കൊല്ലം: ചീഫ് സെക്രട്ടറി റാങ്കിൽ ഡൽഹിയിൽ കേരളത്തിന്റെ പ്രത്യേക പ്രതിനിധിയായി രണ്ടു വർഷം പ്രവർത്തിച്ച നയതന്ത്രജ്ഞൻ വേണു രാജാമണി തൽസ്ഥാനം രാജിവച്ചു. ഈ മാസം 16നു കാലാവധി അവസാനിച്ച രാജാമണിക്ക് രണ്ടാഴ്ചത്തേക്കു കൂടി സേവനം നീട്ടി നൽകിയെങ്കിലും പ്രൊഫ. കെ.വി. തോമസുമായുള്ള ഭിന്നതയെ തുടർന്ന് അധിക കാലാവധി നിരസിക്കുകയായിരുന്നു. രണ്ടു വർഷത്തെ സേവന കാലത്ത് അദ്ദേഹം സംസ്ഥാനത്തിനു വേണ്ടി എന്തു ചെയ്തു എന്ന വിവരാവകാശ ചോദ്യത്തിന് അറിയില്ല എന്ന മറുപടിയാണ് നോർക്ക വകുപ്പും ഡൽഹി നോർക്ക സെല്ലും നൽകിയത്. ചുരുക്കത്തിൽ രാജാമണി, രണ്ട് ഉദ്യോ​ഗസ്ഥർ, ഡ്രൈവർ, പ്യൂൺ എന്നിവര‌ക്കം അദ്ദേഹത്തിന്റെ ഓഫീസിലെ ജീവനക്കാരുടെ ശമ്പളത്തിനും മറ്റ് ആവശ്യങ്ങൾക്കുമായി രണ്ടു കോടി രൂപയാണ് സംസ്ഥാന ഖജനാവിന് ചെലവായത്. മുഖ്യമന്ത്രിയുടെ വിദേശ യാത്രകൾക്കു വേണ്ട ഒത്താശ ചെയ്യുകയും കേന്ദ്രാനുമതി വാങ്ങുകയും ചെയ്തു എന്നാണ് രാജാമണി നൽകുന്ന സ്വകാര്യ വിശദീകരണം. എന്നാൽ ദുബായ് ഇൻവെസ്റ്റേഴ്സ് മീറ്റിലെ യാത്രയ്ക്ക് വിദേശ മന്ത്രാലയം അനുമതി നിഷേധിച്ചതു മുതൽ മുഖ്യമന്ത്രി രാജാമണിയുമായി നല്ല ബന്ധത്തിലല്ല. തുടർന്നാണ് രാജാമണിയുടെ ഓഫീസ് അടക്കം അനുവദിച്ച് പ്രൊഫ. കെ.വി. തോമസിനെ ക്യാബിനറ്റ് റാങ്കിൽ പ്രത്യേക പ്രതിനിധിയായി നിയമിച്ചത്. അതുകൊണ്ടും ഇതുവരെ സംസ്ഥാനത്തിന് ഒരു ​ഗുണവും കിട്ടിയില്ല. ലാവലിൻ കേസിൽ മുഖ്യമന്ത്രിക്ക് അനുകൂല നലപാടുകൾ സ്വീകരിക്കാൻ സിബിഐക്കു മേൽ സമ്മർദം ചെലുത്തുകയാണ് തോമസിന്റെ പ്രധാന ജോലി.
തോമസിനും പ്രതിമാസം ഒരു ലക്ഷം രൂപ ശമ്പളമുണ്ട്. രാജാണിയെക്കാൾ കൂടുതൽ സൗകര്യങ്ങളും.
അതിനിടെ തിരുവനന്തപുരത്ത് രണ്ടരക്കോടിയിലേറെ രൂപ ചെലവിട്ട് മന്ത്രിമാരുടെ സുരക്ഷ വർധിപ്പിച്ചു. സെക്രട്ടറിയേറ്റ് അനക്‌സ് രണ്ടിലെ ഓഫിസുകൾ മോടിപിടിപ്പിക്കുന്ന ജോലി പുരോ​ഗമിക്കുന്നു. ഇതിനായി 2.53 കോടി രൂപ അനുവദിച്ച് പൊതുഭരണവകുപ്പ് ഉത്തരവിറക്കി. കൊച്ചിയിലെ സ്വകാര്യസ്ഥാപനമാണ് മന്ത്രിമാരുടെ ഓഫീസിൽ ക്യാമറകളും മെറ്റൽ ഡിറ്റക്‌ടറുകളും സ്ഥാപിച്ചത്. ഏഴ് മെറ്റൽ ഡിറ്റക്‌ടറും 101 സിസിടിവി ക്യാമറകളുമാണ് അനക്‌സ് രണ്ട് പരിസരത്ത് സ്ഥാപിച്ചിരിക്കുന്നത്.
വൈകാതെ മന്ത്രിസഭ പുനഃസംഘടന വരുന്ന സാഹചര്യത്തിൽ ഓഫീസ് നവീകരണത്തിന് ഇനിയും തുക വേണ്ടി വരുമെന്നാണ് പ്രതീക്ഷിക്കുന്നത്.