പ്രതിദിനം അഞ്ചു കോടി ലിറ്റർ വെള്ളം ചുരത്തി വില്പന നടത്തുന്ന ത‌ടാകം. ലിറ്ററിന് 12 രൂപ വച്ചു കണക്കാക്കിയാൽ ഒരു ദിവസം 60 കോടി രൂപ വിലയുള്ള വെള്ളം. വർഷക്കണക്കിലേക്കു ഗുണിച്ചാൽ 2,190 കോടി രൂപ! അഞ്ചു ലക്ഷത്തിലധികം ഉപയോക്താക്കളാണ് ഇതത്രയും കുടിച്ചു തീർക്കുന്നത്.  ഈ അമൃതകുംഭം സംരക്ഷിക്കാൻ ആരും ചില്ലിക്കാശ് മുടക്കുന്നില്ലെന്നതോ പോകട്ടെ, കായൽ സംരക്ഷണത്തെക്കുറിച്ച് അധികൃതർ മിണ്ടുന്നതു പോലുമില്ല.

കൊല്ലം മുനിസിപ്പൽ കോർപ്പറേഷനിലെയും ജില്ലയിലെ പത്തോളം ഗ്രാമ പഞ്ചായത്തുകളിലെയും മുഴുവൻ ജനങ്ങളുടെ ദാഹമ‌ടക്കാനുള്ള ഒരേയൊരു ജലസ്രോതസാണ് ശാസ്താംകോട്ട ശുദ്ധജലതടാകം. പൈതൃക ജലസ്രോതസായി കേന്ദ്ര വനം പരിസ്ഥിതി മന്ത്രാലയം പ്രഖ്യാപിച്ചതുമാണ്.  എന്നിട്ടും ശാസ്താംകോട്ട കായൽ അനാഥം. മണ്ണു വീണു നികന്നും മണലെടുത്തു കുഴിച്ചും മനുഷ്യ വിസർജ്യങ്ങളടക്കം കൊണ്ടുവന്നു തള്ളിയും ഈ ജലസ്രോതസിനെ കൊല്ലാക്കൊല ചെയ്യുകയാണ്. കായലിലെ ഉറവകളടഞ്ഞ് ജലനിരപ്പ് താഴുന്നതു പതിവായി. കൂടെക്കൂടെ നിറം മാറിയും പായൽ മൂ‌ടിയും കോളിഫോം ബാക്റ്റീരിയകൾ പെരുകിയും ഈ ജലാശയം വീർപ്പുമുട്ടുന്നു.

 സമീപ സ്ഥലങ്ങളിലെ മണലൂറ്റുകാർ ഉപേക്ഷിച്ചു പോയ കൂറ്റൻ ഗർത്തങ്ങളിലേക്ക് കായലിൽ നിന്നുള്ള ജലം ചോർന്നു പോകുന്നതാണ് ജലനിരപ്പു താഴാൻ ഒരു കാരണം. ഫിൽറ്റർ ഹൗസിലൂ‌ടെ പമ്പ് ചെയ്തു സമാഹരിക്കുന്ന വെള്ളം പൈപ്പ് പൊട്ടിയും അനധികൃതമായി ഊറ്റിയെടുത്തും ചോർത്തിക്കളയുന്നതു മറ്റൊരു വെല്ലുവിളി. കായൽ സംരക്ഷണത്തിന് വലിയ തോതിലുള്ള പ്രക്ഷോഭം നയിച്ചിട്ടുണ്ട് ശാസ്താംകോട്ടയിലെ ജനങ്ങൾ. മുൻ യുഡിഎഫ് സർക്കാരിന്റെ കാലത്ത് അന്നത്തെ മുഖ്യമന്ത്രി ഉമ്മൻ ചാണ്ടി കായൽ സംരക്ഷണത്തിന് പ്രത്യേക പദ്ധതി പ്രഖ്യാപിച്ചിരുന്നു. എന്നാൽ പിന്നീടു വന്ന ഇടതു സർക്കാർ കാര്യമായി യാതൊന്നും ചെയ്തില്ല.

1982 ജനുവരി 16ന് ഈ കായലിലുണ്ടായ വഞ്ചിയപകടത്തിൽ 24 പേർ കൊല്ലപ്പെട്ടിരുന്നു. അന്നു രക്ഷാപ്രവർത്തനം നടത്തിയ മുങ്ങൽ വിദഗ്ധരടക്കം, കായലിന്റെ അ‌ടിത്തട്ടിനെക്കുറിച്ച് വിദഗ്ധ പഠനം വേണമെന്ന് അഭിപ്രായപ്പെട്ടിരുന്നു. ദുരൂഹവും അപരിചതവുമാണ് കായലിന്റെ അ‌ടിത്തട്ടെന്നായിരുന്നു വിലയിരുത്തൽ. പിന്നീടു ന‌ടത്തിയ ചില പഠനങ്ങളിലും ഇതു വെളിപ്പെട്ടു.

Advertisement

inner ad

373 ഹെക്റ്ററാണ് കായലിന്റെ വിസ്തൃതി. മണ്ണു മൂടിയിലും ചെളി നിറഞ്ഞും ഏറെ ഭാഗം നികന്നു. 2019ലെയും 20ലെയും മഹാപ്രളയ കാലത്താണ് കായൽ സമീപകാലത്ത് ഏറെ ജസസമ്പന്നമായത്. നൂറു മീറ്റർ വരെ ഉൾവലിഞ്ഞിരുന്ന കായൽ പൂർവ സ്ഥാനകത്തേക്ക് അന്നു തിരിച്ചെത്തി. ഈ ജലസമൃദ്ധിയിൽ സെന്റർ ഇൻസ്റ്റിട്യൂട്ട് ഓഫ് ഫിഷറീസ് ടെക്നോളജി (CIFT)യിലെ പ്രിൻസിപ്പൽ സയന്റിസ്റ്റ് ടോം സി ജോസഫിന്റെ നേതൃത്വത്തിൽ നടത്തിയ പഠനത്തിൽ, കായൽ വെള്ളത്തിന്റെ നൈസർഗിക പരിശുദ്ധി വെളിപ്പെ‌ട്ടിരുന്നു. ഈ സമയത്ത് വെള്ളത്തിലെ കോളിഫോം, ഇ കോളി സാന്ദ്രത നൂറു മില്ലി ലിറ്ററിന് 50 എംപിഎൻ എന്ന സുരക്ഷിത ലവലിലായിരുന്നു. കായലിലെ ജലവിതാനം ഉയർന്നു നിന്നാൽ ഈ സ്ഥിതി നിലനിർത്താനാവുമെന്ന് സിഫ്റ്റ് അധികൃതർ പറയുന്നു. പണ്ടു കാലത്ത് ഈ കായലിലെ വെള്ളം കൈകൊണ്ടു കോരിക്കു‌ടിച്ചിരുന്ന വലിയ തലമുറ കായലിന്റെ ചുറ്റുവട്ടത്തുണ്ടായിരുന്നു. ഒരു ഡസണോളം ശുദ്ധജല ജീവജാലങ്ങളുടെ ആവാസ വ്യവസ്ഥ കൂടിയായിരുന്നു ഈ കായൽ.

ഈ വർഷം വേനൽ മഴ കുറഞ്ഞതോടെ കാലയലിലെ ജല നിരപ്പ് വീണ്ടും താഴ്ന്നു. അതോടെ മാലിന്യങ്ങളുടെ അളവും കൂടി. 2018ൽ കേരളത്തിലെ നൈസർഗിക കായൽ സ്രോതസുകൾ സംരക്ഷിക്കുന്നതിന് 680 കോടി രൂപയുടെ ബൃഹത്തായ ഒരു പദ്ധതി രൂപപ്പെടുത്തിയിരുന്നു. 60ഃ40 എന്ന അനുപാതത്തിൽ കേന്ദ്ര- സംസ്ഥാന സർക്കാരുകൾക്കായിരുന്നു ഇതിന്റെ ചുമതല.  വേമ്പനാട് കായൽ, അഷ്ടമുടിക്കായൽ, ശാസ്താംകോട്ട കായൽ എന്നിവയായിരുന്നു പദ്ധതിയുടെ പരിധിയിൽ വന്നത്. അതിൽ ശാസ്താംകോട്ട കായലിന്റെ വിഹിതം 100 കോടി രൂപ. പദ്ധതി പ്രഖ്യാപിച്ചതല്ലാതെ കേന്ദ്ര സർക്കാരും സംസ്ഥാന സർക്കാരും ഒന്നും ചെയ്തില്ല. പ്രാരംഭ പ്രവർത്തനങ്ങൾക്കെന്നു പറഞ്ഞ് അന്ന് 35.77 ലക്ഷം രൂപ അനുവദിച്ചതാണ്. പക്ഷേ, കായലിൽ കായം കലക്കിയതു പോലെ അതു പലവായിൽ ചെലവായി.

Advertisement

inner ad

ശാസ്താംകോട്ട ത‌ടാക സംരക്ഷണത്തിന് സ്റ്റാട്യൂട്ടറി പദവിയുള്ള സംരക്ഷണ അതോറിറ്റി രൂപീകരിക്കണമെന്നതാണ് കൊല്ലം നിവാസികളുടെ പ്രധാന ആവശ്യം. വിവിധ വകുപ്പുകൾ തമ്മിലുള്ള ഏകോപനത്തിനും വിവിധ ഏജൻസികളിൽ നിന്നു ലഭിക്കാവുന്ന സാമ്പത്തിക സഹായങ്ങൾ ഫലപ്രദമായി വിനിയോഗിക്കുന്നതിനും അത്തരമൊരു അതോരിറ്റി അനിവാര്യമാണ്. സെപ്ഷ്യൽ എക്കണോമിക് സോൺ മാതൃകയിൽ സ്പെഷ്യൽ എക്കോളജിക്കൽ സോൺ ആയി പ്രഖ്യാപിച്ച് ഈ കുടിനീർ സ്രോതസ് സംരക്ഷിക്കുന്നില്ലെങ്കിൽ കൊല്ലം ജില്ല അപ്പാടെ കുടിനീരിനു നെട്ടോട്ടമോടുന്ന കാലം ഒട്ടും അകലെയല്ല.