• നിരീക്ഷകൻ
  ഗോപിനാഥ് മഠത്തിൽ

കരുവന്നൂർ സഹകരണപാടത്ത് നടന്ന പണാപഹരണ വിളവെടുപ്പിൻറെ വാർത്തകളാണ് പാണൻമാർ ഇപ്പോഴും പാടിക്കൊണ്ടിരിക്കുന്നത്. ഓരോ ദിവസവും ട്വിസ്റ്റുകൾ നൽകി മുന്നേറിക്കൊണ്ടിരിക്കുന്ന സഹകരണതട്ടിപ്പിൻറെ കഥകൾക്ക് ഇപ്പോൾ പുതിയ ഒരു നിറവും മാനവും കൈവന്നത് അത് ചോറുകലത്തിലെ കറുത്തൊരു വറ്റായി മുഖ്യമന്ത്രിക്ക് ബോധ്യപ്പെട്ടപ്പോഴാണ്. ഇ.പി. ജയരാജനും സമ്മതിച്ചിരിക്കുന്നു വല്ലാത്തൊരു തെറ്റുതന്നെയായിരുന്നു അതെന്ന്. പക്ഷേ ഇക്കാര്യത്തിൽ എം.എം.മണി പ്രതികരിക്കാതിരുന്നത് ഭാഗ്യമായി. എങ്കിൽ പുലയാട്ടിൻറെ അഭിഷേകമായിരുന്നേനെ. അടുത്തിടെ മണി ക്ഷോഭിച്ചുപറഞ്ഞ വാക്കുകൾ ഇടുക്കിയിലെ ഒരുയോഗത്തിൽ കളക്ടർക്കും ചീഫ് സെക്രട്ടറിക്കും എതിരെയായിരുന്നു. ആശാൻ കരുവന്നൂരിനെക്കുറിച്ച് പ്രതികരിക്കാതിരുന്നത് ഇഡി ഉദ്യോഗസ്ഥർക്ക് രക്ഷയായെന്ന് പറഞ്ഞാൽമതി. ആശാനെ തൽക്കാലം മാറ്റിനിർത്തി കരുവന്നൂർ ബാങ്ക് സൃഷ്ടിച്ച ഒന്നുരണ്ട് സാമ്പത്തിക തമാശകളിലേയ്ക്ക് കടക്കാം. ആ ബാങ്കിലെ കള്ളപ്പണക്കേസിൽ ഇഡി കസ്റ്റഡിയിൽ ചോദ്യം ചെയ്ത സിപിഎം നേതാവ് പി.ആർ. അരവിന്ദാക്ഷൻറെ 90 വയസ്സുള്ള അമ്മയുടെ അക്കൗണ്ടിൽ ഒരുദിവസം പൊടുന്നനെ എത്തിയത് 63.56 ലക്ഷം രൂപയുടെ നിക്ഷേപം. ഇഡിയുടെ റിമാൻഡ് റിപ്പോർട്ടിലാണ് ഈ വെളിപ്പെടുത്തൽ. 1600 രൂപയുടെ കർഷക തൊഴിലാളി പെൻഷനല്ലാതെ ആ അമ്മയ്ക്ക് മറ്റു വരുമാനം ഒന്നുമില്ല. ആ അക്കൗണ്ടിൽ നോമിനിയായി വച്ചിരിക്കുന്നത് ഒന്നാംപ്രതി വിളപ്പായ സതീശൻറെ സഹോദരനായ ശ്രീജിത്തിനെയാണ്. ശ്രീജിത്ത് മകനാണെന്ന് നോമിനി നോട്ടിൽ കാണിച്ചിരിക്കുന്നത്. അരവിന്ദാക്ഷൻറെ പേരിലുള്ള 50 ലക്ഷം രൂപയുടെ സ്ഥിരനിക്ഷേപത്തിനു പുറമെയാണ് ഈ തുക അമ്മയുടെ അക്കൗണ്ടിൽ വന്നിരിക്കുന്നത്. അമ്മ പോലും അറിയാതെ അമ്മയുടെ മകനായ ഒന്നാംപ്രതിയുടെ സഹോദരനെ നോമിനി നോട്ടിൽ പ്രതിഷ്ഠിച്ച യഥാർത്ഥ മകൻ അരവിന്ദൻറെ തട്ടിപ്പിനെ ലക്ഷ്യമാക്കിയുള്ള ‘ഹൃദയവിശാലത’യെ ഇവിടെ ശ്ലാഘിക്കേണ്ടിയിരിക്കുന്നു. ഒരുപക്ഷേ അമ്മപോലും അറിഞ്ഞിരിക്കില്ല തനിക്കിങ്ങനെ ഒരു മകനുണ്ടായ കാര്യവും അക്കൗണ്ടിൽ പണപ്രളയം നടന്നകാര്യവും. ഇനി കരുവന്നൂരുമായി ബന്ധപ്പെട്ടു നടന്ന മറ്റൊരു കറുത്തതമാശ ഈ കേസിലെ ഒന്നാംപ്രതിയായ വിളപ്പായ സതീശന് രണ്ടാംപ്രതിയായ പി.പി.കിരൺ ബാങ്കിൽ നിന്ന് ചാക്കിൽ കെട്ടി പണം എത്തിച്ച കാര്യമാണ്. ഇത് നടന്നത് 2017 മാർച്ച് 31 നാണ്. ബാങ്കിൻറെ വാർഷികകണക്കെടുപ്പ് നടന്ന അന്നുമാത്രം 11 കോടിയാണ് ഇവിടെ നിന്ന് പണമായി കിരൺ എടുത്തതെന്ന് ഇഡി കണ്ടെത്തിയിരിക്കുന്നു. ഇവിടെ ഓർക്കേണ്ട പ്രത്യേക കാര്യം ബാങ്കിലെ ജീവനക്കാരനല്ലാത്ത കിരണിൻറെ ആ ദിവസം രാവിലെമുതലുള്ള സാന്നിദ്ധ്യമാണ്. അക്കൗണ്ടൻറ് സി.കെ. ജിൻസ്, മാനേജർ ബിജു കരീം എന്നിവരും എത്തിയാണ് 22 പേരുടെ വ്യാജപേരിൽ 50 ലക്ഷം വീതമെടുത്ത് അന്നുതന്നെ കിരണിൻറെ അക്കൗണ്ടിലേക്ക് മാറ്റിയത്. ഈ രേഖയുണ്ടാക്കി ബാങ്കിൽ വന്ന മുഴുവൻ പണവും ചാക്കിലാക്കി കിരണിന് കൈമാറി. ഈ പണമാണ് കിരൺ ചുമന്ന് സതീശന് കൈമാറിയത്. ഇത് സംബന്ധിച്ച എല്ലാവിവരങ്ങളും ഇഡിക്ക് ലഭിച്ചിട്ടുണ്ട്.
സമൂഹത്തെ അപഹസിക്കത്തക്കവിധം ഇത്തരം കറുത്ത തമാശകൾ സൃഷ്ടിച്ചവരെല്ലാം സിപിഎം സഖാക്കന്മാരാണ്. സഹകരണം എന്ന വാക്കിൻറെ സദുദ്ദേശത്തെ വിപരീതാർത്ഥത്തിലുള്ള സഹകരണമാക്കി പണം മോഷ്ടിച്ചവരാണെല്ലാവരും. അതുകൊണ്ടുതന്നെ കരുവന്നൂർ ബാങ്കിനെ നിയന്ത്രിക്കുന്ന സിപിഎം നേതാക്കന്മാരെല്ലാം മുഖം മിനുക്കുന്ന തിരക്കിൽ ഗ്രീൻ റൂമിലായിക്കഴിഞ്ഞു. ഇനി പുതിയ നിറ ചിരിയോടെ, വേറിട്ട ഒരു ഭാവത്തിലായിരിക്കും അവർ ജനങ്ങളെയും ഇടപാടുകാരെയും സമീപിക്കുക. പക്ഷെ ഉള്ളിൻറെയുള്ളിൽ ആ പഴയ കളളത്തരം ബാക്കികിടപ്പുണ്ടെന്ന കാര്യം ആരും മറക്കരുത്. കേരളഭരണത്തിൽ നടക്കുന്ന അഴിമതിയുടെയും കെടുകാര്യസ്ഥതയുടെയും ചെറിയ പതിപ്പായി വേണം കരുവന്നൂർ ബാങ്കിനെയും കാണേണ്ടത്. ഇക്കാര്യത്തിൽ ചേട്ടൻറെ അനിയത്തി തന്നെയാണ് സി.പി.ഐ എന്ന പാർട്ടിയും. കണ്ടല സഹകരണബാങ്കിൽ ആ പാർട്ടിക്കാർ നടത്തിയ കോടികളുടെ അഴിമതിക്കഥകൾ എത്ര തവണയാണ് വാർത്താപാണനാന്മാർ ഉടുക്കുകൊട്ടി പാടിനടന്നത്. സഹകരണമെന്നാൽ ഇങ്ങനെ തന്നെ വേണം. എത്ര നേരമെന്ന് വച്ച് ചുണ്ടിൽ ലിപ്സ്റ്റിക്കും തേച്ച് പൗഡറും പൂശി മുടി ബോബ് ചെയ്ത് മര്യാദക്കാരിയായി എം.എനെയും ടി.വി തോമസിനേയും അച്യുതമേനോനെയും ഇ.ചന്ദ്രശേഖരൻനായരെയും ഓർത്തുകൊണ്ടിരിക്കാൻ പറ്റും. സി.പി.ഐ കാലമിത് കാനത്തിൻറേതാണ്. അപ്പോൾഅൽപ്പസ്വൽപ്പം കാട്ടാക്കട രമണിയായി ജീവിക്കുന്നതിലും തെറ്റില്ല. സർവ്വവിധ പിണറായി ശൈലിയിലും നന്മമാത്രം കാണുന്ന കാനം അദ്ദേഹത്തിൻറെ സഖാക്കന്മാർ ചെയ്യുന്ന തെറ്റിലും നന്മമാത്രമേ കാണുകയുള്ളൂ. എങ്കിലും ജനങ്ങൾ ശ്രദ്ധിക്കേണ്ട ഒരുകാര്യമുണ്ട് ഇത്തരം മങ്കരികൾ കൊണ്ട് ചോറുണ്ടാക്കാൻ നോക്കരുത്.
വാൽക്കഷണം:
ഭാഗ്യങ്ങൾ പലവിധത്തിലാണ് സഹായത്തിനെത്തുന്നത്. അത്തരത്തിലൊരു സംഭവമാണ് ആരോഗ്യമന്ത്രിയുടെ നിയമന ആരോപണത്തിലും നടന്നത്. പരാതിക്കാരനായ ഹരിദാസും സുഹൃത്ത് ബാസിതും ഏപ്രിൽ 10 ന് സെക്രട്ടറിയേറ്റ് അനക്സിന് മുന്നിൽ ഏകദേശം 2 മണിക്കൂറോളം ഉണ്ടായിരുന്നതായി സിസിടിവി ദൃശ്യങ്ങളിൽ ഉണ്ടെങ്കിലും ഇവർ പണം കൈമാറുന്നത് ദൃശ്യങ്ങളിലില്ല. ഹരിദാസിൻറെ മകൻറെ ഭാര്യയ്ക്ക് ആയുഷ് മിഷനിൽ ഹോമിയോ മെഡിക്കൽ ഓഫീസറുടെ ജോലി കിട്ടാൻ പത്തനംതിട്ടയിലെ സിപിഎം പ്രവർത്തകനെന്ന് അവകാശപ്പെട്ട അഖിൽ സജീവും മന്ത്രിയുടെ ഓഫീസിലെ ജീവനക്കാരൻ അഖിൽ മാത്യുവും ചേർന്ന് 1.75ലക്ഷം രൂപ കോഴവാങ്ങിയെന്നാണ് പരാതി. സിസിടിവിയിൽ ആ ദൃശ്യം മാത്രം ഒഴിവായത് സർക്കാരിന് എന്തൊരു മഹാഭാഗ്യമാണ്. മാത്രവുമല്ല, അന്ന് അഖിൽ മാത്യു തിരുവനന്തപുരത്തിന് പകരം പത്തനംതിട്ടയിലായതും മറ്റൊരു മഹാഭാഗ്യം. ഇത്തരം മഹാഭാഗ്യങ്ങൾക്ക് നടുവിലൂടെ കേരളഭരണം സഞ്ചരിക്കുന്നത് നമ്മുടെ മഹാഭാഗ്യം. അങ്ങനെ സർവ്വത്ര മഹാഭാഗ്യം. പക്ഷേ കരുവന്നൂർ കാര്യത്തിൽ നബാർഡ് ചതിച്ചതുമാത്രം ദൗർഭാഗ്യം.