തിരുവനന്തപുരം: സംസ്ഥാന ജീവനക്കാർക്ക് ശമ്പളം പിൻവലിക്കാൻ കഴിയാത്ത വിധം ട്രഷറിയിൽ തകരാറുണ്ടായത് വൻ പ്രതിഷേധത്തിന് വഴിവെച്ചു. അക്കൗണ്ടിൽനിന്നു തുക പിൻവലിക്കാനാകാതെ ആയിരക്കണക്കിന് ജീവനക്കാരാണ് വലഞ്ഞത്. ട്രഷറി സേവിങ്സ് ബാങ്ക് ഓൺലൈൻ സംവിധാനത്തിലൂടെയാണ് ജീവനക്കാരുടെ ശമ്പളം കൈമാറുന്നത്. ശമ്പളം ട്രഷറി അക്കൗണ്ടിലേക്കാണ് ആദ്യം എത്തുന്നത്. അവിടെനിന്നാണു ബാങ്കിലേക്ക് പോകുന്നത്. ശമ്പളം പാസായതായി കാണിക്കുന്നുണ്ടെങ്കിലും പണം മറ്റ് അക്കൗണ്ടുകളിലേക്ക് മാറ്റാൻ സാധിക്കുന്നില്ലെന്ന് ജീവനക്കാർ പരാതിപ്പെട്ടു. അതേസമയം, തകരാർ പരിഹരിക്കാനുള്ള ശ്രമം നടക്കുന്നുണ്ടെന്ന് പറഞ്ഞ് ട്രഷറി ഡയറക്ടർ കൈകഴുകാൻ ശ്രമിച്ചത് പ്രതിഷേധത്തിന് കാരണമായി.
ജീവനക്കാർക്കും പെൻഷൻകാർക്കും ശമ്പളവും പെൻഷൻ തുകയും വിതരണം ചെയ്യാനാകാത്തത് സർക്കാരിൻ്റെ കെടുകാര്യസ്ഥതയുടെയും ധനകാര്യ മിസ് മാനേജ്മെൻ്റിൻ്റെയും ദുരന്തഫലമാണെന്ന്  സെക്രട്ടേറിയറ്റ് ആക്ഷൻ കൗൺസിൽ കൺവീനർ എം.എസ് ഇർഷാദ് ചൂണ്ടിക്കാട്ടി. ആദ്യ പ്രവൃത്തി ദിവസം ശമ്പളം ലഭിക്കേണ്ട ജീവനക്കാരിൽ മിക്കവാറും പേർക്ക് ശമ്പളം ലഭിച്ചില്ല. ശമ്പളവും പെൻഷനും അക്കൗണ്ടിൽ കാണാം, പക്ഷെ കയ്യിൽ കിട്ടില്ലെന്ന വിചിത്രമായ അവസ്ഥയാണ് കേരളത്തിൽ.
സെക്രട്ടേറിയറ്റിൽ ബഹുഭൂരിപക്ഷം ജീവനക്കാർക്കും ശമ്പളം ഏറെ വൈകിയിട്ടും ലഭ്യമായിട്ടില്ല. ഇ-ടിഎസ്ബിയിൽ നിന്നും ബാങ്ക് അക്കൗണ്ട് വഴിയും ശമ്പളവും പെൻഷനും വിതരണം നടന്നിട്ടില്ല. ടിഎസ്ബി അക്കൗണ്ടുള്ള ജീവനക്കാർക്കും പെൻഷൻകാർക്കും മാത്രമാണ് ശമ്പളവും പെൻഷനും ലഭിച്ചത്. ഇവരുടെ എണ്ണം പരിമിതമാണ്. സർക്കാർ സർവീസിനെ കെഎസ്ആർടിസിയുടെ ഗണത്തിൽ പെടുത്തി ശമ്പളവും പെൻഷനും യഥാസമയം നൽകാതിരിക്കാനുള്ള ശ്രമമാണ് നടക്കുന്നതെന്ന് അദ്ദേഹം ആരോപിച്ചു.
ധൂർത്തിനും ആഡംബരത്തിനും നിർലോഭം പണം ചെലവഴിക്കുന്ന സർക്കാർ,  ശമ്പളവും പെൻഷനും നൽകാതെ ജീവനക്കാരെയും പെൻഷൻകാരെയും ശ്വാസം മുട്ടിക്കുകയാണെന്ന് സെക്രട്ടേറിയറ്റ് അസോസിയേഷൻ ജനറൽ സെക്രട്ടറി കെ ബിനോദ്, കേരള ഫൈനാൻസ് സെക്രട്ടേറിയറ്റ് അസോസിയേഷൻ പ്രസിഡൻ്റ് എസ് പ്രദീപ്കുമാർ, ജനറൽ സെക്രട്ടറി തിബീൻ നീലാംബരൻ, കേരള ലാ സെക്രട്ടേറിയറ്റ് അസോസിയേഷൻ പ്രസിഡൻ്റ് കുമാരി അജിത പി, ജനറൽ സെക്രട്ടറി മോഹനചന്ദ്രൻ എം എസ്, കേരള ലെജിസ്ലേച്ചർ സെക്രട്ടേറിയറ്റ് എംപ്ലോയീസ് ഓർഗനൈസേഷൻ പ്രസിഡൻ്റ് ഷിബു ജോസഫ്, ജനറൽ സെക്രട്ടറി വിഎ ബിനു എന്നിവർ അഭിപ്രായപ്പെട്ടു.
അതേസമയം, 14 ദിവസമായി ട്രഷറി 3700 കോടിയുടെ ഓവർ ഡ്രാഫ്റ്റിലായിരുന്നു. കേന്ദ്ര നികുതി വിഹിതമായി 2300 കോടിയും ഐജിഎസ്ടി സെറ്റിൽമെന്റിന്റെ ഭാഗമായി 1700 കോടിയും സർക്കാരിന് ഇന്നലെ ലഭിച്ചതോടെ ശമ്പളവും പെൻഷനും മുടങ്ങില്ലെന്നായിരുന്നു വിലയിരുത്തൽ. എന്നാൽ, കേന്ദ്രഫണ്ട് കിട്ടിയിട്ടും ജീവനക്കാർക്ക് പണം മാറിയെടുക്കാൻ കഴിയാത്ത സ്ഥിതിയായി.