്റ്റ് രേഖപ്പെടുത്തി ജാമ്യത്തില്‍ വിട്ടയക്കുകയുംചെയ്തു. എന്നാല്‍, അപകടത്തിന്റെ സിസിടിവി ദൃശ്യങ്ങളടക്കം പരിശോധിച്ചപ്പോള്‍ അപകടം സംബന്ധിച്ച്‌ ചില സംശയങ്ങള്‍ ഉയർന്നു. ഇതോടെ പോലീസ് വിശദമായ അന്വേഷണം ആരംഭിച്ചു. ഈ അന്വേഷണത്തിലാണ് സംഭവം ക്വട്ടേഷൻ കൊലപാതകമാണെന്നും മരിച്ചയാളുടെ മരുമകളാണ് കൊലപാതകം ആസൂത്രണംചെയ്തതെന്നും വ്യക്തമായത്. തുടർന്ന് പ്രതിയായ അർച്ചനയെ പോലീസ് കസ്റ്റഡിയിലെടുക്കുകയായിരുന്നു. അറസ്റ്റിലായ അർച്ചന പുരുഷോത്തമിന്റെ മകനും ഡോക്ടറുമായ മനീഷിന്റെ ഭാര്യയാണ്. പുരുഷോത്തമിന്റെ പേരിലുള്ള 300 കോടി രൂപയുടെ സ്വത്തിന്റെ അനന്തരാവകാശി ആരാണെന്നതിനെച്ചൊല്ലി കുടുംബത്തില്‍ തർക്കംനിലനിന്നിരുന്നു. ഇതിനൊപ്പം ഭർതൃപിതാവിനോടുള്ള പകയും കൊലപാതകത്തിന് കാരണമായി. തുടർന്ന് സ്വത്ത് സ്വന്തമാക്കാനായി അർച്ചനയാണ് കൊലപാതകം ആസൂത്രണംചെയ്തത്. ഇതിനായി ഭർത്താവിന്റെ ഡ്രൈവറുടെ സഹായവും തേടി.

ഭർത്താവിന്റെ ഡ്രൈവറായ സർഥക് ബാഗ്ഡെ എന്നയാളാണ് കൃത്യം നടത്താൻ അർച്ചനയെ സഹായിച്ചത്. ഇയാള്‍ മുഖേന സച്ചിൻ ധർമിക് എന്ന ക്വട്ടേഷൻസംഘത്തലവനെ കണ്ടെത്തി. തുടർന്ന് നീരജ് നിംജെ എന്നയാളാണ് കാറിടിപ്പിച്ച്‌ 82-കാരനെ കൊലപ്പെടുത്തിയതെന്നും പോലീസ് പറഞ്ഞു. കൃത്യം നടത്തിയാല്‍ ഒരുകോടി രൂപയാണ് അർച്ചന ക്വട്ടേഷൻ സംഘത്തിന് വാഗ്ദാനംചെയ്തിരുന്നത്. മുൻകൂറായി മൂന്ന് ലക്ഷം രൂപയും ഏതാനും സ്വർണാഭരണങ്ങളും അർച്ചന മറ്റുപ്രതികള്‍ക്ക് നല്‍കിയിരുന്നു. ഇതിനിടെ സച്ചിനും സർഥക്കും ചേർന്നാണ് കൃത്യം നടപ്പിലാക്കാനുള്ള സെക്കൻഡ് ഹാൻഡ് കാർ വാങ്ങിയത്. ഇതിനായി സച്ചിൻ 40,000 രൂപയും സർഥക്ക് 1.20 ലക്ഷം രൂപയും ചെലവാക്കിയെന്നും പോലീസ് പറഞ്ഞു.

Advertisement
inner ad

കേസില്‍ അർച്ചനയ്ക്ക് പുറമേ ക്വട്ടേഷൻസംഘത്തലവനായ സച്ചിനെയും കാറോടിച്ച നീരജിനെയും പോലീസ് അറസ്റ്റ് ചെയ്തിട്ടുണ്ട്. അതേസമയം, അർച്ചനയുടെ ഭർത്താവിന്റെ ഡ്രൈവറായ സർഥക് ബാഗ്ഡെ ഒളിവിലാണ്. അർച്ചന പ്രതികള്‍ക്ക് നല്‍കിയ പണവും ആഭരണങ്ങളും പോലീസ് ഇവരുടെ വീടുകളില്‍നിന്ന് കണ്ടെടുത്തു. സംഭവത്തില്‍ പ്രതികളെ കസ്റ്റഡിയില്‍ വാങ്ങിയശേഷം വിശദമായ അന്വേഷണം തുടരുമെന്നും പോലീസ് അറിയിച്ചു.

Advertisement
inner ad
Continue Reading

Featured