സംസ്ഥാനത്ത് നിയമന നിരോധനം ; ഇടതു സർക്കാരിനെതിരെ പ്രമേയവുമായി എ ഐ എസ് എഫ്

കൊച്ചി : സംസ്ഥാനത്തെ ഇടതുസര്‍ക്കാരിനെതിരെ പ്രമേയം പാസാക്കി സിപിഐ വിദ്യാര്‍ത്ഥി സംഘടന എഐഎസ്എഫ്. കാലടി സംസ്‌കൃത സര്‍വ്വകലാശാല യൂണിറ്റ് സമ്മേളനത്തിലാണ് സര്‍ക്കാരിനെതിരെ പ്രമേയം പാസാക്കിയത്. ഏപ്രില്‍ ഒന്നിന് പുറത്തിറക്കിയ അധ്യാപക നിയമന ഭേദഗതി ഉത്തരവിനെതിരെയാണ് പ്രമേയം. ഉന്നത വിദ്യാഭ്യാസ മേഖലയിലെ വിദ്യാര്‍ത്ഥികളേയും ഗവേഷകരേയും പ്രതികൂലമായി ബാധിക്കുന്ന നിയമമാണിതെന്നും പലരുടേയും അധ്യാപന സ്വപ്‌നമാണ് ഇതിലൂടെ തകരുന്നതെന്നും പ്രമേയത്തില്‍ പറയുന്നു. പുതിയ അധ്യാപക തസ്തിക രൂപപ്പെടുന്നതിന് മുമ്പുണ്ടായിരുന്ന ഒമ്പത് മണിക്കൂര്‍ വര്‍ക്കിങ് അവര്‍ എന്നത് 16 മണിക്കൂര്‍ എന്നാക്കി മാറ്റിയതോടെ അധ്യാപക തസ്തിക നിരോധന നിയമമാണ് സര്‍ക്കാര്‍ നടപ്പിലാക്കുന്നത്. അധ്യാപക തൊഴില്‍ നിരോധന നിയമം പിന്‍വലിക്കാന്‍ സര്‍ക്കാര്‍ തയ്യാറാവണമെന്നുമാണ് പ്രമേയത്തിലൂടെ എഐഎസ്എഫ് ആവശ്യപ്പെട്ടത്. സമ്മേളനത്തില്‍ കേന്ദ്ര സര്‍ക്കാരിനെതിരെയും പ്രമേയം പാസാക്കി. സംസ്ഥാനത്ത് ഇടതു സർക്കാരിനെതിരെ സിപിഐയുടെ വിദ്യാർത്ഥി സംഘടനയായ എ ഐ എസ് എഫ് പ്രമേയം പാസാക്കിയത് മുന്നണിക്കുള്ളിൽ ചർച്ച ആകുവാൻ സാധ്യതയുണ്ട്.

Related posts

Leave a Comment