• നിരീക്ഷകന്‍
  ഗോപിനാഥ് മഠത്തില്‍

രാജ്യത്ത് കോൺഗ്രസ്സിനെ നിശബ്ദമാക്കാനുള്ള ബോധപൂർവ്വമായ പദ്ധതിയുടെ ഒടുവിലത്തെ ഉദാഹരണമാണ് പ്രതിപക്ഷ നേതാവ് വിഡി സതീശനെതിരെയുള്ള വിജിലൻസ് അന്വേഷണം. ഇതിനുവേണ്ടിയുള്ള പല മാതൃകകളും സംസ്ഥാന സർക്കാർ സ്വീകരിക്കുന്നത് കേന്ദ്രഗവൺമെൻറിൽ നിന്നാണ്. പ്രത്യക്ഷത്തിൽ സിപിഎം ബിജെപിയും ബദ്ധവൈരികളായി അഭിനയിക്കുമെങ്കിലും പ്രതലത്തിലെ സമുദ്രതിരമാലകളുടെ കലമ്പലിൻറെ അടിയിലെ ശാന്തതയിൽ ഇവർ പരസ്പരം കെട്ടിപ്പുണരുന്നത് കാണാൻ കഴിയും. ബിജെപി സർക്കാരിൻറെ കടുത്ത വിമർശകനായ രാഹുൽഗാന്ധിയെ യാതൊരുവിധ സാമാന്യനീതി ബോധവും കൂടാതെ ആകാശത്തുനിന്ന് സൃഷ്ടിച്ചെടുത്ത വൃഥാ കാരണങ്ങളുടെ പേരിൽ എം.പി. സ്ഥാനത്ത് നിന്ന് അയോഗ്യനാക്കുകയും ഔദ്യോഗികവസതി ഒഴിപ്പിക്കുകയും ചെയ്തത് സമീപകാല സംഭവങ്ങളാണ്. അതിൻറെ കേരളീയ പതിപ്പാണ് ഇപ്പോൾ വിഡി സതീശനുനേരെ നടക്കുന്ന അന്വേഷണശ്രമങ്ങൾ. ക്ലീൻ ഇമേജോടെ നിന്ന് കേരളസർക്കാരിൻറെ അഴിമതി കഥകൾ ഒന്നൊന്നായി പുറത്തുകൊണ്ടുവരുന്ന സതീശനോടുള്ള പിണറായി സർക്കാരിൻറെ കലിപ്പ് എത്രമാത്രം രൂക്ഷമായിരിക്കുമെന്ന് ഏതൊരാൾക്കും ഊഹിക്കാവുന്നതേയുള്ളൂ. അപ്പോൾ അയാളെ രാഷ്ട്രീയമധ്യത്തിൽ താറടിച്ചുകാണിക്കുക എന്നത് പിണറായി സർക്കാരിൻറെ വൃത്തികെട്ട രാഷ്ട്രീയ ഗിമിക്കായി പരിണമിച്ചു. രാഹുൽഗാന്ധി, മോദി അദാനി ബന്ധത്തിൻറെ സത്യാവസ്ഥയിൽ സ്പർശിച്ചപ്പോഴാണ് ഇയാളെ ഈ സഭയിൽ വച്ചുകൊണ്ടിരിക്കുന്നത് ശരിയല്ലെന്ന് മോദി സർക്കാർ തീരുമാനിച്ചത്. അതുപോലെ കെ.ഫോൺ കേബിളിന് ചൈനയുമായി ബന്ധമുണ്ടെന്നുള്ള പ്രതിപക്ഷനേതാവിൻറെ ആരോപണമാകാം പിണറായി സർക്കാരിനെ ചൊടിപ്പിച്ചിരിക്കുന്നത്. യഥാർത്ഥത്തിൽ പിണറായിക്ക് സതീശനോടുള്ളത് ഇയാഗോയ്ക്ക് കാഷ്വോയോടുള്ള അസൂയ തന്നെ. അഴിമതിയുടെ ചതുപ്പ് നിലങ്ങളിൽ മുങ്ങിക്കുളിച്ച് നിൽക്കുന്ന ഒരാൾക്ക് കരയിൽ നിൽക്കുന്ന അഴിമതിയുടെ കറപുരളാത്ത വ്യക്തിയോടെ തോന്നുന്ന വിദ്വേഷത്തിൻറെ മറ്റൊരു പകർച്ചയാണിത്. നീയും അത്ര വിശുദ്ധനല്ല എന്ന് വരുത്തിത്തീർക്കാനുള്ള നിഗൂഢശ്രമം. അതിന് ചാലക്കുടിയിൽ നിന്ന് ഒരു ബിനാമി പരാതിക്കാരനെ സർക്കാർ കണ്ടെത്തുകയായിരുന്നു. പുനർജ്ജനി ഭവനപദ്ധതിയുടെ പേരിൽ വിദേശ രാജ്യങ്ങളിൽ നിന്ന് പണപ്പിരിവുനടത്തിയതിൽ നിയമലംഘനം ഉണ്ടെന്നായിരുന്നു അയാളുടെ പരാതി. പണപ്പിരിവും സകല വെട്ടിപ്പും കുതന്ത്രങ്ങളും നടത്തി മുന്നേറുന്ന പിണറായി സർക്കാർ തൻറെ അഴിമതിയുടെ മഞ്ഞക്കണ്ണടയിലൂടെ മറ്റെന്തിനെയും മഞ്ഞയായികാണാൻ നടത്തുന്ന കൗതുകമാണ് ഇപ്പോൾ വി.ഡി.സതീശനുനേരെ നടത്തിയിരിക്കുന്നത്.
പിണറായി സർക്കാർ കേരളത്തിൽ അധികാരത്തിൽ ഏറുന്നതുതന്നെ ഉമ്മൻചാണ്ടി എന്ന സംശുദ്ധനായ കോൺഗ്രസ്സുകാരനെതിരെ ഇല്ലാക്കഥകൾ സൃഷ്ടിച്ച് കേസുകൊടുത്ത് നീതിപീഠത്തെ തെറ്റിദ്ധരിപ്പിച്ചുകൊണ്ടാണ്. സ്ത്രീകളെ എന്നും അധികാരത്തിൻറെ തുറപ്പുചീട്ടായി പുരാതനകാലത്തും ആധുനികകാലത്തും അധികാരമോഹികൾ വിദഗ്ധമായി ഉപയോഗിച്ചിട്ടുണ്ട്. സരിതയും സോളാറുമായി ബന്ധപ്പെട്ട് സിപിഎം അടക്കമുള്ള പ്രതിപക്ഷ പാർട്ടികൾ അക്കാലത്ത് സൃഷ്ടിച്ച സമരവേലിയേറ്റങ്ങൾ ജനങ്ങളെ തെറ്റിദ്ധരിപ്പിച്ചതിൻറെ ഫലമായാണ് പിണറായി സർക്കാർ അഴിമതിയുടെ രണ്ടാംഘട്ടം തുടരുന്നതുതന്നെ. തന്നെ പ്രതിയാക്കി പ്രതിപക്ഷം വാദമുഖങ്ങൾ ഉയർത്തുമ്പോഴൊക്കെയും മുൻമുഖ്യമന്ത്രി ഉമ്മൻചാണ്ടിക്ക് ഒന്നേ പറയാനുള്ളൂ, താൻ നിരപരാധിയാണെന്നും സത്യം കാലം തെളിയിക്കുമെന്നും. ഇല്ലാത്ത കുറ്റങ്ങളുടെ പേരിൽ ജനകീയനായ ഉമ്മൻചാണ്ടിയെ തളയ്ക്കാൻ പ്രതിപക്ഷം നടത്തിയ ശ്രമങ്ങൾ ആദ്യം തിരിച്ചറിഞ്ഞത് കോടതിയാണ്. പിന്നെയിപ്പോൾ ചേട്ടൻബാവയും അനിയൻ ബാവയുമായ പിണറായിയും കാനവും ചേർന്ന് പ്രകാശനം ചെയ്ത മുൻ മന്ത്രിയും സി.പി.ഐ നേതാവുമായ സി. ദിവാകരൻറെ ‘കനൽ വഴികളിലൂടെ’ എന്ന ആത്മകഥയും ഉമ്മൻചാണ്ടിയുടെ നിരപരാധിത്വം സാക്ഷ്യപ്പെടുത്തുന്നുണ്ട്. മുൻ ഡി.ജി.പി എ. ഹേമചന്ദ്രൻറെ ‘നീതി എവിടെ’ എന്ന പുസ്തകവും ഇതിന് കൂടുതൽ ബലം പകരുന്നു. ഇവിടെ ഉമ്മൻചാണ്ടി പറഞ്ഞതുപോലെ അദ്ദേഹത്തിൻറെ രാഷ്ട്രീയ വിശുദ്ധത യാതൊരുവിധ ആഹ്ലാദാരവങ്ങളും സൃഷ്ടിക്കാതെ കാലം തെളിയിച്ചുകൊണ്ടിരിക്കുകയാണ്. അദ്ദേഹത്തിന് അൽപ്പകാലമെങ്കിലും കേസ്സിൽ വിനയായിത്തീർന്നത് ഉമ്മൻചാണ്ടി തന്ന ജസ്റ്റിസ് ശിവരാമൻ കമ്മീഷൻറെ വിരുദ്ധ റിപ്പോർട്ടുകളായിരുന്നു. അതേപോലെ ശൂന്യതയിൽ നിന്ന് കേസ്സുകൾ സൃഷ്ടിക്കാനും കുറച്ചുകാലമെങ്കിലും രാഷ്ട്രീയ മാന്യവ്യക്തികളെ അവഹേളിക്കാനുമുള്ള ശ്രമങ്ങളാണ് വി.ഡി സതീശൻറെപേരിൽ ഇപ്പോൾ പിണറായിസർക്കാർ നടത്തിക്കൊണ്ടിരിക്കുന്നത്. രണ്ടുകാലിൽ മന്തുള്ളവൻ ഒരുകാലിൽ മന്തില്ലാത്തവനെ മന്താ എന്നുവിളിക്കുന്ന പ്രകൃതം.

വാൽക്കഷ്ണം
എസ്.എഫ്.ഐയുടെ പ്രതിനിധികൾ വിദ്യാഭ്യാസ രംഗത്ത് പല അഭ്യാസങ്ങളും കാട്ടിത്തുടങ്ങിയതതിന് പല കഥകളുണ്ട് പറയാൻ. ആ കഥകളുടെ തുടർച്ചയിൽ വർത്തമാനകാല കഥയിലെ നായികയാണ്. എസ്.എഫ്.ഐ മുൻ നേതാവും മഹാരാജാസ് കോളേജ് മുൻ വിദ്യാർത്ഥിനിയുമായ കെ. വിദ്യ. അട്ടപ്പാടി ഗവ. കോളേജിൽ ഗസ്റ്റ് ലക്ചറർ നിയമനത്തിനുവേണ്ടി വിദ്യ ഹാജരാക്കിയ സർട്ടിഫിക്കറ്റിലെ ഒപ്പും സീലും വ്യാജമാണെന്നാണ് പോലീസ് അന്വേഷത്തിലെ കണ്ടെത്തൽ. കോളേജിൻറെ സീലിനോടു സാമ്യമായ സീലാണ് സർട്ടിഫിക്കറ്റിൽ ഉപയോഗിച്ചിരിക്കുന്നത്. കോളേജ് വൈസ് പ്രിൻസിപ്പലായിരുന്ന വി.കെ. ജയമോളുടെ ഒപ്പും സീലിലും മാറ്റം വരുത്തിയാണ് സർട്ടിഫിക്കറ്റിൽ ഉപയോഗിച്ചിരിക്കുന്നതും. വിദ്യയുടെ ഈ അഭ്യാസം ഉന്നത വിദ്യാഭ്യാസരംഗത്തെ വിവാദത്തിൻറെ മുൾമുനയിൽ നിർത്തിയിരിക്കുകയാണ്. മുമ്പ് ചിന്താജെറോം ഗവേഷകരംഗത്ത് നടത്തിയ ചിന്തയില്ലാ പ്രവൃത്തിപോലയാണിത്. ഇതിന് പിള്ളേരെ കുറ്റം പറയാൻ കഴിയില്ല. ആശാനെ കണ്ടല്ലേ കുട്ടികൾ വളരുന്നത്.

Advertisement

inner ad