തിരുവനന്തപുരം: സർക്കാർ വിഹിതം നൽകി ജീവനക്കാരുടെ ആരോഗ്യ സുരക്ഷ ഉറപ്പു വരുത്താൻ സർക്കാർ തയ്യാറാവണമെന്നും ഇൻഷ്വറൻസിൻറെ മറവിൽ ഉദ്യോഗസ്ഥരുടെ ജീവൻ പന്താടരുതെന്നും സെറ്റോ ചെയർമാൻ ചവറ ജയകുമാർ ആവശ്യപ്പെട്ടു.
ചികിത്സക്കായി ഇൻഷ്വറൻസ് കമ്പനിക്ക് രേഖ കൈമാറി ദിവസങ്ങൾ പിന്നിട്ടിട്ടും അനുമതി ലഭിക്കുന്നില്ല. പ്രതിമാസം 500 രൂപ ഇൻഷ്വറൻസിന് പ്രീമിയം നൽകുന്നു.
എട്ടുമാസമായിട്ടും നടപടികളിൽ സുതാര്യത ഇല്ല. പ്രീമിയം അടച്ചിട്ട് ആനുകൂല്യം ലഭിക്കാത്തതിന് സർക്കാരാണുത്തരവാദി.
മെഡിസെപ്പിൻറെ പേരിൽ കോർപ്പസ്സ് ഫണ്ടിനത്തിൽ ജീവനക്കാരിൽ നിന്നും സമാഹരിച്ച നാൽപ്പതു കോടി രൂപയുടെ കോർപ്പസ്സ് ഫണ്ട് അവസാനിച്ചതോടെ അവയവമാറ്റം ഉൾപ്പെടെയുള്ള ഗുരുതര രോഗങ്ങൾക്കുള്ള ചികിത്സ മുടങ്ങുന്ന അവസ്ഥയിലാണ്. ചികിത്സയ്ക്ക് ആവശ്യത്തിന് പണം ലഭ്യമല്ലാത്ത അവസ്ഥ വന്നതോടെ നിലവിൽ ആശുപത്രിയിൽ പ്രവേശിക്കപ്പെട്ടിരിക്കുന്നവർ ഉൾപ്പെടെയുള്ള രോഗികൾ കടുത്ത ആശങ്കയിലാണ്. ചികിത്സ നൽകി കഴിഞ്ഞിട്ടും പണം ലഭിക്കാത്തത് ആശുപത്രികളേയും പ്രതിസന്ധിയിൽ ആഴ്ത്തുന്നു. ഇതിൽ സർക്കാരിൻറെ അടിയന്തിര ഇടപെടൽ ഉണ്ടാവണം.
സർക്കാർ ജീവനക്കാരുടേയും പെൻഷകാരുടേയും സമഗ്ര ആരോഗ്യ ഇൻഷ്വറൻസ് പദ്ധതിയായ മെഡിസെപ്പിനെ അട്ടിമറിക്കാൻ ആസൂത്രിത ശ്രമം നടക്കുകയാണെന്ന് സെറ്റോ ചെയർമാൻ ചവറ ജയകുമാർ ആഭിപ്രായപ്പെട്ടു.
കരാർ കാലാവധിയായ മൂന്നു വർഷത്തിനുള്ളിൽ എപ്പോൾ ചേർന്നാലും തുടക്കം മുതലുള്ള പ്രീമിയം അടക്കണമെന്നത് അന്യായമാണ്. പ്രീമിയം അടക്കുന്ന ജീവനക്കാർക്ക് മാത്രമേ പദ്ധതിയുടെ ആനുകൂല്യം ലഭിക്കുകയുള്ളു എന്നത് വിരോധാഭാസമാണ്. 2022 ജൂലൈ 1 മുതൽ 2025 ജൂൺ 30 വരെയുള്ള മൂന്നു വർഷ കാലാവധി catastrophic പാക്കേജ് ഉൾപ്പെടെയുള്ള ആനുകൂല്യങ്ങൾ ലഭിക്കണമെങ്കിൽ സർവ്വീസിൽ പ്രവേശിക്കുന്നതിനുമുമ്പുള്ള പ്രീമിയം കൂടി അടയ്ക്കണം.
ജീവനക്കാരിൽ നിന്നും പ്രതിമാസം അഞ്ഞൂറു രൂപ പ്രീമിയമായി വാങ്ങിയാണ് പദ്ധതി നടപ്പാക്കിയത്. ഒരു വർഷം ജീവനക്കാരിൽ നിന്നും ആറായിരം രൂപ വാങ്ങുന്നുവെങ്കിലും അതിൽ 4800 രൂപയാണ് ഇൻഷ്വറൻസ് കമ്പനിയ്ക്ക് നൽകുന്നത്. ജി.എസ്.ടി ഇനത്തിൽ 864 രൂപ ചെലവാകും. മിച്ചം വരുന്ന 336 രൂപ കോർപ്പസ് ഫണ്ടിലേയ്ക്ക് ആണ് വക കൊള്ളിക്കുന്നത്.
കൊട്ടിഘോഷിച്ച് ഉദ്ഘാടന മഹാമഹം നടത്തി എന്നല്ലാതെ പദ്ധതി നടത്തിപ്പിന് വേണ്ട ഒരു ആസൂത്രണവും സർക്കാർ നടത്തിയില്ല. ആദ്യഘട്ടത്തിൽത്തന്നെ പ്രമുഖ ആശുപത്രികളെ ഉൾപ്പെടുത്താൻ കഴിഞ്ഞിട്ടില്ല. എം പാനൽ ചെയ്ത ആശുപത്രികളിലാകട്ടെ എല്ലാ ചികിത്സയും പദ്ധതിയുടെ ഭാഗമാക്കാനും കഴിഞ്ഞില്ല.
ചുരുക്കത്തിൽ ആരോഗ്യ ഇൻഷ്വറൻസ് പദ്ധതി തുടക്കത്തിൽത്തന്നെ രോഗാവസ്ഥയിലായി. ചികിത്സ നൽകിയ ആശുപത്രികൾക്ക് തുക വിതരണം ചെയ്യുന്നതിൽ ഇൻഷ്വറൻസ് കമ്പനിയും സർക്കാരും പരസ്പരം പഴിചാരിയതോടെ പല ആശുപത്രികളിലും മെഡിസെപ്പിൻറെ ആനുകൂല്യം നിലച്ച അവസ്ഥയിലാണ്.
ജീവനക്കാരിൽ നിന്നും കോർപ്പസ് ഫണ്ടിനത്തിൽ ശേഖരിച്ച തുകയിൽ നിന്നുമായിരുന്നു അവയവമാറ്റം ഉൾപ്പെടെയുള്ള ചികിത്സകൾക്കുള്ള പണം കണ്ടെത്തേണ്ടിയിരുന്നത്. എന്നാൽ കോർപ്പസ് ഫണ്ടിൽ ഉള്ള പണം തീർന്നു എന്ന വാർത്തയാണ് മാധ്യമങ്ങളിലൂടെ പുറത്തു വരുന്നത്. ഇത് ഗുരുതര രോഗം ബാധിച്ച ജീവനക്കാരെ പ്രതികൂലമായി ബാധിക്കും.
സർക്കാർ വിഹിതമല്ലാത്ത സർക്കാർ പദ്ധതിയാണ് മെഡിസെപ്പ്. ഈ പദ്ധതിയുടെ താളം തെറ്റുന്നതിൻറെ പ്രധാന കാരണവും ഇതു തന്നെ. പ്രതിവർഷം 250 കോടിയോളം രൂപ മെഡിക്കൽ റീ-ഇംപേഴ്സ്മെൻറിനത്തിൽ ചെലവഴിച്ചിരുന്ന സർക്കാർ മെഡിസെപ്പിൽ ഒരു രൂപ പോലും വിഹിതം നൽകാൻ തയ്യാറായിട്ടില്ല. എന്നാൽ ഇതിൻറെ പരസ്യത്തിനും ഉദ്ഘാടനത്തിനുമായി കോടികൾ ആണ് ഖജനാവിൽ നിന്നും ധൂർത്തടിച്ചത്.
മാതൃകാ തൊഴിൽ ദാതാവ് എന്ന നിവലയിൽ ജീവനക്കാരുടെ ആരോഗ്യ പരിപാലനം സർക്കാരിൻറെ ചുമതലയാണ്. ഇതിൽ നിന്നും സർക്കാരിന് ഒഴിഞ്ഞുമാറാനാവില്ല.
ജീവനക്കാരുടെ ആരോഗ്യ ഇൻഷ്വറൻസ് പദ്ധതിയെ അർഹിക്കുന്ന ഗൗരവത്തോടെ കാണണം. സർക്കാർ വിഹിതം ഇതിൽ ഒഴിവാക്കാനാവില്ല. കൂടുതൽ ആശുപത്രികളും ചികിത്സാ സൗകര്യങ്ങളും ഏർപ്പെടുത്തണം. ചികിത്സയുടെ പണം സമയബന്ധിതമായി വിതരണം ചെയ്തെങ്കിൽ മാത്രമേ പദ്ധതി സുഗമമായി മുമ്പോട്ടു പോകുകയുള്ളു. എം പാനൽ ചെയ്ത ആശുപത്രികളിൽ ഭൂരിപക്ഷവും ഇപ്പോൾ ചികിത്സ നൽകുന്നതിൽ വിമുഖത കാണിക്കുകയാണ്. ചികിത്സയുടെ ചെലവ് നൽകുന്നതിനും വിവേചനം നേരിടേണ്ടി വരുന്നുണ്ട്. ഇത് പരിഹരിക്കാനുള്ള അടിയന്തിര നടപടി ഉണ്ടാകണമെന്നും അദ്ദേഹം ആവശ്യപ്പെട്ടു.