നിസാർ മുഹമ്മദ്

തിരുവനന്തപുരം: ഏഴുവർഷത്തിനിടെ ശ്വസിക്കുന്ന വായുവിന് ഒഴികെ മറ്റെല്ലാത്തിനും വിലകൂട്ടി കേരള ജനതയെ ദുരിതത്തിലാക്കിയ പിണറായി സർക്കാർ സപ്ലൈകോയിൽ സബ്സിഡിയുള്ള 13 അവശ്യ സാധനങ്ങളുടെ വില കൂട്ടുന്നു. ചെറുപയർ, ഉഴുന്ന്, വൻകടല, വൻപയർ, തുവരപ്പരിപ്പ്, മുളക്, മല്ലി, പഞ്ചസാര, വെളിച്ചെണ്ണ, ജയഅരി, കുറുവ അരി, മട്ട അരി, പച്ചരി എന്നിവയ്ക്കാണ് വില കൂടുന്നത്. വിപണിയിലെ വില നിയന്ത്രകർ ആകേണ്ട സപ്ലൈകോ തന്നെ വില കൂട്ടാനൊരുങ്ങുന്നതു പൊതുജനങ്ങൾക്ക് കനത്ത പ്രഹരമാണ് ഏൽപ്പിക്കുക. ഇന്നലെ ചേർന്ന ഇടതുമുന്നണി യോഗമാണ് വിലവർധനയ്ക്ക് ശുപാർശ ചെയ്തത്. തീരുമാനമെടുക്കാനായി ഭക്ഷ്യമന്ത്രി ജി.ആർ അനിലിനെ ചുമതലപ്പെടുത്തി. ഏറ്റവുമടുത്ത ദിവസം തന്നെ വിലവർധന പ്രാബല്യത്തിൽ വരുത്താനാണ് തീരുമാനം. സബ്‌സിഡിയുള്ള സാധനങ്ങൾക്കായാണ് കൂടുതൽ പേരും സപ്ലൈകോയെ ആശ്രയിക്കുന്നത്. ഇവ വാങ്ങാനെത്തുമ്പോൾ സബ്‌സിഡി ഇല്ലാത്ത സാധനങ്ങളും വാങ്ങുമെന്നതാണ് സപ്ലൈകോയുടെ വരുമാനം നിലനിർത്താൻ സഹായിക്കുന്നത്.

Advertisement

inner ad

അവശ്യ സാധനങ്ങളുടെ വില കൂട്ടില്ലെന്ന് പ്രകടന പത്രികയിൽ വാഗ്ദാനം ചെയ്ത് അധികാരത്തിലേറിയ ഇടതുമുന്നണി സർക്കാർ നികുതി വർധന, വൈദ്യുതി ചാർജ് വർധന, വെള്ളക്കരം വർധന, വിവിധ സേവന നിരക്കുകളിലെ വർധന തുടങ്ങി ഏറ്റവുമൊടുവിൽ അവശ്യസാധനങ്ങളുടെ വിലവർധനവും നടത്തി ജനദ്രോഹ ഭരണം നടത്തുന്നതിനെതിരെ വ്യാപക പ്രതിഷേധമാണ് ഉയരുന്നത്. മുഖ്യമന്ത്രിയും മന്ത്രിമാരും ധൂർത്തടിച്ച് ഖജനാവ് കാലിയാക്കിയതിന്റെ ഭാരം ജനങ്ങളുടെ ചുമലിലേറ്റുന്നതിന്റെ ഏറ്റവും പുതിയ തെളിവായാണ് സപ്ലൈകോയിലെ വിലക്കയറ്റത്തെ പ്രതിപക്ഷം ചൂണ്ടിക്കാണിക്കുന്നത്. സപ്ലൈകോയ്ക്ക് 1525.34 കോടി രൂപയാണ് സർക്കാർ നൽകാനുണ്ടായിരുന്നത്. പണം കിട്ടാതെ ഇനി സാധനങ്ങൾ നൽകില്ലെന്ന് കരാറുകാർ സർക്കാരിനെ അറിയിക്കുകയും ചെയ്തു. ഒന്നുകിൽ 500 കോടിയെങ്കിലും കുടിശിക നൽകുക, അല്ലെങ്കിൽ വിലക്കൂട്ടുക എന്നതായിരുന്നു സപ്ലൈകോയുടെ ആവശ്യം. തുടർഭരണം ലക്ഷ്യമിട്ട് ഭക്ഷ്യകിറ്റ് നൽകിയതിന്റെ പോലും പണം സപ്ലൈകോയ്ക്ക് സർക്കാർ നൽകിയിരുന്നില്ല. വിതരണക്കാർ മുൻകൂർ പണം നൽകാതെ സാധനങ്ങൾ നൽകാൻ തയാറല്ലാത്തതിനാൽ സപ്ലൈകോയുടെ 1500ൽപരം വിൽപനകേന്ദ്രങ്ങളിൽ സബ്സിഡി സാധനങ്ങൾ ഉൾപ്പെടെ പലതും സ്റ്റോക്കില്ല. 600 കോടി രൂപയിലേറെ രൂപയാണ് സാധനങ്ങൾ നൽകിയ വിതരണക്കാർക്കു സപ്ലൈകോ നൽകാനുള്ള നിലവിലെ കുടിശിക.
വിലക്കൂട്ടാതെ മുന്നോട്ടുപോകാനാവില്ലെന്ന് കഴിഞ്ഞ ദിവസം ഭക്ഷ്യമന്ത്രി ജിആർ അനിൽ മന്ത്രിസഭാ യോഗത്തിൽ മുന്നറിയിപ്പ് നൽകുകയും ഇന്നലെ ഇടതുമുന്നണി യോഗത്തിൽ പങ്കെടുത്ത് പ്രതിസന്ധി വിശദീകരിക്കുകയും ചെയ്തിരുന്നു. തുടർന്നായിരുന്നു വിലവർധനയ്ക്ക് എൽഡിഎഫ് പച്ചക്കൊടി വീശിയത്. കഴിഞ്ഞ ഏഴുവർഷമായി വില വർധിപ്പിച്ചിട്ടില്ലെന്ന ന്യായീകരണം ജനങ്ങളിലേക്ക് പ്രചരിപ്പിക്കാനും യോഗത്തിൽ തീരുമാനമായി.

അതേസമയം, സാധനങ്ങൾ സ്റ്റോക്കില്ലാതായതോടെ സപ്ലൈകോ വിൽപനശാലകളിലൂടെ 9 മുതൽ 10 കോടി രൂപ പ്രതിദിന വരുമാനം ലഭിച്ചിരുന്നത് ഇപ്പോൾ 4 കോടി രൂപയിൽ താഴെയായി. കഴിഞ്ഞ ഓണക്കാലത്ത് സ്പോൺസേർഡ് രീതിയിൽ പ്രത്യേക ഓണച്ചന്തകൾ നടത്തിയപ്പോൾ മാത്രമാണു വരുമാനം ഉയർന്നത്. റേഷൻ കാർഡുകൾ ഹാജരാക്കുന്നതിന്റെ അടിസ്ഥാനത്തിൽ പ്രതിമാസം 35 മുതൽ 45 ലക്ഷം പേരാണ് നേരത്തെ സബ്സിഡി സാധനങ്ങൾ വാങ്ങിയിരുന്നത്.
അതേസമയം, ലോക്‌സഭാ തിരഞ്ഞെടുപ്പ് അടുത്തിരിക്കുന്ന സാഹചര്യത്തിൽ വില കൂട്ടാനുള്ള സപ്ലൈകോ സാധനങ്ങളുടെ വില കൂട്ടില്ലെന്ന് അഭ്യൂഹമുയർന്നിരുന്നുവെങ്കിലും തിരഞ്ഞെടുപ്പ് വിജയത്തിൽ വലിയ പ്രതീക്ഷ വേണ്ടെന്ന വിലയിരുത്തലിന്റെ അടിസ്ഥാനത്തിലാണ് എൽഡിഎഫ് ജനങ്ങളെ ദ്രോഹിക്കുന്ന കടുത്ത തീരുമാനമെടുത്തതെന്നും രാഷ്ട്രീയ നിരീക്ഷകർ ചൂണ്ടിക്കാട്ടുന്നു. പൊതുവിപണിയിൽ സാധനങ്ങളുടെ വില കുതിച്ചുയരുമ്പോൾ സപ്ലൈകോ കൂടി വില ഉയർത്തിയാൽ പൊതുജനങ്ങളെ കൂടുതൽ ദുരിതത്തിലാക്കും. മാസം 35-45 ലക്ഷം പേർ സബ്‌സിഡി സാധനങ്ങൾ വാങ്ങുന്നുണ്ടെന്നാണ് സപ്ലൈകോയുടെ കണക്ക്.

Advertisement

inner ad