ജൂലൈ 18…ഇത്രയും കറുത്തിരുണ്ട ഒരു ദിനം അടുത്തകാലത്തൊന്നും ഉണ്ടായിട്ടില്ല എന്ന് തന്നെ പറയാം. രാവിലെ 5 മണിക്ക് ഉറക്കമെഴുന്നേറ്റ് ഫോൺ തുറന്നപ്പോഴാണ് വാട്സ്ആപ് ഗ്രൂപ്പിൽ ഉമ്മൻ ചാണ്ടിക്ക് വിട എന്ന വലിയ അക്ഷരത്തിലുള്ള പോസ്റ്ററുകളും എഴുത്തുകളും കാണുന്നത്. വിശ്വസിക്കാനാവാത്തത് കൊണ്ട് മകൻ ചാണ്ടി ഉമ്മന്റെ ഫേസ് ബുക്കിലേക്ക് ഒന്ന് എത്തി നോക്കി. അതെ APPA HAS PASSED AWAY…ഒരു മണിക്കൂർ മുമ്പ് എഴുതിയ പോസ്റ്റ്‌. കേൾക്കാനാഗ്രഹിക്കാത്ത ആ വിയോഗം.. കുഞ്ഞൂഞ്ഞ് നമ്മെ വിട്ട് പോയി.. ഉണരാത്ത ഗാഡനിദ്രയിലേക്ക്…പിന്നെയാകെ മൂകതയായിരുന്നു. വീട്ടിലുള്ള പ്രിയപ്പെട്ട ആരോ നഷ്ടപ്പെട്ടതുപോലെ…കരഞ്ഞു കലങ്ങിയ കണ്ണുകളുമായി, തുരുതുരാ വരുന്ന പ്രിയ നേതാവിന്റെ ഓർമപ്പെടുത്തലുകൾ.

ഉമ്മൻ‌ചാണ്ടി, അദ്ദേഹത്തെ കുറിച്ച് പറയാൻ വാക്കുകളില്ല. അത്രമേൽ ജനങ്ങളിൽ ആഴത്തിലുള്ള വേരുകളുറപ്പിച്ചാണ് മടക്കം. സദാസമയവും പ്രസന്നമുഖത്തോടുകൂടി ചുണ്ടിൽ ചെറുപുഞ്ചിരി പൊഴിച്ച് ആൾക്കൂട്ടത്തിനുനടുവിൽ കുറേ വെള്ളക്കടലാസുകളും നിവേദനങ്ങളും പേനയും ഒരു ഗ്ലാസ്‌ ഓട്സ്സുമായി അയാളുണ്ടാവും… ‘ജനപ്രതിനിധി’ അങ്ങനെ വിളിക്കാം. ലോകജനതയ്ക്ക് മുന്നിൽ ഇനി ഇങ്ങനെ ഒരാൾ ഉണ്ടാവില്ല എന്നത് നിസ്സംശയം പറയാം. കൊച്ചുമക്കൾക്ക് മുത്തശ്ശനായി, അമ്മമാർക്ക് മകനായി അശരണർക്ക് തണലായി പാർട്ടി പ്രവർത്തകർക്ക് നല്ലൊരു നേതാവായി അയാളെന്നും നിലകൊണ്ടിരുന്നു. ഉറങ്ങാതെ തന്നിലേൽപ്പിച്ച കടമകൾക്ക് നിറം പകരാനായി, ചുറ്റുമുള്ള ജീവിതങ്ങളെ പച്ചപിടിപ്പിക്കാനുള്ള തിരക്കിലായിരുന്നു. കുഞ്ഞൂഞ്ഞ് ഇനി വിശ്രമത്തിലാണ്. തന്റെ കർമമണ്ഡലത്തിൽ നിന്ന് കടമകൾ പൂർത്തിയാക്കി ഒരു പിൻവാങ്ങൽ. ജനങ്ങളുടെ മനസ്സിൽ എന്നും സ്ഥിരമായി വാഴുന്ന ഒരു പ്രതീകമായാണ് അദ്ദേഹത്തിന്റെ മടക്കം… അരങ്ങൊഴിഞ്ഞപ്പോഴും അണയാത്ത ജനപ്രവാഹമാണ് അദ്ദേഹം നമുക്കായി അവശേഷിപ്പിച്ച നന്മ. ഇന്ന് ഉമ്മൻ‌ചാണ്ടിയുടെ മുഖത്ത് പുഞ്ചിരിയില്ല.. പകരം ശാന്തതയാണ്… കടമകളെല്ലാം എല്ലാം നിറവേറ്റിയ ജനപ്രതിനിധിയുടെ ശാന്തത…

Advertisement

inner ad

ഒരു നോക്ക് അദ്ദേഹത്തെ കാണാൻ വേണ്ടി വടകര അരവിന്ദ് ഘോഷിലെ സമ്മേളന നഗരിയിലേക്ക് ആ കൊറോണക്കാലത്ത് തിരക്ക് പിടിച്ച് പോയതും ആൾക്കൂട്ടത്തിനു നടുവിലൂടെ അദ്ദേഹത്തെ കണ്ട് തലയിൽ കൈ വച്ച് അനുഗ്രഹം വാങ്ങി കൂടെ നിന്നൊരു ഫോട്ടോ എടുത്തതും.,. ഈ ഒരു 5 മിനുട്ട് ആണ് പ്രിയപ്പെട്ട ഈ നേതാവിനെ ഒന്നുകൂടി മനസ്സിന്റെ ആഴങ്ങളിലേക്ക് ചേർത്തുവച്ചത്.. അത്രയും തിരക്കിനിടയിൽ ഒരു സ്ഥാനവുമില്ലാത്ത നാളിതുവരെ കണ്ടിട്ടുപോലുമില്ലാത്ത എന്നെ ചേർത്ത് പിടിക്കണമെങ്കിൽ അദ്ദേഹം എന്തുമാത്രം ജനങ്ങളോടിണങ്ങി ചേർന്നെന്ന് പറയാതെ പറയുന്നുണ്ടയാൾ… ഒടുവിൽ പല കുതന്ത്രങ്ങളുമുപയോഗിച്ച് അദ്ദേഹത്തെ മാനംകെടുത്തിയും കല്ലെറിഞ്ഞും അസഭ്യവാക്കുകളിലൂടെ മനസ്സിന് മുറിവേൽപ്പിച്ചു രോഗശയ്യയിലാക്കിയവരെ നിരാശയുടെ പടുകുഴിയിലേക്ക് താഴ്ത്തിവിട്ട ‘ വിശുദ്ധനും ‘ ഉമ്മൻചാണ്ടിയാണ്.. അദ്ദേഹം മരണപ്പെട്ടപ്പോൾ പല തുറന്നുപറച്ചിലുകളും മാപ്പുകളുമൊക്കെ ആ വലിയ വ്യക്തിത്വത്തിന്റെ നിരപരാധിത്വത്തിലേക്കാണ് വിരൽചൂണ്ടുന്നത്… തന്നെ ഉപദ്രവിച്ചവരോടും കൂടെ നിന്നവരോടും ഒരു ചെറുപുഞ്ചിരിമാത്രം സമ്മാനിച്ചു കടന്നു പോയ നേതാവ്..

കേരളചരിത്രത്തിൽ ഇന്ന് വരെ കാണാത്ത ഒരു യാത്രമൊഴിക്കാണ് നിങ്ങൾ ഇപ്പോഴും സാക്ഷ്യം വഹിച്ചുകൊണ്ടിരിക്കുന്നത്… പൊതുഅവധി മുതൽ മാധ്യമമൗനാചരണം തുടങ്ങി ഇതര രാഷ്ട്രീയ കക്ഷികളുയർത്തിയ ഫ്ലെക്സ് പോലും അദ്ദേഹത്തിന്റെ കയ്യൊപ്പ് പതിഞ്ഞ നാൾവഴികളെയാണ് ഓർമ്മിപ്പിക്കുന്നത്… ഒറ്റപ്പെടുത്തിയവർക്ക് കാലം കാത്തുവച്ച ഈ കാവ്യനീതികൊണ്ട് ഞങ്ങളുത്തരം നൽകി. പ്രിയ നേതാവേ വിട…മരണം വരെ ഉയർച്ചയിലും താഴ്ചയിലും കൂടെ നിന്ന ഞങ്ങൾക്ക് ഒന്നേ പറയാനുള്ളൂ… നേർവഴി കാട്ടിയതിന്, പ്രകാശം പകർന്നതിന് നന്ദി…നിങ്ങളുയർത്തിയ ആശയങ്ങളും വെളിച്ചവും തലമുറകളിലേക്ക് പകർന്നു കൊടുക്കാൻ ശക്തമായ ഒരു യുവത ഇവിടെയുണ്ട്… ഇങ്ങനെയൊരു മനുഷ്യൻ ജീവനും ജീവിതവുമേകി കടന്നുപോയെന്ന് ഞങ്ങൾ പറയും….പ്രിയ കുഞ്ഞൂഞ്ഞേ സമാധാനത്തോടെ നിങ്ങൾക്ക് കണ്ണടക്കാം..

Advertisement

inner ad

ഹൃദയവേദനയോടെ വിട…..

Advertisement

inner ad