‘മരണ’ത്തെ അറിഞ്ഞിട്ടുണ്ടോ?
ഞാൻ കണ്ടറിഞ്ഞിട്ടുണ്ട്.
മരിക്കുന്നതിനും മുൻപേയായി,
അപ്പാപ്പൻ നീര് വെച്ചു കനക്കുന്നതും,
അരിച്ചുകയറുന്ന നെയ്യനുറുമ്പുകൾ
അപ്പാപ്പന്റെ ദേഹം പറ്റുന്നതും,
അപ്പാപ്പനെ തേടി പൂമ്പാറ്റകൾ പറന്നു വരുന്നതും
വരെയും കണ്ടിട്ടുണ്ട്.

അതും നോക്കി കുട്ടിയോപ്പുവാണ് പറഞ്ഞത്,
‘ചത്ത പിന്നെ ശവല്ലേ,
അതിന്റെ അവകാശ്യോളാണാ
അവകാശം ഒറപ്പിക്കാൻ വരുന്നതെ’ന്ന്.
അതിനിടയിൽ നീട്ടികൂവി കാലങ്കോഴിയുടെ
ഒച്ചയെടുത്തപ്പോഴും
കുട്ടിയോപ്പു പ്രവചിച്ചു
‘അപ്പാപ്പൻ നാളത്തോടെ തീർന്നെന്ന്’.
കിടന്നിടത്തു നിന്നൊരു മനുഷ്യൻ
പിരിഞ്ഞു
പോകുന്നതിന്റെയാ മരണദൂത് കേട്ടപ്പോ
എന്റെ നെഞ്ചുമപ്പൊ കയ്ച്ചു.
അന്ന് രാത്രിയിൽ മരണവിളി പോലെ,
ചായ്പ്പിൽ കിടന്ന പൂച്ചകൾ നിലവിളി കൂട്ടിയപ്പോ
കുട്ടിയോപ്പു പറഞ്ഞു
‘ന്തയാലും നാളത്തോടെ തീരുവ..
ന്നാ പിന്നെ അപ്പാപ്പനെ സന്തോഷിപ്പിച്ചു
യാത്രായാക്കാ’ന്ന്.

Advertisement

inner ad

കഫംകെട്ടി ഉച്ചത്തിൽ ശ്വസിച്/മരണമാസന്നമായ
അപ്പാപ്പനെ
എങ്ങനെ സന്തോഷിപ്പിക്കണം?
ബോധക്ഷയത്തിലണെങ്കിലും അപ്പാപ്പന് ചെവി കേൾക്കാം.
‘ന്നാ പിന്നെ ഒരു പാട്ടാവാമെ’ന്നായി
പണ്ടേ അപ്പാപ്പന് പ്രിയപ്പെട്ട
‘സമയമാം രഥത്തിൽ ഞാൻ സ്വർഗ്ഗ……’
പതിഞ്ഞു പോയ ഒരുപാടോർമ്മകൾ ചിതറിതെറിച്ചു
കിടപ്പുള്ളത് കൊണ്ടാകാം
അതുകേട്ടപ്പോൾ
ഇമ്പമുള്ള രീതിയിൽ അപ്പാപ്പൻ ദീര്ഘമായൊന്നു
നിശ്വസിച്ചു.
ഇഷ്ടമറിഞ്ഞപ്പോ ഞങ്ങളും പാട്ടുച്ചത്തിലാക്കി.

പാട്ടിന്റാവേഗം അപ്പാപ്പന്റെ ശ്വാസ
-ത്തിന് നെടുകെ പോറലേല്പിച്ചു.
ശ്വാസം വർദ്ധിക്കുകയും,
ക്രമാതീതമായി മാറുകയും ,
ചുണ്ട് നീലിച്ചും തുടങ്ങിയപ്പോ
കുട്ടിയോപ്പു പറഞ്ഞു
‘ഒച്ച കൊറക്കെടി..ഇപോ തീരുമെന്ന്’
ഞാൻ പാട്ടോഫാക്കിയപ്പോ അപ്പാ
-പ്പന്റെ ചെവിയിൽ
അന്ത്യകൂദാശ ചൊല്ലാൻ
കുട്ടിയോപ്പു തുനിയുന്നതിനും
മുൻപേ അപ്പാപ്പന്റെ ദേഹം
ചൂട് കയറി,
പിടിച്ചു വെച്ച മലവും,മൂത്രവും
ഒഴുകി വീണു,
കൃഷ്ണമണി വികസിച്ചു വികസിച്ചു കയറിയപ്പോ
എവിടന്നോ ഒരു കാക്ക മുറിക്കകം പറന്നു
വന്നപ്പാപ്പന്റെ കട്ടിലിലേക്ക് ചത്തു വീണു.
അതിന്റെ തൂവൽ അപ്പാപ്പന്റെ
ദേഹത്തേക്ക് പൊഴിഞ്ഞു വീണപ്പോ
ശകുനം ഉറപ്പിച്ച കുട്ടിയോപ്പു
‘തീർന്നു’ന്നും പറഞ്ഞു
വാവിട്ടലറി.
അപ്പാപ്പൻ നിശ്ചലമായി.

Advertisement

inner ad

എന്റെ നെഞ്ചറച്ചു.
അന്തരീക്ഷം കയ്ച്ചു.
‘തീർന്ന’ അപ്പാപ്പനെ നിവർത്തി
കിടത്താൻ ആളുകൾ
വന്നുനിറയുന്നതിനും
മുൻപെയുമായി ഞാൻ മുറി
വിടുമ്പോൾ കുട്ടിയൊപ്പു
പറഞ്ഞില്ലെങ്കി കൂടി
എനിക്കറിയാമായിരുന്നു
ഇനിയിപ്പോ അപ്പാപ്പന്റെ ശവം
മണ്ണടിയുമെന്നും,
ആ ശവത്തിന്റോവകാശം,
ബാക്ടീരിയക്കുള്ളതാണെന്നും.

മരണത്തെ കണ്ടറിഞ്ഞതിന്റെ കുറിപ്പ്!!

Advertisement

inner ad