കുടിവെള്ളം മുടങ്ങി ദുരിതത്തിലായ ജനങ്ങള്‍ക്ക് ആശ്വാസമായി മാത്യു കുഴല്‍നാടന്‍ എംഎല്‍എയുടെ ഇടപെടല്‍; ലീക്ക് പരിഹരിച്ച് ഉയര്‍ന്ന പ്രദേശങ്ങളിലും വെള്ളം എത്തിച്ചു

മൂവാറ്റുപുഴ: കുടിവെള്ളം മുടങ്ങി മാസങ്ങളായി ജനങ്ങൾ ദുരിതത്തിലായ സംഭവത്തിൽ പരിഹാരമൊരുക്കി മാത്യു കുഴൽനാടൻ എംഎൽഎയുടെ ഇടപെടൽ. പമ്പിംഗ് എത്ര നടത്തിയാലും ഉയർന്ന പ്രദേശങ്ങളിൽ വെള്ളം എത്താതെ ജനങ്ങൾ ദുരിതത്തിലായതോടെയാണ് പരിഹാരം തേടി എംഎൽഎ മന്ത്രി റോഷി അഗസ്റ്റിനെ ബന്ധപ്പെട്ട് ഉടൻ പ്രശ്‌ന പരിഹാരത്തിന് വഴി തേടിയത്..

കിഴക്കേകര, കാനംകവല, കുന്നപ്പിള്ളിമല, ആശ്രമം ടോപ്പ് എന്നിവിടങ്ങളിലാണ് കുടിവെള്ളം ഇല്ലാതെ ജനം ദുരിതത്തിലായത്. പമ്പിംഗ് എത്ര നടത്തിയാലും ഉയർന്ന പ്രദേശങ്ങളിൽ വെള്ളം എത്തിയിരുന്നില്ല. കാലപ്പഴക്കം ചെന്ന പൈപ്പിലെ ലീക്കിനെ തുടർന്ന് ഭൂമിക്കടിയിലൂടെ വെള്ളം നഷ്ടപ്പെട്ടുകൊണ്ടിരുന്നതിനെ തുടർന്നാണ് ഉയർന്ന പ്രദേശങ്ങളിൽ വെള്ളം എത്താതിരുന്നത്.

ജനങ്ങളുടെ പരാതിയെ തുടർന്ന് മാത്യു കുഴൽനാടൻ എംഎൽഎ നിരന്തരം ഇടപെട്ടതിനെ തുടർന്നാണ് നടപടികൾ വേഗത്തിലായി. എംഎൽഎ മന്ത്രി റോഷി അഗസ്റ്റിനുമായി ബന്ധപ്പെട്ട് ഉന്നത ഉദ്യോഗസ്ഥരുടെ യോഗം വിളിച്ചു. തുടർന്ന് ജലസേജന വകുപ്പ് സെക്രട്ടറി ടി.കെ. ജോസ് ഐഎഎസിന്റെ നിർദ്ദേശപ്രകാരം പൈപ്പിലെ ലീക്ക് കണ്ടെത്തുന്നതിനായി ലീക്ക് ഡിറ്റക്ഷൻ യുണിറ്റ് മൂവാറ്റു പുഴയിലെത്തിച്ചു.

മൂന്ന് പ്രധാന ലീക്കുകൾ പരിശോധനയിൽ കണ്ടെത്തി. ഫയർഫോഴ്‌സ് കെട്ടിടം പ്രവർത്തിച്ചിരുന്ന ലത പാലത്തിന്ന് സമീപത്തെ സ്ഥലത്താണ് വലിയ പൈപ്പ് പൊട്ടി വെള്ളം പുഴയിലേക്ക് ഒഴുകുന്നത് കണ്ടത്തിയത്. ലതാ സ്റ്റാന്റിനുള്ളിലും കാവുംപടി റോഡിലും വലിയ ലീക്ക് കണ്ടെത്തി. തുടർന്ന് ലീക്കുകൾ അടച്ച് പമ്പിങ് തുടങ്ങി. വൈകിട്ടോടെ കിഴക്കേകര, കാനംകവല, കുന്നപ്പിള്ളിമല, ആശ്രമം ടോപ്പ് എന്നിവിടങ്ങളിൽ വെള്ളം എത്തിച്ചു.

ദിനംപ്രതി ലക്ഷകണക്കിന് ലിറ്റർ ജലമാണ് ഭൂമിക്കടിയിലൂടെ പാഴായി കൊണ്ടിരുന്നത്. ഈ സാഹചര്യത്തിൽ വാൽവുകൾ അടച്ച് പമ്പ് ചെയ്താൽ പോലും ഉയർന്ന പ്രദേശങ്ങളിൽ വെള്ളം എത്തിക്കാൻ കഴിയാതെ വരികയായിരുന്നു. മാത്യൂ കുഴൽ നാടൻ എംഎൽഎ നടത്തിയ നിരന്തരമായ ഇടപെടലിനെ തുടർന്നാണ് ലീക്ക് ഡിറ്റക്ഷൻ യൂണിറ്റ് എത്തിച്ച് പരിശോധന നടത്തിയത്.

കുടിവെള്ളം കിട്ടാതായതോടെ കുന്നപ്പിള്ളിമല, കിഴക്കേക്കര നിവാസികളുടെ ജീവിതം ദുരിതത്തിലായിട്ട് മാസങ്ങളായിരുന്നു. കുടിവെള്ള വിതരണം താറുമാറായതോടെ പ്രദേശവാസികൾ കുടിവെള്ളത്തിനായി നെട്ടോട്ടത്തിലായിരുന്നു. ഈ ദുരവസ്ഥയ്ക്കാണ് എംഎൽഎയുടെ ഇടപെടലിലൂടെ അവസാനമായത്.
ഇന്നോടെ മുഴുവൻ പ്രദേശത്തും വെള്ളമെത്തുമെന്ന് അധികൃതർ അറിയിച്ചു.

Related posts

Leave a Comment