പത്തനംതിട്ട: തിരുവല്ല മുനിസിപ്പൽ സെക്രട്ടറിയായിരിക്കേ കൈക്കൂലി കേസിൽ പത്തനംതിട്ട വിജിലൻസ് അറസ്റ്റ് ചെയ്ത നാരായണൻ സ്റ്റാലിൻ അനധികൃതമായി സ്വന്തമാക്കിയ സ്വത്തുക്കളെ സംബന്ധിച്ച് വിജിലൻസിന്റെ തുടരന്വേഷണം.
കോടി കണക്കിനു രൂപയുടെ അനധികൃത സ്വത്തുക്കൾ ഇയാൾക്കുള്ളതായാണ് പ്രാഥമിക വിലയിരുത്തൽ. യഥാർഥ കണക്കുകൾ പുറത്തു വരാനിരിക്കുന്നതേയുള്ളൂവെന്നും അന്വേഷണം നടക്കുകയാണെന്നും അന്വേഷണ ഉദ്യോഗസ്ഥർ പറഞ്ഞു. നാരായൺ സ്റ്റാലിൻ മുനിസിപ്പൽ സെക്രട്ടറിയായി സേവനം ചെയ്ത അങ്കമാലി, നെടുമങ്ങാട്, ചെങ്ങന്നൂർ, തിരുവല്ല നഗരസഭാ പരിധികളിൽ ഭീഷണിപ്പെടുത്തിയും അനധികൃത സഹായം വാഗ്ദാനം ചെയ്തുമാണ് ഇയാൾ ധനസമാഹരണം നടത്തിയിരുന്നതെന്നാണ് വിലയിരുത്തൽ.

വീടുകളിലെ പരിശോധനയിൽ കണ്ടെത്തിയത്  അനധികൃത ഇടപാട് രേഖകൾ

Advertisement

inner ad

കൈക്കൂലികേസിൽ കുടുങ്ങിയതിനു പിന്നാലെ ഇയാളുടെ വീട്ടിൽ നടത്തിയ പരിശോധനയിൽ നിന്നാണ് പല വിവരങ്ങളും പുറത്തുവന്നത്. ഒരേ നന്പറിലുള്ള രണ്ട് ഇരുചക്രവാഹനങ്ങൾ ഇയാളുടെ തിരുവനന്തപുരത്തെ വീട്ടിൽ നിന്നും കണ്ടെത്തിയിരുന്നു. ഇതുമായി ബന്ധപ്പെട്ട നടപടികൾക്ക് മോട്ടോർ വാഹനവകുപ്പിനും ശിപാർശ ചെയ്തിട്ടുണ്ട്. ഭൂമി ഇടപാടുകൾ സംബന്ധിച്ച രേഖകളും പിടിച്ചെടുത്തിട്ടുണ്ട്. 2002 ജൂണിൽ നെടുമങ്ങാട്ട് 1.20 കോടി രൂപയുടെ വസ്തു ഇടപാടിൻറെ രേഖകൾ അടക്കം പിടിച്ചെടുത്തിരുന്നു.  നിരവധി വസ്തുക്കളുടെ കരം അടച്ച രസീതുകളും ഇതിലുൾപ്പെടുന്നു.
 ബിനാമികളായ പലരുടേയും പേരുകളിലാണ് സമ്പാദ്യങ്ങളേറെയും. വിജിലൻസ് ഇതിന്റെ കണക്ക് പരിശോധിച്ചു വരികയാണ്.
കൈക്കൂലിയായി ലഭിക്കുന്ന പണം  വാങ്ങി അക്കൗണ്ടിൽ ഇടനിലക്കാരെ ഉപയോഗിച്ചു നിക്ഷേപിക്കുകയാണ് നാരായണൻസ്റ്റാലിൻറെ രീതിയെന്ന് അന്വേഷണസംഘം പറയുന്നു.  അത്തരത്തിൽ ലഭിച്ച പണം നാരായണൻ പറഞ്ഞ അക്കൗണ്ടിൽ നിക്ഷേപിക്കാൻ തിരുവല്ല മുനിസിപ്പാലിറ്റിയിലെ ഓഫീസ് അസിസ്റ്റൻറ് ഹസീന പോകുന്നതിനിടയിലാണ് ഇവരും പിടിയിലായത്. ജീവനക്കാരിൽ ചിലരെയും ഇടനിലക്കാരായി നഗരസഭ ഓഫീസുകളിലെത്തുന്നവരെയുമാണ് തന്റെ അടുത്തയാളുകളായി സെക്രട്ടറി ഉപയോഗിച്ചുവന്നത്. പലപ്പോഴും നാരായണൻ നേരിട്ട് പണം വാങ്ങാറുമില്ല. ഇതു മനസിലാക്കിയ വിജിലൻസ് സംഘം വളരെ തന്ത്രപരമായാണ് നാരായണനെ കുടുക്കിയത്. തിരുവല്ല നഗരസഭയിലെ ഖരമാലിന്യ നിർമാർജനവുമായി ബന്ധപ്പെട്ട കരാറുകാരൻ നൽകിയ പണം   ഇയാളുടെ അക്കൗണ്ടിൽ നിക്ഷേപിക്കാൻ ഓഫീസ് അസിസ്റ്റന്റിന് കൈമാറുന്നതിനിടയിലാണ് നാരായണന്റെ അറസ്റ്റ്. സാമ്പത്തിക പിൻബലവും രാഷ്ട്രീയ പിന്തുണയും സെക്രട്ടറിക്കു ജോലിസ്ഥലങ്ങളിൽ ഉണ്ടായിരുന്നതായി കണ്ടെത്തിയിട്ടുണ്ട്. ഉന്നതരായ പല രാഷ്ട്രീയ നേതാക്കളുടെയും മന്ത്രിമാരുടെയും ഒക്കെ പേരുകൾ ദുരുപയോഗിച്ചും തട്ടിപ്പുകൾ നടത്തിയിട്ടുണ്ടെന്നാണ് സൂചന.

ഭരണതലത്തിലും അനധികൃത ഇടപെടലുകൾ

Advertisement

inner ad

നാരായണൻസ്റ്റാലിൻ ജോലി ചെയ്യുന്ന മുനിസിപ്പാലിറ്റികളിൽ ആദ്യം ജീവനക്കാരെയും കൗൺസിലർമാരേയും തമ്മിൽ ഭിന്നിപ്പിച്ചാണ് സേവനം ആരംഭിക്കുന്നത്. തിരുവല്ല നഗരസഭയിലും സമാനമായ രീതിയാണ് അവലംബിച്ചുവന്നത്. നഗരസഭ ചെയർപേഴ്‌സൺ തെരഞ്ഞെടുപ്പിലെ ഇടപെടലും മുന്നണിക്കുള്ളിൽ ഭിന്നതയുണ്ടാക്കി പുതിയ ചെയർപേഴ്‌സണെ നിശ്ചയിച്ചതുമെല്ലാം തന്ത്രപരമായ നീക്കമായിരുന്നു. മുൻ ചെയർപേഴ്‌സണുമായി ഇടഞ്ഞതും പരസ്യമായി പോർവിളി നടത്തിയതുമെല്ലാം പതിവുശൈലിയുടെ ഭാഗമാണെന്നു വിലയിരുത്തപ്പെടുന്നു. സെക്രട്ടറിയുമായി ഇടഞ്ഞ് തിരുവല്ലയിൽ രാജിവച്ച ചെയർപേഴ്‌സൺ ശാന്തമ്മ വർഗീസ്  വിജിലൻസ് അന്വേഷണം ആവശ്യപ്പെട്ടു നൽകിയ കത്തുപോലും വെളിച്ചം കണ്ടില്ല. ചെയർപേഴ്‌സൺ സെക്രട്ടറിക്കു രാജിക്കത്ത് നേരിട്ടു നൽകാതെ രജിസ്റ്റേർഡ് തപാലിൽ അയക്കുകയുമായിരുന്നു.

സെക്രട്ടറിയെ സസ്‌പെൻഡ് ചെയ്തത് ഒരാഴ്ച കഴിഞ്ഞ്

Advertisement

inner ad

വിജിലൻസ്  അറസ്റ്റു ചെയ്ത് ഒരാഴ്ച പിന്നിടുന്‌പോഴാണ് നാരായണൻ സ്റ്റാലിനെ സർവീസിൽ നിന്നു സസ്‌പെൻഡ് ചെയ്തുകൊണ്ടുള്ള ഉത്തരവിറങ്ങിയത്. ഇന്നലെയാണ് ഇത് തിരുവല്ല നഗരസഭ ഓഫീസിൽ ലഭിച്ചത്. സാധാരണ നിലയിൽ കൈക്കൂലിക്കേസിൽ പിടികൂടുന്ന ഉദ്യോഗസ്ഥനെ 489 മണിക്കൂറിനുള്ളിൽ സസ്‌പെൻഡ് ചെയ്യുകയാണ് രീതി. റിമാൻഡ് റിപ്പോർട്ട് സഹിതം വിജിലൻസ് ഡിവൈഎസ്പി ഹരി വിദ്യാധരൻ തദ്ദേശ വകുപ്പ് സെക്രട്ടറിക്കു കൈമാറിയതാണ്. റിപ്പോർട്ട് ലഭിച്ചാലുടൻ വകുപ്പ് മേധാവി നടപടിയെടുക്കേണ്ടതാണ്. നടപടി ശിപാർശ ചെയ്യുന്ന അർബൻ ഡയറക്ടറേറ്റിൽ നാരായണൻ സ്റ്റാലിൻറെ ഭാര്യ ജോലി ചെയ്യുന്നതും നടപടി വൈകാൻ കാരണമായതായി പറയുന്നു. പിന്നീട് ആക്ഷേപം ഏറിയതോടെ ഒരാഴ്ച കഴിഞ്ഞപ്പോൾ ഉത്തരവിറക്കുകയായിരുന്നു. സെക്രട്ടറിയെ നീക്കിക്കൊണ്ടുള്ള ഉത്തരവ് വരാത്തതിനാൽ തിരുവല്ല നഗരസഭയിൽ ചുമതലയും ആർക്കും നൽകിയിരുന്നില്ല. സാന്പത്തികവർഷാവസാനം ആയതിനാൽ പദ്ധതി നിർവഹണം, ബജറ്റ് തയാറാക്കൽ തുടങ്ങി തിരക്കിട്ട ജോലികൾക്കിടെയിലാണ് സെക്രട്ടറിയും അസാന്നിധ്യം നഗരസഭ ഭരണത്തിലുണ്ടാകുന്നത്.

Advertisement

inner ad