കുണ്ടറ: സംസ്ഥാനത്ത് നടക്കുന്നത് സെൽഭരണം ആണെന്ന് എഐസിസി അംഗം ഡോ. ശൂരനാട് രാജശേഖരൻ. രാഷ്ട്രീയ പകപോക്കലിനും മാധ്യമ വേട്ടയ്ക്കുമെതിരെ കുണ്ടറ കോൺഗ്രസ്‌ ബ്ലോക്ക് കമ്മിറ്റിയുടെ നേതൃത്വത്തിൽ നടത്തിയ പോലീസ് സ്റ്റേഷൻ മാർച്ച് ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം. ഈ പ്രതിഷേധം ഒരു മുന്നറിയിപ്പ് ആണെന്നും സമാനമായ മുന്നറിയിപ്പ് ചരിത്രത്തിലും ഉണ്ടായിട്ടുണ്ടെന്നും അദ്ദേഹം ഓർമ്മപ്പെടുത്തി. 1957 ലും 67ലും അന്നത്തെ ഇഎംഎസ് സർക്കാർ കോൺഗ്രസിന്റെ മുന്നറിയിപ്പ് അവഗണിച്ചു. പിന്നീട് നേരിടേണ്ടി വന്നത് കടുത്ത പ്രതിഷേധത്തെ ആയിരുന്നു. അന്ന് കെ കരുണാകരന്റെ നേതൃത്വത്തിൽ നടത്തിയ മുന്നേറ്റത്തിന് മുൻപിൽ ഇഎംഎസിന് പിടിച്ചുനിൽക്കുവാനായില്ല. പശ്ചിമബംഗാളിലും സമാനമായ സെൽഭരണം സിപിഎം നടത്തിയതുകൊണ്ടാണ് അവിടെ അടിവേര് പോലും നഷ്ടപ്പെട്ടത്. അഴിമതിയും സ്വജനപക്ഷപാദവും നടത്തുന്ന സർക്കാരിന് നിലനിൽക്കുവാൻ പോലീസിനെ ഉപയോഗിക്കുകയാണ്. ത്രിപുര എങ്ങനെയാണ് സിപിഎമ്മിന് കൈമോശം വന്നതെന്നതും കേരളത്തിലെ സിപിഎമ്മിന് മുന്നറിയിപ്പ് ആണെന്നും അദ്ദേഹം പറഞ്ഞു. പ്രളയബാധിതരായി വീട് നഷ്ടപ്പെട്ടവർക്കായി വീട് നിർമിച്ച് നൽകിയതിനാണ് പ്രതിപക്ഷ നേതാവിനെതിരെ കേസെടുത്തിരിക്കുന്നത്. 2018ലെ സംഭവത്തിൽ 2023ൽ കേസെടുത്തത് രാഷ്ട്രീയ പകപോക്കലിന്റെ ഭാഗമായാണ്. യാതൊരു മാനദണ്ഡവും ഇല്ലാതെയാണ് കേസെടുത്തത്. കെപിസിസി പ്രസിഡന്റ് കെ സുധാകരനെതിരായ കേസിലും അദ്ദേഹത്തിനും പാർട്ടിക്കും ഒന്നും മറയ്ക്കുവാനില്ല. സുധാകരനെതിരെ ഇല്ലാത്ത മൊഴി ഉണ്ടെന്ന് പറഞ്ഞത് സിപിഎം സംസ്ഥാന സെക്രട്ടറി ആണെന്നും അദ്ദേഹത്തിന് ആ സ്ഥാനത്ത് ഇരിക്കുവാൻ യോഗ്യത ഇല്ലെന്നും ശൂരനാട് രാജശേഖരൻ കൂട്ടിച്ചേർത്തു.