ഞങ്ങൾക്കു  വഴിയിലിറങ്ങാൻ കഴിയാത്ത സ്ഥിതിയാ മാഷേ. ആരു കണ്ടാലും പറയും, സാറു വരുന്നെടാ ഓടിക്കോ എന്ന്. ജില്ലയിലെ ഒരു പ്രൈമറി സ്കൂൾ ഹെഡ്മാസ്റ്ററുടെ വാക്കുകളാണിത്. പേരു പറയരുതെന്നു പറഞ്ഞതു കൊണ്ടാണ് പറയാത്തത്. പക്ഷേ, ജില്ലയിലെ മിക്ക അധ്യാപകരും ഇതു തന്നെയാവും പറയുക. അത്രയ്ക്കു പിരിമുറുക്കത്തിലാണ് അവരെല്ലാം. സ്കൂളുകളിലെ ഉച്ച ഭക്ഷണ വിതരണത്തിലെ സാമ്പത്തിക ബാധ്യതയാണ് അവരെ നാട്ടുകാരുടെ നോട്ടപ്പുള്ളിയാക്കുന്നത്. കുട്ടിയൊന്നിന് എട്ടു രൂപ നിരക്കിൽ ചോറ്, കറി, 300 ലിറ്റർ പാൽ, മുട്ട എന്നിവ നൽകുന്ന മാന്ത്രിക വിദ്യ വശമില്ലാത്തവരാണ് നെട്ടോട്ടമോടുന്നത്. പലരും സ്വന്തം പോക്കറ്റിൽ നിന്ന് അധിക ചെലവിനുള്ള പണം കണ്ടെത്തും. മറ്റു ചിലർ സുഹൃത്തുക്കളെ സമീപിക്കും. ഇതിനൊന്നും കഴിയാത്തവരാണ് പിരിവിനിറങ്ങുന്നത്. അവരെയാണ് നാട്ടുകാർക്കു പേ‌ടി.
150 കുട്ടികൾ വരെയുള്ളവർക്കാണ് 8 രൂപ വിഹിതം കിട്ടുന്നത്. കുട്ടികൾ കൂടിയാൽ വിഹിതം കുറയും. 151-500 പേർക്ക് 7 രൂപയും 501 ൽ കൂടുതലുള്ളവർക്ക് 6 രൂപയുമാണ് സർക്കാർ വിഹിതം. അരി, പാചക തൊഴിലാളികൾക്കുള്ള ശമ്പളം എന്നിവ സർക്കാർ സൗജന്യമായി നൽകും. പാൽ, മുട്ട, പച്ചക്കറി, സിലിണ്ടർ, അധിക ജീവനക്കാരുടെ ശമ്പളം എന്നിവയുടെ ചെലവ് പ്രധാന അധ്യാപകർ കണ്ടെത്തണം. ഈ ഇനത്തിലെല്ലാം കൂടി പ്രതിമാസം 50,000 രൂപ വരെ ചെലവു വരുമെന്ന് ഒരണ്ടയിരത്തിലധികം കുട്ടികൾ പഠിക്കുന്ന സ്കൂളിന്റെ എച്ച്എം പറഞ്ഞു. പ്രീ പ്രൈമറി മുതൽ എട്ടാം ക്ലാസ് വരെയുള്ളവർക്കാണ് സൗജന്യ ഉച്ചഭക്ഷണം നൽകുന്നത്. വിഹിതത്തിന്റെ 60 ശതമാനം കേന്ദ്ര സർക്കാരാണു വഹിക്കുന്നത്. സംസ്ഥാന വിഹിതം 40 ശതമാനം. കൃത്യമായ കണക്ക് കൊടുക്കാത്തതിനാൽ കേന്ദ്ര വിഹിതം കൃത്യമായി കിട്ടാറില്ല. അതുകൊണ്ട് സംസ്ഥാന സർക്കാരും വിഹിതം നൽകുന്നില്ല. ലക്ഷക്കണക്കിനു രൂപയാണ് പല സ്കൂളുകൾക്കും ഈ ഇനത്തിൽ കിട്ടാനുള്ളത്.
2016ൽ ഉമ്മൻ ചാണ്ടി സർക്കാർ അധികാരം ഒഴിയുമ്പോൾ പുതുക്കി നിശ്ചയിച്ച തുകയാണ് ഇപ്പോഴുമുള്ളത്. ഈ തുക വർധിപ്പിക്കണമെന്ന് അധ്യാപക രക്ഷാകർതൃ സംഘടനകൾ ആവശ്യപ്പെടാൻ തുടങ്ങിയിട്ട് വർഷങ്ങളായി. ഇവരുടെയൊക്കെ തലയ്ക്കു മീതേ പറക്കാൻ കോടികൾ ചെലവാക്കി ഹെലികോപ്റ്റർ വാടകയ്ക്കെടുക്കുന്ന സംസ്ഥാന സർക്കാരിന് സ്കൂളുകളിൽ ഉച്ചഭക്ഷണം വിളമ്പാൻ പണമില്ല.
ഉച്ചഭക്ഷണത്തിനു വക കണ്ടെത്താൻ ബുദ്ധിമുട്ടുന്നതിനിടെയാണ് പുതിയ പിരിവിനുള്ള ഉത്തരവ് കിട്ടിയത്. അടുത്ത മാസം ന‌ടക്കാനിരിക്കുന്ന ജില്ലാ സ്കൂൾ യുവജനോത്സവം, കായിക മേള, ശാസ്ത്ര മേള എന്നിവയുടെ നടത്തിപ്പിന് കുട്ടികളിൽ നിന്നു പണം കണ്ടെത്തണമെന്നാണ് വിദ്യാഭ്യാസ ഡെപ്യൂട്ടി ഡയറക്റ്ററുടെ നിർദേശം. ഒന്നു മുതൽ പ്ലസ് ടു വരെയുള്ള കുട്ടികൾ മേളകളിൽ പങ്കെടുക്കുമെങ്കിലും എട്ട്, ഒൻപത് ക്ലാസുകളിലെ കുട്ടികളിൽ നിന്ന് 40 രൂപ വീതം പിരിച്ചെടുക്കാനാണ് നിർദേശം.
ഹയർ സെക്കൻഡറി വിദ്യാർഥികൾക്ക് പിരിവില്ലെങ്കിലും പ്രിൻസിപ്പാൾമാർ 500 രൂപ വീതവും അധ്യാപകരും അനധ്യാപകരും 350 രൂപ വീതവും പിരിവ് നൽകണം. ഹൈസ്കൂൾ ഹെഡ്മാസ്റ്റർ 400 രൂപ, അധ്യാപകർ, എൽപി, യുപി ഹെഡ്മാസ്റ്റർമാർ എന്നിവർ 250 രൂപ, പ്രൈമറി സ്കൂൾ അധ്യാപകർ 150 രൂപ, ബിപിസി  ട്രെയ്നർമാർ 250 രൂപ എന്ന നിരക്കിലും സംഭാവന നൽകണം.
നവംബർ 21 മുതൽ 24 വരെ ഇളമ്പള്ളൂർ എസ്എൻഎസ്എം എച്ച്എച്ച്എസിലാണ് സ്കൂൾ യുവജനോത്സവം. ഒക്റ്റോബർ 4-7 തീയതികളിൽ കല്ലുവാതുക്കൽ പഞ്ചായത്ത് സ്കൂളിൽ കായിക മേളയും നടക്കും.
അടുത്ത വർഷം ജനുവരിയിൽ കൊല്ലത്താണ് സംസ്ഥാന സ്കൂൾ യുവജനോത്സവം. അതിനും ഭീമമായ തുക വേണ്ടി വരും. അതിന്റെ പിരിവു കൂടി തങ്ങളുടെ തലയിലാവുമോ എന്നാണ് അധ്യാപകരുടെ പേടി.