കൊല്ലം: മുൻ യുഡിഎഫ് സർക്കാരിനെ വീഴ്ത്താനും അന്നത്തെ മുഖ്യമന്ത്രി ഉമ്മൻ ചാണ്ടിയെ വേട്ടയാടാനും കരുക്കൾ നീക്കി തുടങ്ങിയത് 2015 ജൂണിൽ. സിപിഎമ്മിന്റെ മുതിർന്ന നേതാക്കളുടെ പിൻബലത്തിൽ കെ.ബി ​ഗണേഷ് കുമാറിനെ കരുവാക്കി നടപ്പാക്കിയ തിരുട്ടു നാടകമായിരുന്നു സോളാർ കേസെന്നാണു പുറത്തു വരുന്ന വിവരം. തെരഞ്ഞെടുപ്പ് സമയത്തു തന്നെ ഈ കത്ത് അന്നത്തെ പാർട്ടി സെക്രട്ടറി പിണറായി വിജയനെ കാണിച്ചിരുന്നു. തിരുവനന്തപുരത്തെ പാർട്ടി വക ഫ്ലാറ്റിൽ വച്ച് പിണറായിയുമായി രണ്ടു തവണ കൂടിക്കാഴ്ച നടത്തി. അന്നൊന്നും തന്നോടു കടക്കൂ പുറത്തെന്ന് അദ്ദേഹം പറഞ്ഞില്ലെന്ന നന്ദകുമാറിന്റെ തുറന്നു പറച്ചിലും സിപിഎമ്മിനെ വെട്ടിലാക്കി.

ആദ്യം അന്നത്തെ പ്രതിപക്ഷ നേതാവ് വി.എസ്. അച്യുതാനന്ദൻ ആവശ്യപ്പെട്ടതനുസരിച്ചാണ് കത്തിനെ കുറിച്ച് അന്വേഷിച്ചത്. സിപിഎം നേതാക്കളായ ഇ.പി. ജയരാജൻ, സജി ചെറിയാൻ എന്നിവർ ഇടപെട്ടാണ് കെ.ബി. ​ഗണേഷ് കുമാറിനെക്കൊണ്ട് കത്ത് എഴുതിച്ചതെന്ന ദല്ലാൾ നന്ദകുമാറിന്റെ വെളിപ്പെടുത്തലും രാഷ്‌ട്രീയ കേരളത്തെ നടുക്കുന്നതാണ്,

Advertisement

inner ad

കത്തിന്റെ പേരിൽ യുഡിഎഫ് വിട്ടുപോരേണ്ടി വന്നാൽ എൽഡിഎഫിൽ പ്രവേശവും കേരള കോൺ​ഗ്രസ് ബിക്ക് ക്യാബിനറ്റ് പദവിയും ഉറപ്പാക്കിയ ശേഷമാണ് സരിത നായരുടെ കത്ത് 2016ലെ തെരഞ്ഞെടുപ്പിൽ എൽഡിഎഫ് പ്രധാന ആയുധമാക്കിയത്. വ്യാജക്കത്ത് തയാറാക്കി ഉമ്മൻ ചാണ്ടിയെ സമൂഹ മധ്യത്തിൽ താറടിച്ചതിനെതിരേ കൊട്ടാരക്കര ഒന്നാം ക്ലാസ് ജുഡീഷ്യൽ മജിസ്ട്രേട്ട് കോടതിയിൽ സരിത എസ് നായർ ഒന്നാം എതിർ കക്ഷിയും കെ,ബി. ​ഗണേഷ് കുമാർ രണ്ടാം എതിർ കക്ഷിയുമായി ഉമ്മൻ ചാണ്ടിക്കു വേണ്ടി അഡ്വ. സുധീർ ജേക്കബ് ഫയൽ ചെയ്ത കേസിലും വിചാരണ നടക്കാനിരിക്കയാണ്. പ്രതികൾ നേരിട്ട് ഹാജരാകണമെന്ന് മജിസ്ട്രേട്ട് കോടതി ഉത്തരവിട്ടെങ്കിലും ഹാജരായില്ല. ഈ കേസിന്റെ അവസാന വാദം കേട്ടത് കഴിഞ്ഞ മാസം 21 നായിരുന്നു. ഈ മാസം 25നാണ് ഇനി കേസ് വിളിക്കുക.

2013 മാർച്ച് 31ന് ഭാര്യ ഡോ. യാമിനി തങ്കച്ചി തന്നെ മർദിച്ചെന്നു കാണിച്ച് അവർക്കെതിരേ ​ഗണേഷ് കുമാർ കുടുംബ കോടതിയിൽ കേസ് ഫയൽ ചെയ്തിരുന്നു. പിന്നാലെ 2013 ഏപ്രിലിൽ ​ഗണേഷ് കുമാർ വനംവകുപ്പ് മന്ത്രിസ്ഥാനം രാജിവച്ചു. പിന്നീട് ആർ. ബാലകൃഷ്ണ പിള്ള ഇട‌പെട്ട് ഡോ. യാമിനിക്കും മക്കൾക്കും നഷ്ടപരിഹാരം നൽകി ഇവരുടെ വിവാഹ ബന്ധം വേർപെടുത്തി. പിന്നാലെ 2015 മാർച്ചിൽ കേരള കോൺ​ഗ്രസ് ബി യുഡിഎഫ് വിട്ട് എൽഡിഎഫിലെത്തി. അതിനിടെയാണ് 2016ലെ നിയമസഭാ തെരഞ്ഞെടുപ്പിനു മുൻപേ ഫെബ്രുവരിയിൽ സോളാർ പരാതിക്കാരി ഉമ്മൻ ചാണ്ടിക്കെതിരെ എഴുതിയ കത്തിനെ കുറിച്ച്‌ അന്വേഷിക്കാൻ വി.എസ് ആവശ്യപ്പെട്ടത്. അങ്ങനെയാണ് അന്നു കേരള കോൺ​ഗ്രസ് ബി ജനറൽ സെക്രട്ടറിയായിരുന്ന ശരണ്യ മനോജിനെ കണ്ടതെന്ന് നന്ദകുമാർ പറയുന്നു. പരാതിക്കാരി എഴുതിയെന്ന് പറയുന്ന ഒരു ഡസനോളം കത്തുകൾ മനോജ് നൽകി. അത് താൻ വിഎസിന് കൈമാറി. പിന്നാലെ അന്നത്തെ പാർട്ടി സെക്രട്ടറിയായിരുന്ന പിണറായി വിജയനുമായും കത്ത് ചർച്ച ചെയ്തു. 2016 തിരഞ്ഞെടുപ്പ് സമയത്താണ് പിണറായിയുമായി ചർച്ച നടത്തിയത്. അന്നോന്നും പിണറായി തന്നോടു കടക്കൂ പുറത്തെന്നു പറഞ്ഞില്ലെന്നും നന്ദകുമാർ.
ഈ കത്താണ് അന്നത്തെ യുഡിഎഫ് സർക്കാരിനെ വീഴ്ത്തിയത്. അതിനു പ്രതിഫലമായി ഒന്നാം പിണറായി സർക്കാരിനു കീഴിൽ ആർ. ബാലകൃഷ്ണ പിള്ളയ്ക്ക് ക്യാബിനറ്റ് പദവിയോടെ മുന്നാക്ക ക്ഷേമ കോർപ്പറേഷൻ ചെയർമാൻ സ്ഥാനം നൽകി. ​ഗണേേഷ് കുമാർ മന്ത്രിസഭയ്ക്കു പുറത്തു നിൽക്കുകയും ചെയ്തു. വ്യാജക്കത്ത് ചൂണ്ടിക്കാട്ടി നിയമസഭയിക്കുള്ളിലും തെരഞ്ഞെടുപ്പു പ്രചാരണ യോ​ഗങ്ങളിലും വി.എസ് അച്യുതാനന്ദൻ സരീ​ഗമ- സരിതാ എന്നു നീട്ടിപ്പാ‌ടി. മുഖ്യമന്ത്രിയാകാനുള്ള വിഎസിന്റെ ശ്രമം പാളിയെന്നു മാത്രമല്ല, അഴിമതി കേസിൽ വിഎസ് ജയിലിലടച്ച ആർ. ബാലകൃ്ഷണ പിള്ളയുടെ പദവിയിലേക്ക് പിണറായി അദ്ദേഹത്തെ തരംതാഴ്ത്തുകയും ചെയ്തു. രണ്ടാം പിണറായി സർക്കാരിൽ ​ഗണേഷ് കുമാറിന് മന്ത്രിപദവി വാ​ഗ്ദാനം ചെയ്യപ്പെട്ടെങ്കിലും സഹോദരി ഉഷാ മോഹൻദാസിന്റെ എതിർപ്പ് മൂലം നടന്നില്ല. അടുത്ത നവംബറിൽ മന്ത്രിസഭ പുനഃസംഘടന പ്രതീക്ഷിച്ചെങ്കിലും പുതിയ സാഹചര്യത്തിൽ എന്തു സംഭവിക്കുമെന്ന് കണ്ടറിയണം.
ഏതായാലും ഈ മാസം 25ന് കൊട്ടാരക്കര ഒന്നാം ക്ലാസ് ജുഡീഷ്യൽ മജിസ്ട്രേട്ട് കോടതിയിൽ സരിത കേസ് വീണ്ടും വിചാരണയ്ക്കെടുക്കും. വ്യാജമായി എഴുതി ചേർക്കപ്പെട്ട നാലു പേജുകളെക്കുറിച്ചുള്ള അഡ്വ. സുധീർ ജേക്കബിന്റെ ചോദ്യങ്ങൾക്ക് മറുപടി പറയാൻ പ്രതികൾ നന്നായി വിയർക്കും.

Advertisement

inner ad