മന്ത്രി എംബി രാജേഷിന്റെ പ്രസ്താവന തിരിച്ചടിയായി

പ്രത്യേക ലേഖകൻ

Advertisement

inner ad

തിരുവനന്തപുരം: കരുവന്നൂർ സഹകരണ ബാങ്കിലെ തട്ടിപ്പുമായി ബന്ധപ്പെട്ടുള്ള ചർച്ചകളിൽ സിപിഎമ്മിൽ ഭിന്നാഭിപ്രായം ശക്തം. പാർട്ടി സെക്രട്ടറി എംവി ഗോവിന്ദനും മന്ത്രി എംബി രാജേഷും ഉൾപ്പെടെയുള്ള പല നേതാക്കളും തട്ടിപ്പിനെ വെള്ളപൂശാൻ ശ്രമിക്കുമ്പോൾ, ഉപ്പുതിന്നവർ വെള്ളം കുടിക്കട്ടെയെന്ന നിലപാടാണ് സിപിഎമ്മിലെ മറ്റു ചില നേതാക്കൾ സ്വീകരിക്കുന്നത്. ലോക്സഭാ തെരഞ്ഞെടുപ്പ് ആസന്നമായിരിക്കെ ബാങ്ക് കൊള്ള സമൂഹത്തിലുണ്ടാക്കാൻ പോകുന്ന പ്രത്യാഘാതങ്ങളെക്കുറിച്ച് പാർട്ടിക്ക് നല്ലബോധ്യം ഉണ്ടാകണമെന്ന് ഉപദേശിക്കുന്ന ചില മുതിർന്ന നേതാക്കളും പാർട്ടിയിലുണ്ട്. എന്നാൽ പരസ്യ പ്രസ്താവന നടത്തി വിഷയം വഷളാക്കാനില്ലെന്നും പാർട്ടിയെ വളഞ്ഞിട്ട് ആക്രമിക്കാനുള്ള അവസരം ഉണ്ടാക്കരുതെന്നുമാണ് സിപിഎമ്മിലെ പൊതുധാരണ.
കേരളത്തിലെ സഹകരണ പ്രസ്ഥാനത്തിന്റെ മുഖത്തേറ്റ കറുത്തപാടാണ് കരുവന്നൂർ സഹകരണ ബാങ്ക് തട്ടിപ്പെന്ന് സ്പീക്കർ എ.എം ഷംസീർ തുറന്നുപറയുമ്പോൾ, സഹകരണ മേഖലയുടെ മുഖത്ത് ഒരു കറുത്തപാടും ഉണ്ടായിട്ടില്ലെന്നാണ് എംവി ഗോവിന്ദന്റെ വിശദീകരണം. ഇന്നലെ മാധ്യമങ്ങൾ ഇതേക്കുറിച്ച് ചോദിച്ചപ്പോൾ കൂടുതൽ വിശദീകരണം നൽകാതെ പാർട്ടി സെക്രട്ടറി തലയൂരി. അപ്പോഴും, കരുവന്നൂരിൽ ചില തെറ്റായ പ്രവണതകളുണ്ടായെന്ന് എംവി ഗോവിന്ദൻ സമ്മതിക്കുന്നു. അതേസമയം, പാർട്ടിക്ക് ജാഗ്രതക്കുറവുണ്ടായോ എന്ന ചോദ്യത്തിന്, ഇല്ലെന്നായിരുന്നു മറുപടി.  
‘ഈ വിഷയത്തിൽ പാർട്ടിക്ക് ജാഗ്രതക്കുറവൊന്നും ഉണ്ടായിട്ടില്ല. പക്ഷേ, അവിടെ ചില സംഭവങ്ങളുണ്ടായിട്ടുണ്ട്. അത് തെറ്റായ പ്രവണതയാണ്. ആ തെറ്റായ പ്രവണതകളെ മാറ്റി ശരിയായ ദിശയിലേക്ക് കാര്യങ്ങളെ നയിക്കുക എന്നതാണ് ഉദ്ദേശിക്കുന്നത്. അത് എവിടെയായാലും അതേ നിലപാടു തന്നെയാണ്. ഈ നിലപാടിൽനിന്ന് ഒരു വിട്ടുവീഴ്ചയും ചെയ്യാൻ പാർട്ടി ഉദ്ദേശിക്കുന്നില്ല. അത്രേയുള്ളൂ.’ – ഗോവിന്ദൻ വിശദീകരിച്ചു. ഇതിനിടെ, സഹകരണ മേഖലയുടെ മുഖത്ത് കറുത്തപാടുണ്ടാക്കാൻ നിങ്ങൾ ശ്രമിക്കേണ്ടെന്ന് പറഞ്ഞ് അദ്ദേഹം മാധ്യമങ്ങളെ വിമർശിക്കുകയും ചെയ്തു.
അതേസമയം, ബാങ്ക് തട്ടിപ്പുമായി ബന്ധപ്പെട്ട് തദ്ദേശസ്വയംഭരണ മന്ത്രി എംബി രാജേഷ് നടത്തിയ പ്രസ്താവന തിരിച്ചടിയായെന്ന വിലയിരുത്തലും പാർട്ടിയിലുണ്ട്. കരുവന്നൂർ ബാങ്ക് തട്ടിപ്പ് അത്രവലിയ പ്രശ്നമാണോയെന്നായിരുന്നു കഴിഞ്ഞ ദിവസം മന്ത്രി എംബി രാജേഷ് മാധ്യമങ്ങളോട് ചോദിച്ചത്. വിഷയത്തെ നിസാരവത്ക്കരിച്ച് തലയൂരാനുള്ള ശ്രമമാണ് മന്ത്രി നടത്തിയതെങ്കിലും ബാങ്കിലെ നിക്ഷേപകരായ പാർട്ടിക്കാർ, തട്ടിപ്പ് വലിയ പ്രശ്നം തന്നെയാണെന്ന് മന്ത്രിയെ തിരുത്തി. പ്രതികൾക്കൊപ്പമാണു മന്ത്രിയെന്നും സഹകരണ ബാങ്കുകളിലെ കൊള്ളകളെ ന്യായീകരിക്കുകയാണെന്നും വിമർശനം ഉയർന്നതോടെ കരുവന്നൂർ ക്രമക്കേട് ഗൗരവമാണെന്ന് പിന്നീട് മന്ത്രിക്കു തിരുത്തേണ്ടിവന്നു. എംബി രാജേഷിന്റെ വിടുവായത്തരത്തിൽ പാർട്ടി പെട്ടുവെന്ന് മനസിലാക്കി ജാഗ്രതയോടെയാണ് മന്ത്രി പി രാജീവ് പ്രതികരണം നടത്തിയത്. കരുവന്നൂരിൽ സംഭവിച്ചതു ഗൗരവമുള്ള കാര്യമെന്നായിരുന്നു പി. രാജീവിന്റെ അഭിപ്രായം.
ബാങ്കു കൊള്ളയിൽ പ്രതിസ്ഥാനത്ത് നിൽക്കുന്നത് പാർട്ടിയിലെ ഉന്നതരാണെന്നതാണ് നിലവിൽ സിപിഎമ്മിന് മുന്നിലെ വെല്ലുവിളി. മന്ത്രി എ.സി മൊയ്തീനും മുൻ എംപി പി.കെ ബിജുവും പ്രത്യക്ഷത്തിൽ തട്ടിപ്പിൽ ഉൾപ്പെട്ടിട്ടുണ്ടെന്നാണ് എൻഫോഴ്സ്മെന്റ് ഡയറക്ടറേറ്റ് നൽകുന്ന സൂചന. ഇരുവർക്കുമെതിരെ അറസ്റ്റ് ഉൾപ്പെടെയുള്ള നടപടികളുമായി ഇ.ഡി മുന്നോട്ടുപോയാൽ പാർട്ടി കൂടുതൽ പ്രതിസന്ധിയിലാകും. ഈ സാഹചര്യം ഒഴിവാക്കാനാണ് ഇ.ഡിക്കെതിരെ പാർട്ടി രംഗത്തുവന്നത്. പ്രാദേശിക നേതാവിനെ മുന്നിൽ നിർത്തി ഇ.ഡിക്കെതിരെ പൊലീസ് നടപടിക്കായിരുന്നു ആലോചന. എന്നാൽ, ഇ.ഡി മർദ്ദിച്ചുവെന്ന നേതാവിന്റെ പരാതിയിൽ കഴമ്പില്ലെന്ന് വാദിക്കാൻ എൻഫോഴ്സ്മെന്റ് ഡയറക്ടറേറ്റ് ഉദ്യോഗസ്ഥർ സിസി ടിവി ക്യാമറാ തെളിവുകൾ മുന്നോട്ടുവെയ്ക്കുന്നു. അതിനാൽ, സ്വർണക്കടത്ത് കേസിലെ അന്വേഷണ വേളയിൽ ഇ.ഡിക്കെതിരെ ഉയർത്തിയ രാഷ്ട്രീയ പ്രതിരോധം ഇക്കുറി ഏശാനിടയില്ലെന്ന് പാർട്ടി നേതാക്കൾ തന്നെ അഭിപ്രായമുയർത്തുന്നു.  
സമീപകാലത്ത് സിപിഎമ്മുകാർ പ്രതിയായ പല കേസുകളിലും എതിരാളികളും സാക്ഷികളും ഭിന്ന രാഷ്ട്രീയക്കാരായിരുന്നു. അതിനാൽ രാഷ്ട്രീയമായി വേട്ടയാടാൻ ശ്രമിക്കുന്നെന്ന  ന്യായീകരണത്തോടെ പാർട്ടി പിടിച്ചുനിന്നു. ടി.പി. ചന്ദ്രശേഖരൻ വധത്തിലും നിയമസഭാ അക്രമക്കേസിലും ഈ നയമായിരുന്നു പാർട്ടിയുടേത്. എന്നാൽ, ബാങ്കു കൊള്ള കേസിൽ പെട്ടെന്ന് തലയൂരാനാകില്ലെന്ന് വ്യക്തം.

Advertisement

inner ad