ജനാധിപത്യത്തെ പണാധിപത്യം കൊണ്ട് അട്ടിമറിക്കുന്ന ഭാരതീയ ജനതാ പാർട്ടിയെ ദക്ഷിണേന്ത്യയിൽ നിന്നു തുരത്തിയോടിക്കാനുള്ള വടി വെട്ടി കാത്തിരിക്കുകയാണ് കർണാടകയിലെ ജനങ്ങൾ. കോൺ​ഗ്രസ് മുക്ത ഭാരതമെന്ന നരേന്ദ്ര മോദിയുടെ സ്വപ്നം ഈ മാസം പത്തിന് നടക്കുന്ന കർണാടക നിയമസഭാ തെരഞ്ഞെടുപ്പോടെ ചാമ്പലാകും. കഴിഞ്ഞ വർഷം ഡിസംബറിൽ ഹിമാചൽ പ്രദേശിൽ ബിജെപിയെ തൂത്തെറിഞ്ഞ് കോൺ​ഗ്രസ് അധികാരം പിടിച്ചതിന്റെ ക്ഷീണം മാറുന്നതിനു മുൻപേ, കർണാടകത്തിലും കടുത്ത തോൽവിയാണ് നരേന്ദ്ര മോദിയെയും അമിത്ഷായെയും കാത്തിരിക്കുന്നത്.

തെക്കേ ഇന്ത്യയിൽ ഇതുവരെ ബിജെപി ആകെ പച്ച തൊട്ടത് കർണാടകയിൽ മാത്രമാണ്. കേരളത്തിൽ ഇപ്പോഴും വട്ടപ്പൂജ്യം. തമിഴ്നാട്, തെലങ്കാന, പോണ്ടിച്ചേരി, ആന്ധ്രപ്രദേശ് എന്നീ മറ്റ് തെക്കേ ഇന്ത്യൻ സംസ്ഥാനങ്ങളിലൊന്നും ബിജെപിക്കു കാര്യമായ വേരോട്ടമില്ല. അതുകൊണ്ടു തന്നെ കർണാടകയിലെ പതനം ബിജെപിക്ക് താങ്ങാവുന്നതിനപ്പുറമാണെന്ന് ഉറപ്പ്. കേരളത്തിലൊഴികെ അതതു സംസ്ഥാനങ്ങളിലെ പ്രാദേശിക കക്ഷികൾക്കാണ് നിലവിൽ ഭരണം. അടുത്ത വർഷം നടക്കാനിരിക്കുന്ന പാർലമെന്റ് തെരഞ്ഞെടുപ്പിൽ കോൺ​ഗ്രസ് നേതൃത്വത്തിലുള്ള ശക്തമായ പ്രതിപക്ഷ ഐക്യത്തിലൂടെ ഇന്ദ്രപ്രസ്ഥത്തിൽ ബിജെപി വിരുദ്ധ സർക്കാർ രൂപീകരണത്തിനുള്ള അങ്കപ്പുറപ്പാട് കൂടിയാണു കർണാടക തെരഞ്ഞെടുപ്പ്.

തെരഞ്ഞെടുപ്പിനു മുന്നോടിയായുള്ള അഭിപ്രായ സർവേകളിലെല്ലാം കോൺ​ഗ്രസ് അധികാരത്തിൽ തിരിച്ചെത്തുമെന്ന് ഉറപ്പിക്കുന്നു. എബിപി-സി വോട്ടർ സർവേ പ്രകാരം 224 അം​ഗ നിയമസഭയിൽ 115-127 സീറ്റുകൾ വരെ കോൺ​ഗ്രസ് നേടും. ബിജെപിക്ക് 68-80 സീറ്റുകളും ജനതാ ദൾ എസിന് 23-35 സീറ്റുകളും കി‌ട്ടും. ഇ- ന്യൂസ് ഏജൻസി സർവേ പ്രകാരം കോൺ​ഗ്രസ് 132-140 സീറ്റുകൾ നേടും. 43 ശതമാനം വോട്ടാണ് കോൺ​ഗ്രസിനെ കാത്തിരിക്കുന്നത്. ബിജെപിക്ക് 57-65 സീറ്റുകളും 33 ശതമാനം വോട്ടും അവർ പ്രവചിക്കുന്നു. ജനതാ ദൾ എസിന് 25-32 സീറ്റുകളും. എൻഡിടിവി-സിഎസ്ഡിഎസ് അടക്കം പോൾ സർവേ നടത്തിയ മിക്ക ഏജൻസികളും സമാനമായ പ്രവചനങ്ങളാണ് നടത്തിയിരിക്കുന്നത്.

ഭരണ വിരുദ്ധ തരം​ഗം ആഞ്ഞടിക്കുന്നു

മുഖ്യമന്ത്രി ബസവ് രാജ് ബൊമ്മെയുടെ അഴിമതി സർക്കാരാണ് കർണാടകത്തിൽ ബിജെപിയുടെ അന്തകൻ വിത്ത്. കമ്മിഷൻ രാജ് എന്നാണ് ബൊമ്മെ ഭരണം അറിയപ്പെടുന്നതു തന്നെ. പേടിഎം എന്നു പറയുന്നതു പോലെ പേ-സിഎം എന്നാണ് അഴിമതിയുടെ പുതിയ പേര്. കർണാടകത്തിൽ ഏതു പദ്ധതി നടപ്പാക്കുന്നതിനും മുഖ്യമന്ത്രിക്കോ പാർട്ടിക്കോ കമ്മിഷൻ നൽകണം. അടങ്കൽ തുകയുടെ 40 ശതമാനം വരെയാണ് കമ്മിഷൻ. വിവിധ സർക്കാർ സർവകലാശാലകളിലെ വൈസ് ചാൻസിലർമാരുടെ നിയമനത്തിനു പോലും പണം വാങ്ങി എന്നാണ് ആരോപണം. രാജ്യത്തെ ഏറ്റവും സമ്പന്നമായ സംസ്ഥാനങ്ങളിൽ ഒന്നായിട്ടു പോലും പ്രാദേശിക വികസനം വളരെ കുറച്ചു നടക്കുന്ന സംസ്ഥാനങ്ങളിൽ ഒന്നാണിത്. തൊഴിലില്ലായ്മ അതിരൂക്ഷം. അമിതമായ വിലക്കയറ്റത്തിൽ പൊറുതി മുട്ടുകയാണ് സാധാരണ ജനങ്ങൾ. കോവിഡ് കാലത്തെ ഭരണ പരാജയനവും ബൊമ്മെ മന്ത്രിസഭയെ വേട്ടയാടുന്നു.

Advertisement

inner ad

നിറഞ്ഞ കോൺ​ഗ്രസ് കൂടാരവും ഒഴിഞ്ഞ ബിജെപിയും

തെരഞ്ഞെടുപ്പ് പ്രഖ്യാപിക്കുന്നതിനും വളരെ മുൻപേ ബിജെപിയിൽ തുടങ്ങിയ കൊഴിഞ്ഞുപോക്ക് തെരഞ്ഞെടുപ്പ് പ്രഖ്യാപിച്ചതോടെ കുത്തൊഴുക്കായി. മുൻ മുഖ്യമന്ത്രി ജ​ഗദീഷ് ഷെട്ടാർ, മുൻ ഉപമുഖ്യമന്ത്രി ലക്ഷ്മൺ സവാദി, ആറ് തവണ എംഎൽഎ ആയിരുന്ന എസ്. അം​ഗാറ, മൂന്നു തവണ എംഎൽഎ ആയിരുന്ന എം.പി. കുമാര സ്വാമി, ആർ.ശങ്കർ തുടങ്ങി മുതിർന്ന പത്തിലധികം നേതാക്കളാണ് തെരഞ്ഞെടുപ്പ് പ്രഖ്യാപിച്ചതിനു ശേഷം ബിജെപിയിൽ നിന്നു രാജി വച്ചത്.
കർണാടകത്തിൽ ബിജെപി സ്ഥാപിച്ചു വളർത്തിയവരിൽ പ്രമുഖനാണ് ജ​ഗദീഷ് ഷെട്ടാർ. ഹുബള്ളി ധർവാദ് ന​ഗരത്തിന്റെ കൗൺസിലറായി പൊതു പ്രവർത്തനം തുടങ്ങിയ ഷെട്ടാർ എട്ടു തവണ എംഎൽസി ആയിട്ടുണ്ട്. വിവിധ മന്ത്രിസഭകളിൽ സുപ്രധാന വകുപ്പുകൾ കൈകാര്യം ചെയ്ത മന്ത്രി, കോൺ​ഗ്രസ് ഭരിച്ചപ്പോൾ പ്രതിപക്ഷ നേതാവ്, മുഖ്യമന്ത്രി തുടങ്ങിയ നിലകളിലെല്ലാം ജനശ്രദ്ധ നേടിയിട്ടുള്ള ഷെട്ടാർ ഇപ്പോൾ കോൺ​ഗ്രസിലാണ്. ഹുബള്ളി മണ്ഡലത്തിൽ കൈപ്പത്തി ചിഹ്നത്തിൽ മത്സരിക്കുകയാണ് ഇക്കുറി ഷെട്ടാർ. കർണാടകത്തിൽ അധികാരം നിലനിർത്തുന്നതിനെക്കാൾ ഷെട്ടാറെ പരാജയപ്പെടുത്താനാണ് ബിജെപി അധ്വാനിക്കുന്നത്.

Advertisement

inner ad

അതേ സമയം, കോൺ​ഗ്രസ് ക്യാംപ് മുൻപെന്നത്തെക്കാളും ശക്തമാണ്. കോൺ​ഗ്രസ് അധ്യക്ഷൻ മല്ലികാർജുൻ ഖാർ​ഗെയുടെ തട്ടകം എന്ന നിലയിൽ കർണാടകത്തിൽ കോൺ​ഗ്രസ് വർധിത വീര്യത്തിലാണ്. ഖാർ​ഗെ, മുൻമുഖ്യമന്ത്രി സിദ്ദ രാമയ്യ, കെപിസിസി പ്രസിഡന്റ് ഡി.കെ. ശിവകുമാർ എന്നീ ത്രിമൂർത്തികളാണ് തെരഞ്ഞെടുപ്പ് മുന്നിൽ നിന്നു നയിക്കുന്നത്. ഒപ്പം രാഹുൽ ​ഗാന്ധി, പ്രിയങ്ക ​ഗാന്ധി എന്നിവരും ഇടവും വലവുമുണ്ട്. നേരത്തേ ബിജെപിയെ സഹായിച്ചിരുന്ന ലിം​ഗായത്ത് സമുദായം അപ്പാടെ പാർട്ടി വിട്ടു പോയതും കോൺ​ഗ്രസിനാണ് സഹായമാകുക. ഹിജാബ്, ടിപ്പു സുൽത്താൻ വിദങ്ങളിലൂടെ മുസ്ലിം സമുദായവും മതപരിവർത്തനം ആരോപിച്ച് ക്രൈസ്തവ വിഭാ​ഗവും നിരന്തരം ആക്രമിക്കപ്പെട്ടു. അതുണ്ടാക്കിയ വ്രണങ്ങൾ ഇനിയും ഉണങ്ങിയിട്ടില്ല.

കോൺ​ഗ്രസിനു സാധ്യത നൽകുന്ന ചില ഘടകങ്ങൾ

എല്ലാ വിഭാ​ഗങ്ങളോടും നീതി പുലർത്തുന്ന പ്രകടന പത്രികയാണ് കോൺ​ഗ്രസിന്റെ തുരുപ്പ് ചീട്ട്. 200 യൂണിറ്റ് വരെ സൗജന്യ വൈദ്യുതി, മുഴുവൻ സ്ത്രീകൾക്കും സർക്കാർ വാഹനങ്ങളിൽ സൗജന്യ യാത്ര, തൊഴിൽ രഹിതരായ സ്ത്രീകൾക്ക് പ്രതിമാസം 2000 രൂപ ഓണറേറിയം തുടങ്ങിയ വാ​ഗ്ദാനങ്ങൾ ആദ്യ മന്ത്രിസഭാ യോ​ഗത്തിൽ തന്നെ പാലിക്കപ്പെടുമെന്നു പ്രകടന പത്രിക ഉറപ്പ് തരുന്നു. മുസ്ലിം സംവരണം റദ്ദാക്കിയതടക്കമുള്ള ബൊമ്മെ നടപടികൾ പുനഃസ്ഥാപിക്കാൻ നിയമ നിർമാണം നടത്തുമെന്ന് കോൺ​ഗ്രസിന്റെ ഉറപ്പ്. ഒപ്പം കൂ‌ടുതൽ സമുദായങ്ങൾക്ക് സംവരണം എന്നും വാ​ഗ്ദാനം.
ലിം​ഗായത്ത് സമുദായത്തെ ബിജെപി വഞ്ചിച്ചെന്നു പറഞ്ഞു പാർട്ടി വിട്ട ദിനേശ് ഷെട്ടാർ, ലക്ഷ്മൺ സവാദി എന്നിവർ വലിയ തോതിൽ ബിജെപിക്കു തിരിച്ചടിയാകും. മുൻ മുഖ്യമന്ത്രി യദിയൂരപ്പയും മൗനത്തിലാണ്. സീറ്റ് നിർണയത്തിലടക്കം ബിജെപി ഡൽഹി നേതൃത്വമാണ് കർണാടകത്തിൽ തീരുമാനമെടുക്കുന്നത്. അതിലെ അതൃപ്തി വളരെ പ്രകടവും. അതേ സമയം, കോൺ​ഗ്രസ് പ്രാദേശിക തലത്തിൽ മാത്രം ആലോചിച്ച് ഏകകണ്ഠമായി തീരുമാനമെടുക്കുന്നത് അണികളെ ആവേശത്തിലാക്കുന്നു.
ഹിജാജ്, ഹലാൽ, സംവരണം റദ്ദാക്കൽ, ക്രൈസ്തവ പീഡനം തുടങ്ങിയ വിവാദങ്ങളിലൂടെ മത ന്യൂനപക്ഷ വികാരങ്ങൾ വ്രണപ്പെടുത്തിയതിനെതിരായ ജനവകാരം, ദളിത് സമൂഹത്തിന്റെ കൊഴിഞ്ഞുപോക്ക് എന്നിവ ബിജെപിക്കു തിരിച്ചടിയാകും.

Advertisement

inner ad

2024 ലോക് സഭാ തെരഞ്ഞെടുപ്പിലേക്കുള്ള ചവി‌ട്ടുപടിയാണ് കർണാടക നിയമസഭാ തെരഞ്ഞെടുപ്പ് ഫലം. ഇവിടെ കോൺ​ഗ്രസ് അധികാരത്തിലെത്തിയാൽ 2004ലെ തെരഞ്ഞെടുപ്പ് ഫലമാവും ഇന്ദ്രപ്രസ്ഥത്തെ കാത്തിരിക്കുന്നത്. സംയുക്ത പ്രതിപക്ഷ ഐക്യത്തിന് എന്തു വിട്ടു വീഴ്ചയ്ക്കും കോൺ​ഗ്രസ് തയാറാണെന്ന പാർട്ടി ഹൈക്കമാൻഡിന്റെ മധ്യസ്ഥ ഫോർമുലയ്ക്കും ഒരുപാട് അർഥവ്യാപ്തിയുണ്ട്. അതിനെല്ലാമുള്ള ഉത്തേജകമെന്ന നിലയിലാണ് കർണാടക തെരഞ്ഞെടുപ്പിനെ രാഷ്‌ട്രീയ നിരീക്ഷകർ വിലയിരുത്തുന്നത്.