• പുതിയ പാർലമെന്റ് മന്ദിരം ഉദ്ഘാടനം ചെയ്തു

ന്യൂഡൽഹി: ഇന്ത്യൻ പാർലമെന്റിൽ അം​ഗസംഖ്യ വൈകാതെ ഉയരമെന്ന സൂചന നൽകി പ്രധാനമന്ത്രി നരേന്ദ്ര മോദി. അതിനാവശ്യമായ സൗകര്യങ്ങളാണ് പുതിയ പാർലമെന്റ് മന്ദിരത്തിൽ സജ്ജമാക്കിയിരിക്കുന്നതെന്ന് അദ്ദേഹം വ്യക്തമാക്കി. പുതിയ പാർലമെൻറ് മന്ദിരത്തിൻറെ ഉദ്ഘാടന ചടങ്ങിൽ സംസാരിക്കുയായിരുന്നു പ്രധാനമന്ത്രി. നിലിവിലുള്ള അം​ഗ സംഖ്യയുടെ കാലാവധി 2026ൽ തീരും. പിന്നീട് ഇതു കാലോചിതമായി പുനർ നിർണയിക്കും.
മോദി വിളികളോടെയാണ് സദസിൽ പ്രധാനമന്ത്രിയുടെ പ്രസംഗത്തെ വരവേറ്റത്. അമൃത മഹോത്സവത്തിൽ ജനങ്ങൾക്കുള്ള ഉപഹാരമാണ് ഈ മന്ദിരമെന്ന് പ്രധാനമന്ത്രി പറഞ്ഞു. ആത്മനിർഭർ ഭാരതത്തിൻറെ പുതിയ സൂര്യോദയത്തിൻറെ അടയാളമാണ് ഇതെന്നും പുതിയ ഭാരതം പുതിയ ലക്ഷ്യത്തിലേക്കും പുതിയ പ്രതീക്ഷകളിലേക്കും പുത്തൻ വഴികളിലേക്കും നീങ്ങുമെന്നും മോദി പറഞ്ഞു. ഭാരതം വളരുമ്പോൾ ലോകം വളരുന്നു. രാജ്യത്തിൻ്റെ വികസനത്തിൻറെ അടയാളം കൂടിയാണ് ഈ മന്ദിരം. പുതിയ പാർലമെൻറ് മന്ദിരത്തിൻറെ സ്ഥാപിച്ച ചെങ്കോൽ രാജ്യത്തിന് മാർഗദർശിയാകുമെന്നും അദ്ദേഹം കൂട്ടിച്ചേർത്തു. രാജ്യം കൂടുതൽ ഉന്നതിയിലേക്ക് നീങ്ങുകയാണ്. ആത്മനിർഭർ ഭാരത് അതിനുള്ള വഴികാട്ടിയാണെന്നും മോദി പറഞ്ഞു.
ജനാധിപത്യത്തിലെ അവിസ്മരണീയ ദിനമെന്ന് പ്രധാനമന്ത്രി നരേന്ദ്രമോദി. ഭാരതത്തിലെ കോടിക്കണക്കിന് ജനങ്ങളുടെ സ്വപ്നസാക്ഷാത്കാരമാണ് ഇന്ന് പൂർത്തിയായതെന്ന് പ്രധാനമന്ത്രി പറഞ്ഞു. സ്വാതന്ത്ര സമര സേനാനികളുടെ സ്വപ്നസാക്ഷാത്കാരത്തിൻറെ അടയാളമാണ് പുതിയ പാർലമെൻറ് മന്ദിരമെന്നും അദ്ദേഹം പ്രസംഗിച്ചു. സമ്മേളനത്തിലുടനീളം മോദി പ്രഭാവം നിറഞ്ഞു നിന്നു. മോദിയുടെ പേര് ഉയർന്നപ്പോഴെല്ലാം വലിയ കൈയടിയാണ് കേട്ടത്. പ്രധാനമന്ത്രിയെ കൂടാതെ ലോക് സഭാ സ്പീക്കർ ഓം ബിർള മാത്രമാണ് പ്രസം​ഗിച്ചത്. സഭാ നാഥനായ രാഷ്‌ട്രപതിയുടെയും രാജ്യസഭാധ്യക്ഷൻ ഉപരാഷ്ട്രപതിയുടെയും സന്ദേശങ്ങൾ വായിച്ചു. കോൺ​ഗ്രസും ഇരുപതിൽപ്പരം പ്രതിപക്ഷ കക്ഷികളും സമ്മേളന ചടങ്ങുകളും ഉദ്ഘാടന ചടങ്ങും ബഹിഷ്കരിച്ചു.
മൂന്നു ഘട്ടങ്ങളായിട്ടാണ് പരിപാടി നടന്നത്. ആദ്യം അധികാര ചിഹ്നമായി ചെങ്കോൽ പൂജിച്ച് സ്പീക്കറുടെ ഇരിപ്പിടത്തിനു സമീപം മോദി സ്ഥാപിച്ചു. രണ്ടാം ഘട്ടത്തിൽ പുതിയ മന്ദിരത്തിന്റെ ശിലാഫലകം മോദി അനാച്ഛാദനം ചെയ്തു. മൂന്നാം ഘട്ടത്തിലായിരുന്നു ഉദ്​ഘാടന സമ്മേളനം. പുതിയ പാർലമെന്റ് മന്ദിരത്തിലെ ലോക്സഭാ ഹാളിലായിരുന്നു സമ്മേളനം.