സിപിഎം സംസ്ഥാന സെക്രട്ടറി ആകുന്നതിനു മുൻപ് എം.വി. ഗോവിന്ദൻ അധ്യാപകനായിരുന്നു. സ്കൂൾ ക്ലാസുകളിൽ മാത്രമല്ല പാർ‌ട്ടി ക്ലാസുകളിലും തിളങ്ങി. പാർട്ടിയുടെ നയപരിപാടികളും സമീപനങ്ങളും പാർ
ട്ടി അച്ചടക്കവുമൊക്കെ അണികളെ പഠിപ്പിക്കാൻ ചുമതലപ്പെട്ട ആളായിരുന്നു ഗോവിന്ദൻ. അദ്ദേഹത്തിന്റെ ക്ലാസുകളിലിരുന്ന സാധാരണ കുട്ടികളുടെ കാര്യം പോകട്ടെ, പാർട്ടി ക്ലാസുകളിൽ പങ്കെടുത്ത സഖാക്കളാണ് ഗുരുവിനോട് കൂ‌ടുതൽ നീതി പുലർത്തുന്നത്. സ്കൂളിലും പാർട്ടിയിലും മാഷ് ആയിരുന്നതു കൊണ്ട് ഗോവിന്ദന് എസ്എഫ്ഐയുമായി വളരെ അടുത്ത ബന്ധം സ്വാഭാവികമാണ്. അതുകൊണ്ടാണ് എറണാകുളം മഹാരാജാസ് കോളെജിലെ വ്യാജ രേഖ കേസിലും എസ്എഫ്ഐ സംസ്ഥാന സെക്രട്ടറി പി.എ. അർഷോ ഉൾപ്പെട്ട പരീക്ഷാ വിവാദത്തിലും അരയും തലയും മുറുക്കി അദ്ദേഹം കുട്ടിസഖാക്കൾക്കൊപ്പം നിൽക്കുന്നത്.

കുട്ടിസഖാക്കളെ സംരക്ഷിക്കുന്നതിന് ഗോവിന്ദൻ മാധ്യമങ്ങൾക്കു നേരേയാണ് വാളെടുക്കുന്നത്. സർക്കാർ വിരുദ്ധ, എസ്എഫ്ഐ വിരുദ്ധ പ്രചാരണവുമായി മാധ്യമങ്ങളുടെ പേരു പറഞ്ഞു നടന്നാൽ ഇനിയും കേസിൽ ഉൾപ്പെടുത്തുമെന്നാണ് ഭീഷണി. മാധ്യമങ്ങൾക്കു മാധ്യമങ്ങളുടെ സ്റ്റാൻഡ് ഉണ്ട്. അതിലേ നിൽക്കാവൂ എന്നാണ് അദ്ദേഹത്തിന്റെ ഉപദേശം.
മാധ്യമങ്ങളുടെ സ്റ്റാൻഡ് നിശ്ചയിക്കാൻ ഗോവിന്ദൻ മാഷിന് ആരാണ് അധികാരം നൽകിയതെന്ന് അറിഞ്ഞുകൂടാ.

കാലത്തിനു നേർക്കു നീട്ടിപ്പിടിക്കുന്ന കണ്ണാടിയാണ് മാധ്യമങ്ങളെന്നാണു വയ്പ്. ചുറ്റും നടക്കുന്ന കാര്യങ്ങളെല്ലാം ഈ കണ്ണാടിയിൽ പതിയും. അതു സമൂഹത്തിനു കാണിച്ചുകൊടുക്കുന്ന പണി മാത്രമാണ് മാധ്യമ പ്രവർത്തകർക്കുള്ളത്. അതാണ് ന്യൂസ്. ചിലപ്പോഴെല്ലാം ഈ കണ്ണാടിയിൽ പതിയുന്ന ദൃശ്യങ്ങൾക്ക് ചില വിശകലനങ്ങളും വിശദീകരണങ്ങളും ആവശ്യമായി വന്നേക്കാം. ഉത്തരവാദിത്വമുള്ള മാധ്യമ പ്രവർത്തകർ അതിനുകൂടി സന്നദ്ധരും സജ്ജരുമായിരിക്കണം. അവർ ജോലി ചെയ്യുന്ന പത്ര-മാധ്യമങ്ങളുടെ നയങ്ങൾക്കനുസരിച്ചുള്ള വിശകലനങ്ങളായിരിക്കും മാധ്യമ പ്രവർത്തകർ നൽകുന്നത്. അതാണു വ്യൂസ്. ന്യൂസും വ്യൂസും കൂടിക്കലർന്നതാണ് മാധ്യമ പ്രവർത്തനം.
ഓരോ പത്രത്തിന്റെയും ചാനലിന്റെയും ന്യൂസും വ്യൂസും നിശ്ചിക്കുന്നതിന് അവയുടെയെല്ലാം തലപ്പത്ത് ശക്തമായ നേതൃത്വമുണ്ട്. ദേശാഭിമാനിയുടെ ന്യൂസും വ്യൂസും ഗോവിന്ദൻ മാഷ് തീരുമാനിക്കുന്നതിൽ തെറ്റില്ല. മറ്റു മാധ്യമങ്ങളുടെ വായ മൂടാൻ വന്നാൽ നടപ്പില്ല, സഖാവേ. അതുകൊണ്ട് ഗവണ്മെന്റിനും എസ്എഫ്ഐക്കും എതിരേ വാർത്ത കൊടുത്താൽ കേസെടുക്കും ജെയിലിലടയ്ക്കും എന്നൊക്കെ പറയുന്നത് പാർട്ടി ക്ലാസിലോ ദേശാഭിമാനിയിലോ മതി, കേരളത്തിലെ മറ്റു മാധ്യമ  പ്രവർത്തകരോടു വേണ്ട.
 സിപിഎമ്മിലോ ഏതെങ്കിലും പോഷക സംഘടനകളിലോ അംഗത്വമോ നേതൃത്വമോ ഉണ്ടെങ്കിൽ എന്തും ചെയ്യാനുള്ള ലൈസൻസായി മാറിയിട്ടുണ്ട്. ട്രേഡ് യൂണിയൻ, സർവീസ്, വിദ്യാർഥി യൂണിയൻ തുടങ്ങിയ സമസ്ത മേഖലയിലും സ്ഥിതി ഇതാണ്. ഈ ധാർഷ്ട്യം അഥവാ ധിക്കാരമാണ് എറണാകുളം മഹാരാജാസ് കോളെജിലും നടന്നത്.

കേരളത്തിലെ ഏറ്റവും സമ്പന്നമായ ക്യാംപസുകളിലൊന്നാണിത്. അവിടെ പഠിപ്പിച്ചവരും പഠിച്ചവരും സമൂഹത്തിന്റെ ഏതേതൊക്കെ നിലകളിൽ എത്തിയെന്ന് ഒന്നോർത്താൽ കൊള്ളാം. സ്വയംഭരണാവകാശമുള്ള ഈ വലിയ ക്യാംപസിന്റെ പേരിൽ വ്യാജ രേഖ ചമച്ച് ഒരു പാർട്ടി സഖാവ് സർക്കാർ ജോലി തരപ്പെടുത്താൻ നടത്തിയ ശ്രമങ്ങളെ എങ്ങനെ നിസാരവൽക്കരിക്കാനാവും. അതിന്റെ അന്വേഷണത്തിനാണ് മാധ്യമ പ്രവർത്തകർ ക്യാംപസിലെത്തിയത്. ഏഷ്യാനെറ്റ് ചാലനിലിന്റെ ചീഫ് റിപ്പോർട്ടർ അഖില നന്ദകുമാർ ക്യാംപസിലെത്തിയതും അതിനു തന്നെയാണ്.
ഈ അന്വേഷണത്തിലാണ് വ്യാജ രേഖ ചമച്ച കെ. വിദ്യ എന്ന പെൺകുട്ടി എസ്എഫ്ഐ നേതാവായിരുന്നു എന്നും ഇപ്പോഴത്തെ സംസ്ഥാന സെക്രട്ടറി പി.എം. ആർഷോയുമായി വളരെ അടുപ്പമുണ്ടെന്നുമുള്ള വസ്തുകൾ തെളിവു സഹിതം പുറത്തു വരുന്നത്.

ഓരോ ദിവസത്തെയും സംഭവങ്ങളെ വാർത്തയാക്കുന്ന മാധ്യമ പ്രവർത്തകർക്കു മുന്നിൽ ആർഷോമിന്റെ മാർക്ക് ലിസ്റ്റ് ലഭിക്കുന്നത് യാദൃച്ഛികം. അതിലെ വിവരങ്ങൾ പ്രിൻസിപ്പാളിനോടും സംഭവം പുറത്തു വിട്ട കെഎസ്‌യു പ്രവർത്തകരോടും ചോദിച്ചറിയുകയാണ് അഖിലയും മറ്റ് മാധ്യമ പ്രവർത്തകരും ചെയ്തത്. അങ്ങനെ ചോദ്യങ്ങൾ ചോദിക്കുന്നവരെ  ഭയപ്പെടുത്തി നിശബ്ദരാക്കുക എന്ന ഫാസിസ്റ്റ് രീതിയാണ് സിപിഎം സംസ്ഥാന സെക്രട്ടറിയുടെ വാക്കുകളിൽ പ്രതിഫലിക്കുന്നത്.

എസ്എഫ്ഐ എന്നാൽ ക്യാംപസുകളിൽ എന്തും ചെയ്യാൻ ലൈസൻസ് ഉള്ളവർ എന്നാണോ അർഥം? ഗോവിന്ദന് ചിലപ്പോൾ അങ്ങനെയാവാം. പക്ഷേ, കേരളീയ പൊതു സമൂഹത്തിന് അങ്ങനെയല്ല. സിപിഎമ്മിലോ എസ്എഫ്ഐയിലോ അംഗത്വമുണ്ടെങ്കിൽ ക്യാംപസിൽ മറ്റാരും വേണ്ടന്ന കാടൻ ന്യായം ആരും അംഗകീരിക്കാൻ പോകുന്നില്ല.  കാട്ടാക്കട ക്രൈസ്റ്റ് കോളെജിലെ തെരഞ്ഞെടുക്കപ്പെട്ട കൗൺസിലർക്കു പകരം തെരഞ്ഞെടുപ്പിൽ മത്സരിക്കാൻ യോഗ്യത പോലുമില്ലാത്ത ആളെ സർവകലാശാലയിലേക്ക് എൻ‌റോൾ ചെയ്ത എസ്എഫ്ഐ നെറികേട് പുറത്തു കൊണ്ടു വന്നതും മാധ്യമങ്ങളായിരുന്നു. അതേ തുടർന്നു ന‌ടത്തിയ അന്വേഷണത്തിലാണ് ആൾമാറാട്ടത്തിന്റെ കൂടുതൽ കഥകൾ പുറത്തു വന്നതും 39 കൗൺസിലർമാർ അയോഗ്യരായതും.

ഇങ്ങനെ എത്രയെത്ര സംഭവങ്ങളുണ്ട്, മാധ്യമങ്ങളുടെ പണി കൂട്ടാൻ. കണ്ണൂർ സർവകലാശായിൽ നടന്ന നെറികേടുകൾ മാത്രം മതി എം.വി. ഗോവിന്ദന്റെ ഭീഷണി മാറ്റി വച്ച് കേരളത്തിലെ മുഴുവൻ മാധ്യമ പ്രവർത്തകരും കേരളത്തിലെ ഓരോ സർവകലാശാലയിലും സ്വന്ത നിലയിൽ ബീറ്റ് നിശ്ചയിക്കും. മുഖ്യമന്ത്രി പിണറായി വിജയന്റെ പ്രൈവറ്റ് സെക്രട്ടറി കെ.കെ. രാകേഗേഷിന്റെ ഭാര്യ ഡോ. പ്രിയ വർഗീസിനെ കണ്ണൂർ സർവകലാശാലയിൽ അസോസിയേറ്റ് പ്രൊഫസറായി നിയമിക്കാൻ നടത്തിയ നീക്കങ്ങൾ കേരളത്തിൽ കേട്ടു കേൾവിയില്ലാത്തതാണ്. എറണാകുളത്ത് കെ. വിദ്യ നടത്തിയതിനെക്കാൾ വലിയ അഴിമതിയാണ് കണ്ണൂരിൽ ഡോ. പ്രിയ ന‌ടത്തിയത്.
അസോസിയേറ്റ് പ്രൊഫസറാകാൻ മതിയായ യോഗ്യത ഇല്ലാതിരുന്ന പ്രിയ, കൃത്രിമായി ചമച്ച രേഖകളിലൂടെയാണ് അധ്യയന പരിചയമടക്കമുള്ള യോഗ്യത അവകാശപ്പെട്ടത്. പ്രിയയുടെ നിയമനത്തിനു സാധൂകരണം എന്ന ഒരൊറ്റ അജൻഡയായിരുന്നു, സർവകലാശാല നിയമങ്ങളും കീഴ് വഴക്കങ്ങളും മറികടന്ന് പ്രൊഫ. ഗോപിനാഥ് രവീന്ദ്രനെ അവിടെ വിസി ആയി നിയമിച്ചത്. ഈ നിയമനത്തിനു ഗോപിനാഥ് രവീന്ദ്രന്റെ യോഗ്യത അദ്ദേഹം മുഖ്യമന്ത്രി പിണറായി വിജയന്റെ നാട്ടുകാരനും അടുപ്പക്കാരനും എന്നതു മാത്രമായിരുന്നു എന്നു നമ്മോടു പറഞ്ഞത് സാക്ഷാൽ ഗവർണർ ആരിഫ് മുഹമ്മദ് ഖാനാണ്. അതിന്റെ പേരിൽ കേരളത്തിലെ സർക്കാർ സർവകലാശാലയുടെ ഭരണത്തലവന്റെ പദവിയിൽ നിന്ന് ഗവർണറെ ഒഴിവാക്കാൻ നിയമുണ്ടാക്കിയ സർക്കാരാണ് എം.വി. ഗോവിന്ദന്റെ പാർ‌ട്ടി നയിക്കുന്നതെന്നും മറക്കരുത്.

തിരുവനന്തപുരത്തെ യൂണിവേഴ്സിറ്റി കോളെജ് വിദ്യാർഥികളായിരിക്കെ, വ്യാജരേഖകളുണ്ടാക്കി സർവകലാശാല ബിരുദം നേടുകയും പിഎസ്‌സി നടത്തിയ സിവിൽ പൊലീസ് ഓഫീസർ പരീക്ഷയിൽ ഒന്നും രണ്ടും റാങ്ക് നേടിയ ശിവരഞ്ജിത്തിനും നസീമിനും അതിനുള്ള ധൈര്യം എവിടെ നിന്നു കിട്ടി എന്നുകൂടി ഗോവിന്ദൻ മാഷ് ഒന്നന്വേഷിക്കണം. ഇവരുടെ കള്ളത്തരങ്ങൾ വെളിച്ചത്തു കൊണ്ടു വന്നതും ഇവിടുത്തെ മാധ്യമങ്ങളാണ്. അതുകൊണ്ട്, മാധ്യമങ്ങളുടെ അന്വേഷണം തുടരുക തന്നെ ചെയ്യും. കാരണം ഗോവിന്ദൻ മാഷുടെ പാർട്ടിയും പോഷക സംഘടനകളും സർക്കാർ തന്നെയും അഴിമതിയിൽ മുങ്ങിക്കുളിച്ചാണു നിൽപ്. അതിനെതിരേ ചാ‌ടിവീഴുന്ന കാവൽനായ്ക്കളായി മാധ്യമപ്പട സദാ ജാഗരൂകരായിരിക്കും. അറസ്റ്റ് കൊണ്ടും ഭീഷണി കൊണ്ടും അവരെ തടയാമെന്ന ആഗ്രഹം ഗോവിന്ദൻ മാഷുടെ അതിമോഹം മാത്രം!.

Advertisement

inner ad