മലപ്പുറം : വട്ടപ്പാറയിൽ ലോറി മറിഞ്ഞ് മൂന്ന് പേർ മരിച്ചു. ഉള്ളി കയറ്റി വന്ന ലോറിയാണ് അപകടത്തിൽപ്പെട്ടത്. ന്നു പുലർച്ചെ ആയിരുന്നു അപകടം. മരിച്ചവരെ ഇതുവരെയും തിരിച്ചറിയാനായിട്ടില്ല. നിയന്ത്രണം വിട്ട ലോറി വട്ടപ്പാറ വളവിലെ ഗർത്തത്തിലേക്ക് മറിയുകയായിരുന്നു. വാഹനത്തിൽ മൂന്ന് തൊഴിലാളികളാണ് ഉണ്ടായിരുന്നത്. ഇവർ വാഹനത്തിനുള്ളിൽ കുടുങ്ങിയ നിലയിലായിരുന്നു. ഏറെ നേരത്തെ രക്ഷാപ്രവർത്തനത്തിലൊടുവിലാണ് ഇവരെ പുറത്തെടുക്കാനായത്. ഇവരെ ആശുപത്രിയിലെത്തിച്ചെങ്കിലും രക്ഷപ്പെടുത്താനായില്ല. സ്ഥിരം അപകടമുണ്ടാകുന്ന സ്ഥലമാണ് വട്ടപ്പാറ. ഈ മാസം നാലാമത്തെ അപകടമാണ് ഇപ്പോൾ ഉണ്ടായിരിക്കുന്നത്.

കോഴിക്കോട് : കര്‍ണാടകയിലെ ക്വാറി ബിസിനസില്‍ പങ്കാളിത്തം വാഗ്ദാനം ചെയ്ത് 50 ലക്ഷം രൂപ തട്ടിയെടുത്തെന്ന പരാതിയില്‍ പി.വി അന്‍വര്‍ എംഎല്‍എ എന്‍ഫോഴ്സ്മെന്‍റ് ഡയറക്ടറേറ്റിന് (ഇഡി) മുമ്പില്‍ വീണ്ടും ഹാജരായി.ഇത് നാലാം തവണയാണ് ചോദ്യം ചെയ്യലിന് ഹാജരാകുന്നത്.

മലപ്പുറം: ലഹരി വിരുദ്ധ ക്യാമ്പയിന്റെ ഭാഗമായ് ഏഷ്യാനെറ്റ് ന്യൂസ് സംപ്രേക്ഷണം ചെയ്ത വിവാദ അഭിമുഖത്തെ തുടര്‍ന്ന് പി.വി അന്‍വര്‍ എംഎല്‍എയ്ക്ക് നിയമസഭയില്‍ വിഷയം ഉന്നയിക്കാന്‍ പ്രേരണയായത് അതേ സ്ഥാപനത്തിലെ മാധ്യമ പ്രവര്‍ത്തകയുമായുള്ള സൗഹൃദമെന്ന് ആരോപണം. ഏഷ്യാനെറ്റ് ന്യൂസില്‍ പ്രവര്‍ത്തിച്ച് സിപിഎം അനുകൂല വാര്‍ത്തകള്‍ മാത്രം നല്‍കി വരുന്ന ഈ മാധ്യമ പ്രവര്‍ത്തക സിപിഎം നേതാവിന്റെ അടുത്ത ബന്ധു കൂടിയാണ്. വിവരം ചോര്‍ത്തലുമായ് ബന്ധപ്പെട്ട് ഏഷ്യാനെറ്റ് ന്യൂസ് ആഭ്യന്തര അന്വേഷണം ആരംഭിച്ചതായാണ് വിവരം.
 ഏഷ്യാനെറ്റ് ന്യൂസ് ക്യാമ്പയിന്റെ ഭാഗമായ് ടെലികാസ്റ്റ് ചെയ്ത രണ്ട് അഭിമുഖങ്ങളിലെയും സംഭാഷണങ്ങള്‍ ഒന്നാണെന്നും രണ്ടാമത്തേത് വ്യാജ അഭിമുഖമാണെന്നും ആരോപിച്ച് കഴിഞ്ഞ ദിവസം പി.വി അന്‍വറാണ് നിയമസഭയില്‍ ചോദ്യരൂപത്തില്‍ വിഷയം അവതരിപ്പിച്ചത്. അഭിമുഖത്തിലെ കുട്ടി ഏഷ്യാനെറ്റ് സ്റ്റാഫിന്റെ ബന്ധുവാണെന്ന് അന്‍വര്‍ ആരോപിച്ചത് മാധ്യമ പ്രവര്‍ത്തക നല്‍കിയ വിവരത്തിന്റെ അടിസ്ഥാനത്തിലാണ്.
 അന്‍വറിന് വിവരങ്ങള്‍ യഥാസമയം കൈമാറിയത് സ്ഥാപനത്തിനുള്ളില്‍ നിന്നു തന്നെയാണെന്നാണ് വിവരം. നേരത്തെ അന്‍വറിന്റെ അനധികൃത നിര്‍മ്മാണങ്ങളെയും കയ്യേറ്റങ്ങളെയും കുറിച്ച് ഏഷ്യാനെറ്റ് നിരന്തരം വാര്‍ത്തകള്‍ നല്‍കിയിരുന്നു. അക്കാലത്തും സ്ഥാപന താത്പര്യത്തിന് വിരുദ്ധമായ് അന്‍വറിനെ സഹായിക്കുന്ന നിലപാടാണ് മാധ്യമ പ്രവര്‍ത്തക സ്വീകരിച്ചതെന്ന് ആക്ഷേപമുണ്ട്. സ്ഥാപനത്തില്‍ നിന്ന് വിവരം ചോര്‍ത്തി നല്‍കിയതിനെ തുടര്‍ന്നാണ് വിവാദവും പിന്നീട് എസ്എഫ്‌ഐയുടെ അക്രമണവും ഉണ്ടായത്. സ്വതന്ത്ര മാധ്യമം എന്ന നിലയില്‍ ഏഷ്യാനെറ്റിന്റെ പ്രവര്‍ത്തനത്തിന് കടവിരുദ്ധമായ സമീപനമാണ് സ്ഥാപനത്തിനുള്ളിലെ ചില ‘സിപിഎം ചാരന്മാര്‍’ നടത്തുന്നതെന്ന പരാതി നേരത്തെയും ഉണ്ട്. അഭിമുഖ വിവാദത്തോടെ ആക്ഷേപം കൂടുതല്‍ ശക്തമാകുകയാണ്.