• നിരീക്ഷകൻ
  ഗോപിനാഥ് മഠത്തിൽ

പുതുപ്പള്ളിയെക്കുറിച്ച് വീണ്ടും ഒരു ചർച്ചയുടെ ആവശ്യമില്ലെങ്കിലും ഒരുകാര്യം പറയാതെ നിവൃത്തിയില്ല. ഇടതുപക്ഷ മനസ്സുകളിൽ വരുംകാലമാറ്റത്തിൻറെ ദിശാസൂചന നല്കിക്കൊണ്ടാണ് ആ ഉപതിരഞ്ഞെടുപ്പുഫലം പുറത്തുവന്നത്. ജെയ്ക്ക് എന്ന ഇടതുപക്ഷ സ്ഥാനാർത്ഥിയുടെ ത്രിപ്പിൾ പരാജയത്തിൽ അത് കലാശിച്ചുവെന്നത് വേറെ കാര്യം. സഹതാപ തരംഗത്തിൻറെ അനുകൂല്യമാണ് ചാണ്ടി ഉമ്മൻറെ വമ്പിച്ച വിജയത്തിന് കാരണമെന്ന് സിപിഎം സെക്രട്ടറി എം.വി.ഗോവിന്ദൻറെ ആശ്വാസവാക്കുകൾ മുമ്പു പലപ്പോഴും എന്നതുപോലെ സത്യത്തിൽ ചെന്ന് തറയ്ക്കുന്നതല്ല. സഹതാപം നേരിയ ഘടകമാണെങ്കിലും നന്മയെ ലക്ഷ്യമാക്കി ഭരണം നടത്താൻ ജനം നിയോഗിക്കപ്പെട്ട സർക്കാർ അഴിമതി മാത്രമേ ചെയ്യൂ എന്ന ദൃഢമെടുത്തകാര്യം അദ്ദേഹം സൗകര്യപൂർവം വിസ്മരിച്ചാണ് പുതുപ്പള്ളി തിരഞ്ഞെടുപ്പുഫലത്തെക്കുറിച്ച് സംസാരിച്ചത്. അതിന് എം.വി.ഗോവിന്ദനെ കുറ്റപ്പെടുത്തിയിട്ട് കാര്യമില്ല. പേരിന് പാർട്ടിയുടെ തലപ്പത്ത് ഗോവിന്ദനുണ്ടെങ്കിലും പാർട്ടിയെയും ഭരണത്തെയും നിയന്ത്രിക്കുന്നത് സാക്ഷാൽ പിണറായിവിജയൻ തന്നെയാണ്. പണ്ട് കമ്മ്യൂണിസ്റ്റ് പാർട്ടിയെ സംബന്ധിച്ച് പ്രധാനമായും പറഞ്ഞുകേട്ട പ്രത്യേകത വിമർശനങ്ങളെ സഹർഷം സ്വീകരിച്ച് തിരുത്തുന്ന പാർട്ടി എന്നായിരുന്നു. ഇപ്പോൾ പിണറായി എന്ന ഒരു പ്രത്യേക നേതാവിനുചുറ്റും ഗ്രഹങ്ങളെന്നുപറയുന്നില്ല, വെറും ഉൽക്കകളായി ഭ്രമണം ചെയ്യുന്ന കുറച്ച് സിൽബന്ധികളുടെ അഴിമതി ലക്ഷ്യഭരണമാണ് നടക്കുന്നത്. പാർട്ടിയുടെ വ്യക്തിത്വം നശിച്ച ഇക്കാലത്ത് എം.വി.ഗോവിന്ദൻമാത്രം വിചാരിച്ചാൽ പാർട്ടിയെയും ഭരണത്തെയും രക്ഷിക്കാൻ കഴിയില്ല. ചുറ്റുമുള്ളവർ അഴിമതി ഭരണത്തിന് ഓശാന പാടുമ്പോൾ അവരെക്കാൾ ഉച്ചത്തിൽ അനുകൂല ശബ്ദത്തിൽ പാർട്ടിഭരണത്തെ വാഴ്ത്തിപ്പാടുകമാത്രമേ ഗോവിന്ദനും കരണീയമായിട്ടുള്ളൂ. അതൊരുതരം വ്യക്തിത്വത്തെ അടിമപ്പെടുത്തുന്ന പ്രവൃത്തിയാണ്. ആ വാഴ്ത്തിപ്പാടലുകളാണ് ഓരോ അഴിമതിയുടെ സന്ദർഭങ്ങളിലും ഏ.കെ.ബാലനും എം.എം.മണിയുമൊക്കെ നടത്തിക്കൊണ്ടിരിക്കുന്നത്. അതല്ലാതെ അവർക്കെന്താണ് ചെയ്യാൻ കഴിയുക? എതിർശബ്ദം പുറപ്പെടുവിക്കാത്തവിധം ഇങ്ങനെ കുറെ വിനീത വിധേയന്മാരെ സൃഷ്ടിച്ചെടുക്കാൻ കഴിഞ്ഞതാണ് പിണറായി വിജയൻ എന്ന മുഖ്യമന്ത്രിയുടെ ഏറ്റവും വലിയ വിജയം. ഇവരിൽ ആരെങ്കിലും ഭരണത്തിനെതിരെ വിമർശനസ്വരം പുറപ്പെടുവിച്ചിരുന്നെങ്കിൽ സിപിഎമ്മിൽ അവരുടെ രാഷ്ട്രീയഗ്രാഫ് കുത്തനെ താഴേക്കുപോകുമായിരുന്നു. ആ ഭയമാണ് കുറെ നിശബ്ദ ജീവികളുടെ കൂടാരമാക്കി സിപിഎമ്മിനെ ഇപ്പോൾ മാറ്റിയിരിക്കുന്നത്. കഴിവുറ്റ കുറെ നേതാക്കന്മാർ കളത്തിന് പുറത്തെ കരുക്കളായി വെട്ടിമാറ്റപ്പെട്ടതും നിർവീര്യമാക്കപ്പെട്ടതും വിമർശനസ്വരം ഉയർത്തിയതിനാലാണെന്നും ഈ അവസരത്തിൽ ഓർക്കണം.
തിരഞ്ഞെടുപ്പിൻറെ ഫലം വരുമുമ്പുതന്നെ അത് എന്തായിരിക്കുമെന്ന വ്യക്തമായ ധാരണ സിപിഎം സെക്രട്ടറി എം.വി.ഗോവിന്ദനും കൂട്ടാളികൾക്കുമുണ്ടായിരുന്നു. അത് സംബന്ധിച്ച പ്രസ്ഥാവനകൾ അവർ കാലേക്കൂട്ടി ഇറക്കുകയും ചെയ്തു. ചാണ്ടി ഉമ്മന് ലഭിക്കുന്ന സഹതാപ വോട്ടിനപ്പുറം മറ്റൊരു സഹതാപം കൊണ്ട് വോട്ട് നേടാനുള്ള ഒരു കൗശലം കൂടി ജെയ്ക്കിൻറെ സ്ഥാനാർത്ഥിത്ത്വത്തിലൂടെ സിപിഎം നടത്തിയിരുന്നു. ജെയ്ക്ക് തോമസ് രണ്ടുതവണ ഉമ്മൻചാണ്ടിയോട് മത്സരിച്ച് തോറ്റതിനുശേഷമാണ് മകൻ ചാണ്ടി ഉമ്മനോട് പരാജയപ്പെട്ടത്. രണ്ടുതവണ മത്സരിച്ച് തോറ്റ ആളല്ലേ, അയാളെ ഇത്തവണ പുതുപ്പള്ളിക്കാർ ജയിപ്പിച്ചുവിടും എന്ന സിപിഎം സഹതാപശ്രദ്ധയാണ് ചാണ്ടി ഉമ്മനുമുമ്പിൽ ചീറ്റിപ്പോയത്. സഹതാപങ്ങൾ തമ്മിലുള്ള ഏറ്റുമുട്ടലിനപ്പുറം കാര്യങ്ങളെ വ്യക്തമായി തിരിച്ചറിഞ്ഞശേഷമാണ് പുതുപ്പള്ളിയിലെ വോട്ടർമാർ ചൂണ്ടുവിരലിൽ മഷിതേയ്ക്കാൻ പോളിംഗ് ബൂത്തിലെത്തിയതിന് തെളിവാണ് സിപിഎമ്മിന് മുൻതവണത്തെക്കാൾ ഇപ്പോൾ നഷ്ടപ്പെട്ട പന്ത്രണ്ടായിരത്തിൽപ്പരം വോട്ടുകൾ. സിപിഎമ്മിൻറെയും ബിജെപിയുടെയും അടിയുറച്ച പാർട്ടി വോട്ടുകൾ മാത്രമാണ് ഈ ഉപതിരഞ്ഞെടുപ്പിൽ അവർക്കുലഭിച്ചത്. അനുഭാവപൂർവം മുമ്പ് ഈ പാർട്ടിക്ക് വോട്ട് ചെയ്ത ആൾക്കാർ ഒന്നടങ്കം ഇത്തവണ ഇടതുപക്ഷ ഭരണത്തിന് വിപരീത സൂചന നൽകാൻ തീരുമാനിക്കുകയായിരുന്നു. ബിജെപിക്ക് പുതുപ്പള്ളിക്ക് വോട്ടുചെയ്തിട്ട് വലിയ കാര്യമില്ലെന്ന് അതിൻറെ അനുഭാവികളും സിപിഎം ഭരണത്തെ ഒരുപാഠം പഠിപ്പിക്കണമെന്ന് ആ പാർട്ടിയുടെ അനുഭാവികളും മനസ്സുകൊണ്ട് സജ്ജമായപ്പോൾ വോട്ടുകൾ അടപടലെ ചാണ്ടി ഉമ്മനിൽ വന്നുപതിക്കുകയായിരുന്നു. എല്ലാം ശരിയാക്കാം എന്നുപറഞ്ഞ് അധികാരത്തിലെത്തിയ പിണറായി സർക്കാർ ആ വാക്കുകളെ വിപരീതാർദ്ധത്തിൽ എടുത്ത് എല്ലാമേഖലയേയും ശരിയാക്കിക്കൊണ്ടിരിക്കുകയാണ്. കാർഷികമേഖല ആകെ തകർന്ന് തരിപ്പണമായിക്കഴിഞ്ഞു. വികസനത്തിൻറെ പേരുപറഞ്ഞ് അഴിമതിയിലൂടെ സ്വയം വികസിച്ചുകൊണ്ടിരിക്കുന്ന മന്ത്രിമാരുടെയും നേതാക്കളുടെയും അവരുടെ മക്കളുടെയും തെരുക്കൂത്തരങ്ങുകളായി ഭരണകാര്യാലയങ്ങൾ മാറിക്കൊണ്ടിരിക്കുന്നു. ജനാധിപത്യത്തിൻറെ ചെലവിൽ അവൻറെ പിച്ചച്ചട്ടിയിൽ കയ്യിട്ടുവാരി മൃഷ്ടാന്നഭോജനം നടത്തി ഏമ്പക്കം വിടാൻ ഭരണാധികാരികൾ കൊതിക്കുന്നതിനിടയിൽ പുതുപ്പള്ളിയിലെ ജനങ്ങൾ നല്കിയ മധുരവേദനയാണ് ഈ തിരഞ്ഞെടുപ്പുഫലം. ആ ഫലം തങ്ങൾക്ക് വിപരീതമാണെന്നറിയുമ്പോൾ എം.വി. ഗോവിന്ദനും പിണറായിവിജയനും ചിരിക്കാനല്ലാതെ മറ്റെന്തിനാണ് കഴിയുക? ആ ചിരിയും മാധ്യമപ്രവർത്തകർക്ക് മുമ്പിൽ നടത്തിയ അഭിനയമാണെന്ന് ആർക്കാണ് അറിഞ്ഞുകൂടാത്തത്?
വാൽക്കഷണം:
ഇന്ത്യ ആതിഥ്യം വഹിക്കുന്ന പതിനെട്ടാമത് ജി-20 നേതൃതല ഉച്ചകോടി ഗംഭീരമായ പരിപാടികളോടെ ഡൽഹിയിൽ അരങ്ങേറി. 20 അംഗരാജ്യത്തിൻറെ ക്ഷണിതാക്കളായ 8 രാജ്യങ്ങൾ, 14 ലോകസംഘടനകളുടെ മേധാവികൾ എന്നിവർ പങ്കെടുത്ത ആഗോള സാമ്പത്തിക ചർച്ചാവേദിയായിരുന്നു അത്. റഷ്യൻ പ്രസിഡൻറ് വ്ളാദിമിർ പുതിനും ചൈനീസ് പ്രസിഡൻറ് ഷീ ജിൻപിങും പങ്കെടുത്തില്ല. പകരം അവരുടെ പ്രതിനിധികൾ പങ്കെടുത്തു. പ്രൗഢോജ്ജ്വലമായ വേദിയിൽ പ്രധാനമന്ത്രി നരേന്ദ്രമോദി ഒരു താരമായിത്തന്നെ തിളങ്ങി. മണിപ്പൂർ വിഷയത്തിൽ കാർമേഘത്തിനുള്ളിലായ ഒരു നക്ഷത്രത്തിൻറെ തിളക്കമായിരുന്നു അത്. ഇന്ത്യൻ സ്ത്രീത്വം ലോകസമക്ഷം അവമതിക്കപ്പെട്ട മണിപ്പൂർ സംഭവത്തിനുമേൽ ജി-20 ഉച്ചകോടി എന്ന പടുതകൊണ്ടുമറയ്ക്കാൻ തൽക്കാലമെങ്കിലും പ്രധാനമന്ത്രിക്ക് കഴിഞ്ഞു. പക്ഷേ,
അതിൽ കോൺഗ്രസ് ദേശീയ അധ്യക്ഷൻ ഖാർഗയെ ക്ഷണിക്കാത്തതിൻറെ കാര്യം മനസ്സിലാകുന്നില്ല. ഇന്ത്യയെ ഭാരതമാക്കുന്നതിനും ആ അവ്യക്തതയുണ്ട്. പിന്നെ ഒരുകാര്യം പറയാനുള്ളത് ഭാരതമെന്ന പേരുമാറ്റുന്നത് സനാതന ധർമ്മത്തിൻറെ പേരിലാണെങ്കിൽ അക്കാര്യം തമിഴ്നാട് മന്ത്രി ഉദയനിധി സ്റ്റാലിന് കേൾക്കണ്ട. അയാൾക്ക് അക്കാര്യം ഇഷ്ടമല്ല.