കൊല്ലം ബ്ലോക്ക് കോൺഗ്രസ് കമ്മിറ്റിയുടെ ആഭിമുഖ്യത്തിൽ കഴിഞ്ഞ വെള്ളിയാഴ്ച കൊല്ലത്ത് ഒരു സമരം നടന്നു. അഷ്ടമുടിക്കായലിനു കുറുകേ കെഎസ്ആർടിസി ബസ് സ്റ്റേഷനു സമീപത്തുനിന്ന് തുടങ്ങുന്ന മേൽപ്പാലം ഉദ്ഘാടനം ചെയ്യാത്തതിൽ പ്രതിഷേധിച്ചായിരുന്നു സമരം. പ്രതിഷേധക്കാർ കയറ്‍ കെട്ടി പ്രതീകാത്മക ഉദ്ഘാടനം നിർവഹിക്കുകയും ചെയ്തു.

നൂറുകണക്കിന് കോൺഗ്രസുകാരും അനുഭാവികളും സമരത്തിൽ പങ്കെടുത്തു. പക്ഷേ, ഈ പാലം ഇനിയും ഔദ്യോഗികമായി തുറന്നിട്ടില്ല. എന്നു തുറക്കുമെന്ന് ആർക്കും അറിയുകയുമില്ല. അഥവാ തുറന്നിട്ടു വലിയ കാര്യവുമില്ല. ആസൂത്രണത്തിൽ അത്രയ്ക്ക് ആനമണ്ടത്തരമാണ് അധികൃതർ കാണിച്ചിരിക്കുന്നത്. കെഎസ് ആർടിസിയിൽ നിന്നു തുടങ്ങി, കായൽ മധ്യത്തിലേക്കു തുറന്നിട്ട നിലയിലാണിപ്പോൾ പദ്ധതിയുടെ ഫെയ്സ് 3 നിർമാണം.
സാധാരണ നിലയിൽ നദികൾക്കും ജലാശയങ്ങൾക്കും കുറുകേ, ഇരുകരകളെയും ബന്ധിപ്പിക്കാനാണ് പാലങ്ങൾ പണിയുന്നത്. എന്നാൽ അഷ്ടമുടിക്കായലിൽ നിർമിച്ചിച്ചിരുക്കുന്നത് തേവള്ളി പാലം പോലൊരു പാലമല്ല. അഷ്ടമുടി വള്ളം കളി നടക്കുന്ന വിശാലമായ നെട്ടായത്തിനു മേൽക്കൂരയായി, ബസ് സ്റ്റാൻഡ് മുതൽ തേവള്ളി വരെ നീണ്ട് ഒരു കിലോമീറ്ററോളം നീളത്തിലുള്ള ഫ്ലൈ ഓവറാണത്. കായലിന്റെ സ്വാഭാവിക ആവാസ വ്യവസ്ഥയെപ്പോലും തട‌സപ്പെടുത്തി, 102 കോടിയിൽപ്പരം രൂപ മുടക്കി ഇങ്ങനെയൊരു മേൽപ്പാലം ആസൂത്രണ വിഴ്ചയുടെ മകുടോദാഹരണം കൂടിയാണ്.

Advertisement

inner ad

കാവനാട് ആൽത്തറ ജംക്ഷൻ മുതൽ മേവറം വരെ നീളുന്ന കൊല്ലം ബൈപാസ് പദ്ധതിക്ക് അനുമതിയും നിർമാണവും തുടങ്ങിയ ശേഷമാണ് ആശ്രാമം റിംഗ് റോഡിനെക്കുറിച്ച് ആലോചിക്കുന്നത്. അതിന്റെ ഭാഗമാണ് അഷ്ടമുടി ഫ്ലൈ ഓവർ. കൊല്ലം- തേനി ദേശീയ പാതയും അന്നേ പരിഗണിക്കപ്പെട്ടിരുന്നു. ആ നിലയ്ക്ക് ഹൈസ്കൂൾ ജംഗ്ഷനിൽ നിന്ന് കഷ്ടിച്ച് 100 മീറ്റർ പോലും അകലെയല്ലാത്ത തേവള്ളിയിൽ പുതിയൊരു ജംഗ്ഷൻ രൂപപ്പെടാൻ ഇടയാക്കുന്നതാണ് നിർദിഷ്‌ട ആശ്രാമം- തോപ്പിൽ കടവ് റിംഗ് റോഡ്. പണി പാതി ആയപ്പോഴാണ് അധികൃതർക്ക് ഈ ബോധോദയമുണ്ടായത്.
തേവള്ളിയിൽ ജഡ്ജസ് അവന്യൂവിനോടും പഴയ എസ്പി റസിഡൻസിയോടു ചേർന്നുമാണ് ആദ്യം ബൈപാസ് വിഭാവന ചെയ്തത്. എന്നാൽ തേവള്ളി പാലത്തിനും ഹൈസ്കൂൾ ജംഗ്ഷനുമിടയിൽ പുതിയൊരു ജംഗ്ഷൻ കൂടി രൂപപ്പെടുമെന്ന കാരണത്താൽ റോഡിന്റെ അലൈൻമെന്റ് മാറ്റി. അതു തകൂനിന്മേൽ കുരുവാകുകയും ചെയ്തു. അലൈൻമെന്റ് മാറ്റിയാൽ പുതിയ റോഡ് തേവള്ളി പാലത്തിന്റെ അടിയിൽ കൂടി വേണം പോകാൻ. അവിടെ ഒരു പാലം പണിതാൽ ജലനിരപ്പിനു മുകളിലൂടെ ബസ് അടക്കമുള്ള വലിയ വാഹനങ്ങൾക്കു പോകാൻ കഴിയാതെ വരും. അല്ലെങ്കിൽ തേവള്ളിപ്പാലത്തിന്റെ ഉയരം കൂട്ടണം. രണ്ടു സാഹചര്യത്തിലും ചെലവേറുമെന്നതിനാൽ കിഫ്ബിയിൽ നിന്നു സാമ്പത്തിക സഹായം കിട്ടുക എളുപ്പമല്ല. കെആർഎഫ്ബിക്കാണ് ഫേസ് നാലിന്റെ നിർമാണ ചുമതല. ഇതിന് ഇതുവരെ കരാറായിട്ടുമില്ല.
102 കോടി രൂപ ചെലവിൽ പൂർത്തിയാക്കിയ മൂന്നാമത്തെ ഫെയ്സാണ് ഓലയിൽ കടവ് വരെയുള്ള റീച്ച്. ഇതിന്റെ പണി പൂർത്തിയായി. കൊല്ലത്തെ ഇരുമ്പ് പാലത്തിൽ ഗതാഗതക്കുരുക്ക് രൂക്ഷമായപ്പോഴാണ് ബദലെന്ന നിലയിൽ നിർദിഷ്ട മേൽപ്പാലത്തെക്കുറിച്ച് ആലോചിച്ചത്. എന്നാൽ ഇരുമ്പ് പാലം പുതുക്കി പണിതതോടെ ഇവിടെ ഇപ്പോൾ ഗതാഗതക്കുരുക്കില്ല.
ബസ് സ്റ്റാൻഡിൽ നിന്നു തുടങ്ങി, തേവള്ളിവഴി തോപ്പിൽ കടവിലേക്ക് ഒരു തീരദേശ റിംഗ് റോഡ് നിർമിച്ചിരുന്നെങ്കിൽ നഗരവാസികൾക്ക് സ്വന്തം വീട്ടുപടിക്കൽ വാഹനങ്ങളെത്തുന്ന സ്ഥിതി ഉണ്ടാകുമായിരുന്നു എന്ന് ബ്ലോക്ക് പ്രസിഡന്റ് ഗീതാകൃഷ്ണൻ പറഞ്ഞു. എന്നാലിപ്പോൾ കടലിൽ കായം കലക്കിയതുപോലായി അഷ്ടമുടി കായലിന്റെ മേൽപ്പാലം. അതിൽ പ്രകോപിതരായി കോൺഗ്രസ് പ്രവർത്തകർ പാലത്തിനു കുറുകേ വലിച്ചു കെട്ടിയ കയർ മുറിച്ച് ഉദ്ഘാടനം ചെയ്തു. അതിവഴി ചെറിയ വാഹനങ്ങൾ കടത്തിവിടാനുള്ള പ്രവർത്തകരുടെ ശ്രമം പൊലീസ് ത‌ടസപ്പെടുത്തി.