കണ്ണൂർ സർവ്വകലാശാല യൂണിയൻ നാളെ മുതൽ സംഘടിപ്പിക്കാനിരുന്ന ലിറ്റ് റേച്ചർ ഫെസ്റ്റിവെൽ ബഹിഷ്കരിക്കാൻ തീരുമാനിച്ചതായി കെ.എസ്.യു സംസ്ഥാന പ്രസിഡൻ്റ് അലോഷ്യസ് സേവ്യർ അറിയിച്ചു.കണ്ണൂർ ഗവ: ഐ.ടി.ഐയിൽ കെ.എസ്.യു സംസ്ഥാന – ജില്ലാ നേതാക്കളെയും, യൂണിറ്റ് പ്രസിഡൻ്റിനെയും ക്രൂരമായി മർദ്ദിച്ച പശ്ചാത്തലത്തിലാണ് തീരുമാനം. സംസ്ഥാന പ്രസിഡൻ്റ് ഉൾപ്പടെയുള്ളവർ പരിപാടിയിൽ പങ്കെടുക്കില്ല. അതേ സമയം നാളെ ( 12-12-2024, വ്യാഴം) കണ്ണൂരിൽ എത്തുന്ന കെ.എസ്.യു സംസ്ഥാന പ്രസിഡൻ്റ് മർദ്ദനമേറ്റ നേതാക്കളെ സന്ദർശിക്കും.സംസ്ഥാന വ്യാപകമായി ക്യാമ്പസ് തല പ്രതിഷേധത്തിനും സംസ്ഥാന കമ്മിറ്റി ആഹ്വാനം ചെയ്തിട്ടുണ്ട്.കണ്ണൂർ ഐടിഐയിൽ ഇന്ന് നടന്ന എസ്എഫ്ഐയുടെ നേതൃത്വത്തിലുള്ള അതിദാരുണമായ അക്രമ സംഭവങ്ങളുടെ പശ്ചാത്തലത്തിൽ ഏകാധിപത്യ അക്രമ രാഷ്ട്രീയത്തെ പിന്തുടരുന്ന ഒരു സംഘടനയുടെയും സംഘത്തിന്റെയും വേദികളിൽ പങ്കെടുക്കേണ്ടതില്ല എന്നതിൻ്റെ അടിസ്ഥാനത്തിലാണ് ബഹിഷ്കരണമെന്ന് കെ.എസ്.യു സംസ്ഥാന പ്രസിഡൻ്റ് പറഞ്ഞു.

വയനാട്: കന്നുകാലി, മൃഗ സംരക്ഷണ മേഖലയിലെ സമഗ്ര വികസനവും ക്ഷീര കര്‍ഷകരുടെ ഉല്‍പാദനക്ഷമതയും ലക്ഷ്യമിട്ട് നടത്തുന്ന ഗ്ലോബൽ ലൈവ്സ്റ്റോക്ക് കോൺക്ലേവ് ഈ മാസം 20 മുതല്‍ പൂക്കോട് കേരള വെറ്റിനറി സര്‍വകലാശാലയില്‍ ആരംഭിക്കും. കോണ്‍ക്ലേവിന്റെ ഉദ്ഘാടനം 21ന് മന്ത്രി ജെ ചിഞ്ചുറാണി നിര്‍വഹിക്കും. ടി സിദ്ധിഖ് എംഎല്‍എ അധ്യക്ഷത വഹിക്കുന്ന ചടങ്ങില്‍ സര്‍വകലാശാല ഭരണസമിതി അംഗങ്ങളായ കെ എം സച്ചിന്‍ദേവ് എംഎല്‍എ, ഇ കെ വിജയൻ എംഎല്‍എ എന്നിവര്‍ മുഖ്യാഥിതികളാകും.കന്നുകാലി, മൃഗ പരിപാലന രംഗത്തെ സമഗ്ര വളര്‍ച്ച ലക്ഷ്യമിട്ടാണ് കോണ്‍ക്ലേവ് സംഘടിപ്പിക്കുന്നത്. കോണ്‍ക്ലേവിന്റെ ഭാഗമായി വളര്‍ത്തുമൃഗങ്ങള്‍, കന്നുകാലികള്‍, ഡയറി ഫാമിങ്, അക്വഫാമിങ്, പോള്‍ട്രി, അഗ്രിക്കള്‍ച്ചര്‍ എന്നിവയുടെ സ്റ്റാളുകളാണ് ഒരുക്കുന്നത്. പക്ഷിമൃഗാദികളുടെ ലൈവ് പ്രദര്‍ശനവും വിവിധ എക്സ്പോകളും നടത്തുന്നുണ്ട്. മൃഗ സംരക്ഷണ വകുപ്പിനു കീഴിലുള്ള വിവിധ ഏജന്‍സികളുടെയും സര്‍ക്കാര്‍ ഇതര സ്ഥാപനങ്ങളുടെയും പ്രദര്‍ശന സ്റ്റാളുകള്‍ ഉണ്ടാകും. കന്നുകാലി, ക്ഷീര കാർഷിക മേഖലയുടെ സാധ്യതകൾ, വെല്ലുവിളികൾ, ജനവാസമേഖലയിലും കൃഷിയിടങ്ങളിലുമുള്ള വന്യജീവി ആക്രമണം തടയുന്നതിനുള്ള സാധ്യതകൾ, ക്ഷീര കാർഷിക മേഖലയിലുൾപ്പടെയുള്ള സംരംഭകത്വ ശാക്തീകരണം, സമുദ്ര മത്സ്യബന്ധന മേഖലയുമായി ബന്ധപ്പെട്ട വിഷയങ്ങൾ എന്നിവയിൽ രാജ്യത്തിനകത്തും പുറത്തുമുള്ള വിദഗ്ധർ സെമിനാറുകൾ നയിക്കും.പാല്‍, പാലുല്‍പന്നങ്ങള്‍, മുട്ട, മാംസം തുടങ്ങിയ മൂല്യ വര്‍ധിത വസ്തുക്കളുടെ ഉല്‍പാദനക്ഷമതയും വികാസവും ഉറപ്പുവരുത്തുക, കന്നുകാലി- മൃഗ പരിപാലന മേഖലയില്‍ സ്വയം തൊഴില്‍ സംരംഭങ്ങള്‍ തുടങ്ങുവാന്‍ ആവിശ്യമായ സഹായങ്ങള്‍ നല്‍കുക, പുതിയ തൊഴിലവസരങ്ങള്‍ സൃഷ്ടിക്കുക, ആധുനിക സാങ്കേതിക വിദ്യകളുടെ സഹായത്തോടെ മൃഗസംരക്ഷണം സാധ്യമാക്കുക എന്നിവയാണ് കോണ്‍ക്ലേവിലൂടെ ലക്ഷ്യമിടുന്നതെന്ന് സര്‍വകലാശാല അധികൃതര്‍ വാര്‍ത്താസമ്മേളനത്തില്‍ പറഞ്ഞു.കര്‍ഷകര്‍ക്ക് കന്നുകാലി സംബന്ധമായ രോഗങ്ങളെക്കുറിച്ചും ചികിത്സകളെക്കുറിച്ചുമുള്ള സംശയങ്ങള്‍ക്കും പ്രതിവിധികള്‍ക്കുമായി തത്സമയ കണ്‍സല്‍ട്ടന്‍സി സൗകര്യവും കോണ്‍ക്ലേവിന്റെ ഭാഗമായി ഒരുക്കുന്നുണ്ട്. രാവിലെ 10 മുതൽ വൈകിട്ട് 7 വരെയാണ് പ്രവേശനം. കോണ്‍ക്ലേവ് ഈ മാസം 29ന് സമാപിക്കും.

തൃശ്ശൂര്‍: ആദിവാസി സ്ത്രീയെ കാടിനുള്ളില്‍ മരിച്ചനിലയില്‍ കണ്ടെത്തി. ശാസ്താംപൂവം ആദിവാസി നഗറിലെ കാടര്‍ വീട്ടില്‍ മീനാക്ഷി (71)യെയാണ് കാടിനുള്ളില്‍ മരിച്ചനിലയില്‍ കണ്ടെത്തിയത്. ആനയുടെ ആക്രമണമാണ് മരണകാരണമെന്നാണ് സംശയം. ആനപ്പാന്തം വനത്തിലെ കടുക്കാതോടിനു സമീപമാണ് മുതദേഹം കണ്ടെത്തിയത്. മാനസികാസ്വാസ്ഥമുള്ള മീനാക്ഷി വീട്ടില്‍ നിന്ന് കാട്ടിലേക്ക് പോയതാണെന്ന് കരുതുന്നു.