തിരുവനന്തപുരം: കേരളത്തിലെ സർക്കാർ ജീവനക്കാരുടെയും അധ്യാപകരുടെയും ആനുകൂല്യങ്ങൾ സംസ്ഥാന സർക്കാർ ദിനംപ്രതി കവർന്നെടുക്കപ്പെടുകയാണെന്ന് കെപിസിസി ജനറൽ സെക്രട്ടറി ജി. സുബോധനൻ. കേരള എൻജിഒ അസോസിയേഷൻ സംഘടിപ്പിച്ച പ്രതിഷേധ മാർച്ച് ഉദ്ഘാടനം ചെയ്യുകയായിരുന്നു അദ്ദേഹം. കഴിഞ്ഞ മൂന്നര വർഷക്കാലമായി ജീവനക്കാർക്ക് ക്ഷാമബത്ത ലഭിക്കുന്നില്ല. 2021 മുതൽ 7 ഗഡുക്കളിലായി 21 ശതമാനമാണ് കിട്ടാനുണ്ടായിരുന്നത്.
അതിൽ ഒന്നാം ഗഡുവായ രണ്ട് ശതമാനം മെയ് മാസം ലഭിക്കുന്ന ശമ്പളത്തോടൊപ്പം അനുവദിച്ച് ഉത്തരവാ യിരുന്നു.
2021 ജനുവരി 1മുതൽ ജൂൺ 30 വരെയുള്ള കാലയളവിലേതായിരുന്നു ഈ തുക.
എന്നാൽ 2021 മുതൽ ക്ഷാമബത്ത അനുവദിച്ച ഏപ്രിൽ മാസം വരെയുള്ള 39 മാസത്തെ കുടിശികയെ കുറിച്ച് ഉത്തരവിൽ സൂചിപ്പിച്ചിട്ടില്ല. ക്ഷാമബത്ത ഏത് കാലയളവിലേതാണ് എന്ന വിവരവും ഉത്തരവിൽ നിന്ന് ഒഴിവാക്കി.
ഇത് കുടിശ്ശിക തുക അട്ടിമറിക്കുന്നതിനുള്ള ഗൂഢനീക്കത്തിന്റെ ഭാഗമാണ്.
പൊതുജനങ്ങൾക്ക് സേവനം നൽകേണ്ട സർക്കാർ വകുപ്പുകളുടെ പ്രവർത്തനത്തെ അട്ടിമറിക്കാനുള്ള ശ്രമങ്ങളുടെ ഭാഗമായി ഇതിനെ കാണേണ്ടിവരും. ക്ഷേമപ്രവർത്തനങ്ങളിൽ നിന്നും പിന്മാറാനുള്ള സർക്കാരിൻ്റെ ശ്രമങ്ങളുടെ തുടക്കമാണിത്.

ജോലി ചെയ്താൽ കൂലി നൽകാൻ കെൽപ്പില്ലാത്ത സർക്കാരാണ് ഇന്ന് കേരളം ഭരിക്കുന്നത്. ശമ്പളം കൊടുക്കേണ്ട സമയമാകുമ്പോൾ സാങ്കേതിക പ്രശ്നം എന്നോ സാമ്പത്തിക പ്രതിസന്ധി എന്നോ പറഞ്ഞ് തടി തപ്പും. സത്യത്തിൽ സർക്കാരിന്റെ തന്നെ ധൂർത്തും സാമ്പത്തിക അരാജകത്വവുമാണ് ഇതിന് കാരണം.
അഞ്ചുവർഷം മുമ്പ് ലഭിക്കേണ്ട ശമ്പള പരിഷ്ക്കരണത്തിന്റെ കുടിശിക നൽകുന്നതിനോ ലീവ് സറണ്ടർ ആനുകൂല്യം നൽകുന്നതിനോ തയ്യാറാകുന്നില്ല.
പങ്കാളിത്ത പെൻഷൻകാരെ ഉൾപ്പെടെ വഞ്ചിക്കുന്ന നയമാണ് ഇവർ തുടരുന്നത്.
ജീവനക്കാർക്ക് നിലവിൽ കിട്ടാനുള്ള 19 ശതമാനം ക്ഷാമബത്തയും ഉടൻ അനുവദിക്കണം. ഇതിൻ്റെ കുടിശിക തുക അടിയന്തരമായി പിഎഫിൽ ലയിപ്പിക്കണം.

Advertisement

inner ad

സർക്കാർ ജീവനക്കാർ പൊതുസമൂഹത്തിന്റെ തന്നെ ഭാഗമാണ്. അവരെ ഒറ്റപ്പെടുത്തി ആനുകൂല്യങ്ങൾ കവർന്നെടുക്കുന്നത് അനുവദിക്കാനാകില്ല. ഇതിനെതിരെ ശക്തമായ പ്രതിഷേധ പ്രതിഷേധത്തിന് തയ്യാറാകണമെന്നും അദ്ദേഹം അറിയിച്ചു.
എൻജിഒ അസോസിയേഷൻ സംസ്ഥാന പ്രസിഡൻറ് ചവറ ജയകുമാർ
അധ്യക്ഷത വഹിച്ചു. എ എം ജാഫർഖാൻ, ജെ. എഡിസൺ, വി .എൽ. രാജേഷ് കമൽ, ആർ.എസ്. പ്രശാന്ത് കുമാർ, വി.എസ് .രാകേഷ് , എം എസ് അജിത് കുമാർ , പി ജി പ്രദീപ് അരുൺദാസ് എന്നിവർ സംസാരിച്ചു

Advertisement

inner ad