Connect with us
inner ad

Kerala

കണ്ടല ബാങ്ക് തട്ടിപ്പ്: മന്ത്രിമാരും സംശയ നിഴലിൽ; ഭാസുരാംഗനെ പിന്തുണച്ചത് കാനം രാജേന്ദ്രൻ

Avatar

Published

on

നിസാർ മുഹമ്മദ്

തിരുവനന്തപുരം: കണ്ടല സഹകരണ ബാങ്കിലെ 101 കോടി രൂപയുടെ തട്ടിപ്പിൽ മുൻ പ്രസിഡന്റും സിപിഐ നേതാവുമായ എൻ ഭാസുരാംഗന് പുറമേ, സംസ്ഥാന സർക്കാരിലെ ചില മന്ത്രിമാരും പാർട്ടി സെക്രട്ടറിയും സംശയനിഴലിൽ. ബാങ്കിൽ തട്ടിപ്പ് നടന്നതായി 2021ൽ സഹകരണ വകുപ്പ് രജിസ്ട്രാർ റിപ്പോർട്ട് നൽകിയിട്ടും നടപടിയെടുക്കാതെ ഭാസുരാംഗനെ സംരക്ഷിച്ചു നിർത്തിയത് ഇവരായിരുന്നുവെന്ന വിവരവും പുറത്തുവരുന്നുണ്ട്. ബാങ്കിലും മിൽമയിലും ഭാസുരാംഗൻ നടത്തിയ തട്ടിപ്പിന്റെ വിഹിതം ചില മന്ത്രിമാർക്കും നൽകിയിട്ടുണ്ടെന്നും
ഇ.ഡി കണ്ടെത്തിയ രേഖകളിൽ ഇത് സംബന്ധിച്ച് ചില വിവരങ്ങളുണ്ടെന്നുമാണ് സൂചന. ബാങ്കിലെ ഉദ്യോഗസ്ഥരുടെ വീടുകളിലും പരിശോധന നടന്നു. ബന്ധുക്കളുടെ പേരിൽ അനധികൃതമായി വായ്പ എടുത്തെന്നും ചിട്ടി നടത്തിപ്പിന്റെ മറവിൽ അനധികൃതമായി ലക്ഷങ്ങൾ കമ്മിഷനായി ജീവനക്കാർ കൈപ്പറ്റിയെന്നും ഇ.ഡി അന്വേഷണത്തിൽ കണ്ടെത്തി. ഈ പണം ഉന്നത നേതാക്കളിലേക്ക് എത്തിയെന്നാണ് ഇഡി സംശയിക്കുന്നത്. ദേഹാസ്വാസ്ഥ്യത്തെ തുടർന്ന് ആശുപത്രിയിൽ പ്രവേശിപ്പിക്കപ്പെട്ട ഭാസുരാംഗനെ ഡിസ്ചാർജ് ചെയ്തതിന് ശേഷം വിശദമായി ചോദ്യം ചെയ്യും.
അതേസമയം, സിപിഐയുടെ പ്രാദേശിക നേതൃത്വം ഭാസുരാംഗന്റെ അഴിമതി ചൂണ്ടിക്കാട്ടി പലതവണ നേതൃത്വത്തെ സമീപിച്ചെങ്കിലും പാർട്ടി സെക്രട്ടറി കാനം രാജേന്ദ്രനും ബാങ്ക് പ്രസിഡന്റിനൊപ്പമായിരുന്നു. അനധികൃതമായി ജീവനക്കാർക്കു ശമ്പളം നൽകി, മതിയായ ഈടില്ലാതെയും ക്രമവിരുദ്ധമായും കോടികൾ വായ്പ നൽകി തുടങ്ങിയ ഗുരുതര ക്രമക്കേടുകളിലൂടെ 101 കോടി രൂപയുടെ സാമ്പത്തിക ശോഷണം ബാങ്കിനുണ്ടായെന്നാണു സഹകരണ വകുപ്പിന്റെ കണ്ടെത്തൽ. 173 കോടി രൂപ നിക്ഷേപകർക്കു നൽകാനുണ്ട്. 69 കോടി രൂപ മാത്രമാണ് വായ്പയിനത്തിൽ കുടിശികയായിട്ടുള്ളത്.
അടുത്തിടെ, ഒരു പാർട്ടി നേതാവിന്റെ ആത്മഹത്യയിൽ ഭാസുരാംഗൻ ആരോപണ വിധേയനായപ്പോഴും കാനം രാജേന്ദ്രൻ ഭാസുരാംഗനെ സംരക്ഷിച്ചു നിർത്തുകയായിരുന്നു. പാർട്ടിയുടെ എല്ലാ പരിപാടിക്കും വലിയ തോതിൽ പണം നൽകി വന്ന ബാങ്കായിരുന്നു കണ്ടല സർവീസ് സഹകരണ ബാങ്ക്. സർക്കാരിന്റെയും പാർട്ടിയുടെയും പരിപാടികൾക്കായി ലക്ഷക്കണക്കിന് രൂപ ചെലവിട്ട് നഗരത്തിലെമ്പാടും ഫ്ളെക്സും ബോർഡും സ്ഥാപിച്ചിരുന്ന ഭാസുരാംഗൻ 2006ൽ സിപിഐയിലേക്ക് വന്ന നാൾ മുതൽ പാർട്ടിയുടെ സ്പോൺസർ കൂടിയായിരുന്നു.
ഇ.ഡി കസ്റ്റഡിയിലെടുത്ത ഭാസുരാംഗനെ ഇനിയും സംരക്ഷിക്കുന്നത് ദോഷം ചെയ്യുമെന്ന വിലയിരുത്തലിന്റെ അടിസ്ഥാനത്തിലാണ് ഇന്നലെ പാർട്ടി ജില്ലാ എക്സിക്യൂട്ടിവ് യോഗം ചേർന്ന് പുറത്താക്കൽ നടപടി തീരുമാനിച്ചത്. ഈ നടപടിയിലൂടെ തൽക്കാലം മുഖം രക്ഷിക്കാനാകുമെന്നാണ് പാർട്ടി നേതൃത്വം കരുതുന്നത്. എന്നാൽ, ഇ.ഡി അന്വേഷണം കൂടുതൽ മുന്നോട്ടുപോയാൽ പലരും കുടുങ്ങുമെന്ന സൂചനകളാണ് പുറത്തുവരുന്നത്. കരുവന്നൂർ ബാങ്ക് തട്ടിപ്പിൽ സിപിഎമ്മാണ് പ്രതിക്കൂട്ടിലായതെങ്കിൽ കണ്ടലയിൽ സിപിഐയാണ് കുരുക്കിലായിരിക്കുന്നത്.
ഉന്നത നേതാക്കളുമായുള്ള ബന്ധമാണ് വലിയ തട്ടിപ്പ് നടത്താൻ ഭാസുരാംഗനെ സഹായിച്ചതെന്ന് സിപിഐയിൽ തന്നെ ആക്ഷേപമുണ്ട്. പ്രാദേശിക സിപിഎം നേതൃത്വത്തിനും ഭാസുരാംഗനെ താൽപര്യമില്ല. നേതാക്കൾക്ക് ഭാസുരാംഗൻ മാസപ്പടി നൽകിയിരുന്നതായി ആരോപണമുണ്ട്. തെളിവുകൾ എൻഫോഴ്സ്മെന്റ് ഡയറക്ടറേറ്റ് ശേഖരിച്ചാൽ പാർട്ടി പ്രതിരോധത്തിലാകും. ബാങ്കിനെതിരെ ആരോപണം ഉയർന്നിട്ടും ഇത്രയും നാൾ ആരാണ് ഭാസുരാംഗനെ സംരക്ഷിച്ചതെന്ന ചോദ്യവും ഉയരും. 30 വർഷമായി ബാങ്കിന്റെ പ്രസിഡന്റ് പദം വഹിച്ചത് ഭാസുരാംഗനാണ്. ബാങ്കിലെ ഇടപാടുകളെ സംബന്ധിച്ച് ആക്ഷേപം ഉയർന്നപ്പോഴെല്ലാം സിപിഐ നേതൃത്വത്തിൽ ചിലർ ഭാസുരാംഗനെ സംരക്ഷിച്ചു. മിൽമയിൽ ഭാസുരാംഗൻ നടത്തിയ ചില നിയമനങ്ങളെ സംബന്ധിച്ചും പാർട്ടിയിൽ ആക്ഷേപം ഉയർന്നിരുന്നു.
കരുവന്നൂർ ബാങ്ക് തട്ടിപ്പ് പുറത്തുവന്നതോടെയാണ് 2005 മുതൽ 2021വരെയുള്ള ബാങ്കിന്റെ പ്രവർത്തനം പരിശോധിക്കാൻ സഹകരണവകുപ്പ് തീരുമാനിച്ചത്. ബാങ്കിന് ഈ കാലയളവിൽ 101 കോടിരൂപയുടെ മൂല്യശോഷണം സംഭവിച്ചതായി അന്വേഷണത്തിൽ കണ്ടെത്തി. ഭരണസമിതി അംഗങ്ങള്‍ക്കും ഉദ്യോഗസ്ഥർക്കുമുള്ള പങ്കും പുറത്തുവന്നു. ഭാസുരാംഗനും കുടുംബവും വലിയ രീതിയിൽ സ്വത്ത് സമ്പാദിച്ചതായി അന്വേഷണത്തിൽ കണ്ടെത്തി. സഹകരണ വകുപ്പിൽനിന്നും അന്വേഷണ റിപ്പോർട്ടുകള്‍ ശേഖരിച്ച ഇഡി ഒരു മാസം മുൻപാണ് അന്വേഷണം ആരംഭിച്ചത്. സാമ്പത്തിക ഇടപാടുകളിൽ പൊലീസ് വഞ്ചനാകുറ്റത്തിന് കേസ് രജിസ്റ്റർ ചെയ്താൽ ഇഡിക്ക് ഇടപെടാനാകും. കണ്ടല ബാങ്കുമായി ബന്ധപ്പെട്ട പരാതിയിൽ പൊലീസ് വഞ്ചനാകുറ്റം ചുമത്തിയതോടെയാണ് ഇഡി രംഗപ്രവേശനം ചെയ്തത്. കുറ്റകൃത്യത്തിൽ ഏർപ്പെടുന്നവരുടെ പണം ഇഡിക്ക് കണ്ടുകെട്ടാം. അതേസമയം,
ഭാസുരാംഗന്റെ ഇടപാടുകളിൽ പാർട്ടിക്ക് ബന്ധമില്ലെന്നാണ് ഇപ്പോഴും നേതൃത്വം പറഞ്ഞുകൊണ്ടിരിക്കുന്നത്.
അതേസമയം, കണ്ടല സർവീസ് സഹകരണ ബാങ്കിലെ ഇ.ഡി റെയ്ഡ് രാഷ്ട്രീയപ്രേരിതമെന്നാണ് സഹകരണ മന്ത്രി വി.എൻ. വാസവന്റെ ന്യായീകരണം. രാഷ്ട്രീയവേട്ടയാണ് നടക്കുന്നതെന്നും അദ്ദേഹം കുറ്റപ്പെടുത്തി.

Advertisement
1000x200 PX MALAYALI DCTR MDX-02-02

Kerala

കളമശ്ശേരി സ്ഫോടന കേസിൽ കുറ്റപത്രം സമർപ്പിച്ചു

Published

on

കൊച്ചി: കളമശ്ശേരി സ്ഫോടന കേസിൽ കുറ്റപത്രം സമർപ്പിച്ചു. കേസിൽ തമ്മനം സ്വദേശി ഡൊമിനിക് മാർട്ടിൻ മാത്രമാണ് പ്രതി. ഡൊമിനിക് മാർട്ടിന് മറ്റാരുടെയും സഹായം ലഭിച്ചിട്ടില്ല.സ്ഫോടനത്തിലേക്ക് നയിച്ചത് യഹോവ സാക്ഷി പ്രസ്ഥാനത്തോടുള്ള എതിർപ്പെന്നും കുറ്റപത്രത്തിൽ പറയുന്നു. എറണാകുളം പ്രിൻസിപ്പൽ സെഷൻസ് കോടതിയിലാണ് കുറ്റപത്രം സമർപ്പിച്ചത്. കേസിൽ യുഎപിഎ ചുമത്തിയിരുന്നു.ഒക്ടോബര്‍ 29-ന് രാവിലെ ഒന്‍പതരയോടെയാണ് യഹോവ സാക്ഷികളുടെ കണ്‍വെന്‍ഷന്‍ നടന്ന സാമ്ര ഇന്റര്‍നാഷണല്‍ കണ്‍വെന്‍ഷന്‍ സെന്ററിലെ ഹാളില്‍ സ്‌ഫോടനമുണ്ടായത്. സ്ഫോടനത്തില്‍ എട്ട് പേർക്ക് ജീവന്‍ നഷ്ടമായി. സ്‌ഫോടന സമയത്ത് രണ്ടായിരത്തിലധികം പേര്‍ ഹാളിലുണ്ടായിരുന്നു.

Continue Reading

Choonduviral

ഉമ്മന്‍ചാണ്ടിയുടെ ഓര്‍മ്മകളുമായി കെസിക്ക് വോട്ടഭ്യര്‍ത്ഥിച്ച് മറിയാ ഉമ്മന്‍

Published

on

ആലപ്പുഴ: അന്തരിച്ച മുന്‍മുഖ്യമന്ത്രി ഉമ്മന്‍ചാണ്ടിയുടെ ഓര്‍മ്മകളുമായാണ് മകള്‍ ഡോക്ടര്‍ മറിയാ ഉമ്മന്‍ ആലപ്പുഴയില്‍ എത്തിയത്. യുഡിഎഫ് സ്ഥാനാര്‍ത്ഥി കെ.സി.വേണുഗോപാലിന്റെ തെരഞ്ഞെടുപ്പ് പ്രചാരണത്തിന്റെ ഭാഗമായുള്ള വിവിധ കുടുംബസംഗമങ്ങളില്‍ മറിയാ ഉമ്മന്‍ പങ്കെടുത്തു. ആലപ്പുഴ, അമ്പലപ്പുഴ, ഹരിപ്പാട്, കായംകുളം എന്നിവിടങ്ങളില്‍ സംഘടിപ്പിച്ച കുടുംബസംഗമം മറിയ ഉമ്മന്‍ ഉദ്ഘാടനം ചെയ്തു. എല്ലാ പൊതുതെരഞ്ഞെടുപ്പുകളിലും തന്റെ പിതാവ് പ്രചാരണപരിപാടികളില്‍ മുന്നില്‍ ഉണ്ടാകുമായിരുന്നു എന്ന് മറിയ പറഞ്ഞു.

എത്ര ക്ഷീണിതനായാലും ആരോഗ്യപ്രശ്‌നങ്ങള്‍ ഉണ്ടായാലും അതൊക്കെ കാര്യമാക്കാതെയായിരുന്നു രാഷ്ട്രീയജീവിതം എന്നും മരിയ ഓര്‍ത്തെടുത്തു. കേന്ദ്ര-സംസ്ഥാന മന്ത്രിയായിരുന്നപ്പോള്‍ മാതൃകാപരമായ ജനക്ഷേമ പ്രവര്‍ത്തനങ്ങള്‍ നടത്തിയ നേതാവാണ് കെ.സി. വേണുഗോപാല്‍. രാഹുല്‍ ഗാന്ധിക്കൊപ്പം മതേതര ഇന്ത്യക്കായി പ്രവര്‍ത്തിക്കുന്ന കെ.സി.വേണുഗോപാലിനെ വിജയപ്പിക്കേണ്ടത് നാടിന്റെ ആവശ്യമാണെന്നും മരിയ ഉമ്മന്‍ പറഞ്ഞു.

Advertisement
1000x200 PX MALAYALI DCTR MDX-02-02

വര്‍ഗ്ഗീയത പറഞ്ഞ് വോട്ടുപിടിക്കുന്നവരെ പുറത്താക്കാനുള്ള സുവര്‍ണ്ണാവസരമായി ഈ തെരഞ്ഞെടുപ്പിനെ കാണണമെന്നും അവര്‍ പറഞ്ഞു. പ്രസംഗത്തിനൊപ്പം ജനങ്ങളുടെ ആവശ്യപ്രകാരം പാട്ടുപാടി സദസ്സിനെ കൈയ്യിലെടുത്താണ് മരിയ മടങ്ങിയത്. ജോണ്‍ ജോസഫ്, അഡ്വ.ബി. രാജശേഖരന്‍, അഡ്വ.വി.ഷുക്കൂര്‍, ബിന്ദു ജയന്‍, അനില്‍ തോമസ്സ്, ആര്‍.കെ.സുധീര്‍, കിഷോര്‍ ബാബു, എം.ആര്‍. ഹരികുമാര്‍, സി ജി ജയപ്രകാശ്, കെഎം രാജു, സാജന്‍ പനയറ, കീച്ചേരില്‍ ശ്രീകുമാര്‍, മോനച്ചന്‍, മുരളീധരന്‍ പിള്ള, സുജാത തുടങ്ങിയ യുഡിഎഫ് നേതാക്കളും വിവിധ കുടുംബസംഗമങ്ങളില്‍ പങ്കെടുത്തു.

Advertisement
1000x200 PX MALAYALI DCTR MDX-02-02
Continue Reading

Featured

‘ഇത്രയ്ക്ക് അടിമയാകരുത്’; പി വി അൻവറിനെതിരെ പ്രതിഷേധം ശക്തം

Published

on

കൊച്ചി: രാഹുൽ ഗാന്ധിയെ അധിക്ഷേപിച്ച സിപിഎം നേതാവും എംഎൽഎയുമായ പി വി അൻവറിനെതിരെ പ്രതിഷേധം ശക്തം. അങ്ങേയറ്റം നീചമായ പരാമർശമാണ് രാഹുൽഗാന്ധിക്കെതിരെ അൻവർ നടത്തിയത്. ഡിഎന്‍എ പരിശോധിച്ച് രാഹുലിൻ്റെ പാരമ്പര്യം ഉറപ്പാക്കണമെന്നായിരുന്നു പി വി അന്‍വറിന്റെ പരാമര്‍ശം. ഗാന്ധി എന്ന പേര് കൂടെ ചേര്‍ത്ത് പറയാന്‍ അര്‍ഹതയില്ലാത്ത നാലാംകിട പൗരനാണ് രാഹുല്‍ ഗാന്ധി എന്നും പി വി അന്‍വര്‍ പറഞ്ഞിരുന്നു. ‘നെഹ്‌റു കുടുംബത്തില്‍ ഇങ്ങനെയൊരു മനുഷ്യന്‍ ഉണ്ടാവുമോ? നെഹ്‌റു കുടുംബത്തിന്റെ ജനറ്റിക്‌സില്‍ ജനിച്ച ഒരാള്‍ക്ക് അങ്ങനെ പറയാന്‍ കഴിയുമോ? എനിക്ക് ആ കാര്യത്തില്‍ നല്ല സംശയമുണ്ട്. രാഹുല്‍ ഗാന്ധിയുടെ ഡിഎന്‍എ പരിശോധിക്കണമെന്ന അഭിപ്രായക്കാരനാണ് ഞാന്‍’ എന്നായിരുന്നു പാലക്കാട് മണ്ഡലത്തിലെ എൽഡിഎഫ് തിരഞ്ഞെടുപ്പ് കണ്‍വെന്‍ഷനില്‍ സംസാരിക്കുമ്പോൾ അൻവർ പറഞ്ഞത്. അൻവറിന്റെ പരാമർശം താങ്കൾക്ക് വേദനയുണ്ടാക്കിയെന്ന് എഐസിസി ജനറൽ സെക്രട്ടറി കെ സി വേണുഗോപാൽ പറഞ്ഞു. വളരെ മോശം പരാമർശം ആണെന്നും തെരഞ്ഞെടുപ്പ് കമ്മീഷനെ സമീപിക്കുമെന്നും കെപിസിസി ആക്ടിങ് പ്രസിഡന്റ് എംഎം ഹസൻ പറഞ്ഞു. സാമൂഹിക മാധ്യമങ്ങളിലും അൻവറിനെതിരെ പ്രതിഷേധം അലയടിക്കുകയാണ്.

Continue Reading

Featured