പ്രധാനമന്ത്രി നരേന്ദ്ര മോദി പിണറായി വിജയനു പഠിക്കുകയാണോ, മുഖ്യമന്ത്രി പിണറായി വിജയൻ നരേന്ദ്ര മോദിക്കു പഠിക്കുകയാണോ എന്നു മാത്രമേ സംശയമുള്ളൂ. രണ്ടു പേരും പഠിക്കുന്നത് ഒരേ സിലബസാണെന്ന കാര്യത്തിൽ ആർക്കുമില്ല സംശയം. ജനാധിപത്യത്തിലൂടെ നേടിയെടുത്ത ഭരണാധികാരം സംരക്ഷിക്കാൻ സ്വേച്ഛാധിപത്യത്തിന്റെ പാഠങ്ങളാണ് ഇരുവരും പരിശീലിക്കുന്നത്. കള്ളക്കേസിൽ കുടുക്കി രാഹുൽ ​ഗാന്ധിയെ പാർലമെന്റിൽ നിന്നു പുറത്താക്കി എതിർപ്പിന്റെ മുനയൊടിക്കാൻ നരേന്ദ്ര മോദി നടത്തിയ അതേ നാടകമാണ് തിരക്കഥ തിരുത്തി പിണറായി വിജയൻ കേരളത്തിലും അവതരിപ്പിക്കുന്നത്.

പ്രതിപക്ഷ നേതാവ് വി.ഡി. സതീശനെതിരേ വിജിലൻസ് കേസ് എടുത്തതിനു പിന്നാലെ കെപിസിസി പ്രസിഡന്റ് കെ. സുധാകരനെ ക്രൈം ബ്രാഞ്ചിനെ കൊണ്ട് അറസ്റ്റ് ചെയ്യിക്കാൻ നടത്തുന്ന നീക്കങ്ങൾ പിണറായിസത്തിന്റെ അവസാനത്തെ ഉരുക്കുമുഷ്ടി പ്രയോ​ഗങ്ങളാണ്. തങ്ങൾക്കെതിരായി ഉയരുന്ന ആരോപണങ്ങൾ മറിക‌ടക്കാൻ അന്വേഷണ ഏജൻസികളെ ഉപയോ​ഗിച്ചു പ്രതിപക്ഷത്തെ ഭീഷണിപ്പെടുത്തി നിശബ്ദമാക്കാനുള്ള ഭീരുക്കളുടെ മാനസികാവസ്ഥയാണു നരേന്ദ്ര മോദിയും പിണറായി വിജയനും പ്രകടമാക്കുന്നതെന്നു വ്യക്തം.

ഒന്നാം പിണറായി വിജയൻ സർക്കാരിന്റെ കാലത്തെ പല അഴിമതി ഇടപാ‌ടുകളും പ്രതിപക്ഷമാണ് പുറത്തുകൊണ്ടു വന്നത്. സ്പ്രിം​ഗളർ, ഇ മൊബിലിറ്റി ഹബ്, നയതന്ത്ര ബാ​ഗേജ്, സ്വർണം ക‌‍ടത്ത്, റിവേഴ്സ് ഹവാല, വിശുദ്ധ ​ഗ്രന്ഥം, ലൈഫ് മിഷൻ, ഇഎംസിസി തുടങ്ങി എത്രയെത്ര അഴിമതികളാണ് അക്കാലത്ത് തന്നെ വെളിച്ചത്തു വന്നത്. ഈ അഴിതികളുടെയെല്ലാം ഉറവിടം മുഖ്യമന്ത്രിയുടെ ഓഫീസും ഔദ്യോ​ഗിക വസതിയുമാണെന്ന് അന്വേഷണ ഏജൻസികൾക്കു വരെ ബോധ്യപ്പെട്ടതാണ്.

നയതന്ത്ര സ്വർണക്കടത്ത് കേസിൽ മുഖ്യമന്ത്രിക്കും കുടുംബാം​ഗങ്ങൾക്കുമെതിരേ ഒന്നാം പ്രതി സ്വപ്ന സുരേഷ് തെളിവുകൾ നിരത്തിയിട്ടും മുഖ്യമന്ത്രിക്കെതിരെ കേസില്ല. പാവപ്പെട്ടവർക്കു വീട് വച്ചു കൊടുക്കുന്ന ലൈഫ് മിഷൻ പദ്ധതിയിൽ കോടികളുടെ അഴിമതി നടന്നെന്നാണ് സംശയിക്കുന്നത്. തൃശൂരിലെ ഒരൊറ്റ പദ്ധതിക്കു മാത്രം 45 ശതമാനം കമ്മിഷൻ പറ്റിയതായി തെളിയിക്കപ്പെട്ടു. അതിന്റെ പേരിൽ മുഖ്യമന്ത്രിയുടെ പ്രിൻസിപ്പൽ സെക്രട്ടറി എം. ശിവശങ്കർ ഇപ്പോഴും ജയിലിലാണ്. സ്വപ്ന സുരേഷിന്റെ മൊഴിപ്രകാരം മുഖ്യമന്ത്രിയുടെ ഒത്താശയോടെയാണ് ലൈഫ് മിഷൻ കമ്മിഷൻ ഇടപാടുകളെല്ലാം നടന്നത്. പക്ഷേ, ലൈഫ് മിഷൻ കോഴക്കേസിൽ മുഖ്യമന്ത്രി പ്രതിയല്ല.

കോവിഡ് കാല മെഡിക്കൽ പർച്ചേസിൽ കോടികളുടെ ആരോപണമുയർന്നിട്ടും മുൻ ആരോഗ്യമന്ത്രി കെ.കെ ഷൈലജയ്‌ക്കെതിരെ കേസോ അന്വേഷണമോ ഉണ്ടായില്ല. ആന്തൂരിൽ പണി പൂർത്തിയാക്കിയ കൺവെൻഷൻ സെന്റർ തുറക്കാൻ ആവശ്യപ്പെട്ട പണം കൊടുക്കാത്തതിന്റെ പേരിൽ എൻആർഐ നിക്ഷേപകൻ സാജൻ പാറായിൽ ആത്മഹത്യ ചെയ്ത സംഭവത്തിൽ എം.വി ഗോവിന്ദന്റെ ഭാര്യ പി.കെ. ശ്യാമളയ്‌ക്കെതിരെയും കേസില്ല.
രണ്ടാം പിണറായി വിജയൻ സർക്കാർ കാലത്തു സർക്കാർ നടത്തിയ തീവെട്ടിക്കൊള്ളയാണ് എഐ ക്യാമറ അഴിമതി. 50 കോടി രൂപയ്ക്കു നടപ്പാക്കാവുന്ന പദ്ധതി 232 കോടി രൂപയിലെത്തിച്ചു മുഖ്യമന്ത്രിയുടെ മകന്റെ ബന്ധുവിന് പങ്കാളിത്തമുള്ള കമ്പനിയെ വഴി വിട്ടു സഹായിച്ച കേസിലും അന്വേഷണമില്ല. അടിമുടി അഴിമതിയിൽ മുങ്ങിയ കെ ഫോൺ കരാറും മുഖ്യമന്ത്രിയുടെ മകന്റെ ബന്ധുവിന്റെ കമ്പനിക്ക് സാമ്പത്തിക നേട്ടമുണ്ടാക്കാനാണെന്നു വ്യക്തമാണ്. പക്ഷേ കെസുമില്ല, അന്വേഷണവുമില്ല. നിലവാരം കുറഞ്ഞ ചൈനീസ് കേബിളുകൾ ഉപയോ​ഗിച്ച് നിർമിച്ച കെ ഫോൺ പദ്ധതിക്കെതിരേ ഓരോ ദിവസവും അഴിമതിക്കഥകൾ പുറത്തു വരികയാണ്. അപ്പോഴും പ്രതിപക്ഷ നേതാവിന്റെ വായടപ്പിക്കാനല്ലാതെ, ഈ അഴിമതിക്കു പിന്നിലെ തീവെട്ടിക്കൊള്ളയെക്കുറിച്ച് ഒരക്ഷരം മുഖ്യമന്ത്രി മിണ്ടുന്നില്ല.
ബ്രഹ്‌മപുരത്തെ മാലിന്യ മലയ്ക്കു തീയിട്ട് കോടികളുടെ തട്ടിപ്പ് നടത്തിയ കമ്പനിക്കെതിരെയോ ഇടപാടുകാരെ സംരക്ഷിക്കാൻ ശ്രമിച്ച തദ്ദേശ മന്ത്രിക്കെതിരെയോ ഒരു നടപടിയുമില്ല.

തനൂർ ബോട്ട് ദുരന്തം ക്ഷണിച്ചു വരുത്തിയ മന്ത്രി അബ്ദു റഹ്‌മാനെതിരെ കേസില്ല, കാട്ടാക്കട ക്രിസ്ത്യൻ കോളെജിന്റെ പേരിൽ വ്യാജരേഖ ചമച്ച മുൻ എസ്എഫ്ഐ നേതാവ് ഇപ്പോഴും റോഡിലിറങ്ങി വിലസുന്നു. ഒരു കേസുമില്ല, അന്വേഷണവുമില്ല. മഹാരാജാസ് കോളെജിന്റെ പേരിൽ വ്യാജ സീലും ലെറ്റർപാഡും ചമച്ച് ​ഗസ്റ്റ് ലക്ചറർ ജോലി നേടിയ വിദ്യയെന്ന യുവതി ഇപ്പോഴും ഇരുട്ടത്ത് നിൽക്കുന്നു.

Advertisement

inner ad

ഇങ്ങനെ എത്രയെത്ര കേസുകൾ മൂടിക്കെട്ടി വച്ച ശേഷമാണ് പിണറായി വിജയൻ പ്രതിപക്ഷ നേതാവ് വി.ഡി. സതീശനെയും കെപിസിസി പ്രസിഡന്റ് കെ. സുധാകരനെയും വേട്ടയാടാനിറങ്ങിയത്. എന്താണു പ്രതിപക്ഷ നേതാവ് ചെയ്ത കുറ്റം? 2018ലെയും 19ലെയും പ്രളയത്തിനിരയായവർക്ക് സഹായമെത്തിക്കുന്ന പുനർജനി പദ്ധതിയിൽ അനധികൃത വിദേശഫണ്ട് കൈപ്പറ്റിയത്രേ. ഇതു നിലനിൽക്കത്തക്ക കേസല്ലെന്ന് അന്വേഷണ ഉദ്യോ​ഗസ്ഥർ തന്നെ പറയുന്നു. പരാതി അടിസ്ഥാന രഹിതമാണെന്ന് ഒരിക്കൽ സ്പീക്കർ തന്നെ നിയമസഭയിൽ റൂളിം​ഗ് നൽകിയതുമാണ്. പിന്നെന്തിനാണ് ഈ കേസ് വീണ്ടും കുത്തിപ്പൊക്കി കേസാക്കിയത്?

കാരണം വ്യക്തം. അമേരിക്കയിൽ സന്ദർശനം നടത്തി, അളവില്ലാതെ പണപ്പിരിവ് നടത്തുന്ന മുഖ്യമന്ത്രിയുടെ തട്ടിപ്പ് പുറത്തു കൊണ്ടുവന്നതിന്റെ കൊതിക്കെറുവ്. ഒരു രൂപ പോലും കമ്മിഷനോ കൈക്കൂലിയോ കൈപ്പറ്റാതെ സ്വന്തം നിയേോജകണ്ഡലത്തിലെ നിരാലംബർക്കു വീടു വച്ചു കൊടുത്ത സതീശനെതിരേ വിജിലൻസിനെ കൊണ്ട് കെസേടുപ്പിച്ച് പ്രതിപക്ഷ നാവടപ്പിക്കാനാണു ഭാവമെങ്കിൽ വെ‌ടിക്കെട്ടുകാരനെ ഉടുക്കു കൊട്ടി പേടിപ്പിക്കരുതെന്നു മാത്രം പറയട്ടെ.
സതീശനെതിരായ കേസിന്റെ ഹാം​ഗ് ഓവർ മാറുന്നതിനു മുൻപാണ് കെപിസിസി പ്രസിഡന്റ് കെ. സുധാകരനെതിരേയുള്ള ക്രൈം ബ്രാഞ്ച് അന്വേഷണം. പാർലമെന്റ് അം​ഗം പോലുമല്ലാതിരുന്ന കാലത്ത് പാർലമെന്റ്
സുധാകരൻ അക്കൗണ്ട്സ് കമ്മിറ്റി അം​ഗമെന്ന നിലയിൽ മോൻസൺ മാവുങ്കലിനെ സഹായിച്ചു എന്നാണ് ക്രൈം ബ്രാഞ്ച് പറയുന്നത്. മോൻസൺ മാവുങ്കലിന്റെ സന്തത സഹചാരിയായ അനിത പുല്ലയിലിനെ ലോക കേരള സഭയുടെ പേരിൽ സർക്കാർ ചെലവിൽ ആദരിച്ചിരുത്തി തട്ടിപ്പിനു മസാല പുരട്ടിയവരാണ് ഇല്ലാക്കഥ മെനഞ്ഞ് സുധാകരനെ വിരട്ടാൻ നോക്കുന്നത്.
പ്രതിപക്ഷ നേതാക്കളെ മാത്രമല്ല, പിണറായിക്കും പാർട്ടിക്കുമെതിരേ വാർത്തകൾ കണ്ടെത്തുന്ന മാധ്യമ പ്രവർത്തകരെയും കൈവിലങ്ങണിയിച്ചു കാരാ​ഗ്രഹത്തിലാക്കാനാണ് പിണറായിസത്തിന്റെ പുതിയ നീക്കം. ഈ വൃഥാ വ്യായാമങ്ങളിൽ നിന്ന് ഒരു പാഠം നിങ്ങൾ പഠിച്ചേ മതിയാകൂ. എത്ര മൂടിവയ്ക്കാൻ ശ്രമിച്ചാലും നിങ്ങൾ നടത്തുന്ന കള്ളത്തരങ്ങൾ ഇനിയുമിനിയും പുറത്തു കൊണ്ടുവരാൻ പ്രതിപക്ഷത്തിനു നൽകുന്ന ഊർജമാണ് സതീശനും സുധാകരനും എതിരായ കേസുകൾ.