കൊട്ടാരക്കര: ഡോ. വന്ദന ദാസിന്റെ ദാരുണമായ കൊലപാതകത്തിൽ ഇരയ്ക്കും മാതാപിതാക്കൾക്കും നീതി ഉറപ്പാക്കണമെന്ന് സഹപാഠികളായ ഹൗസ് സർജന്മാർ ആവശ്യപ്പെട്ടു. കാലവിളംബം കൂടാതെ കേസിന്റെ വിചാരണ പൂർത്തിയാക്കണം. അതിനു ഫാസ്റ്റ് ട്രാക്ക് കോടതി തന്നെ സ്ഥാപിക്കണം. എത്രയും പെട്ടെന്ന് വിചാരണ പൂർത്തിയാക്കി പ്രതിക്ക് പരമാവധി ശിക്ഷ ഉറപ്പാക്കണമെന്നും അവർ ആവശ്യപ്പെട്ടു. ഇത് ഒരു വന്ദനയുടെ മാത്രം കാര്യമല്ല. വന്ദനയുടെ സ്ഥാനത്ത് ഏതൊരു ഡോക്റ്റർക്കും സംഭവിക്കാവുന്ന ദുരന്തമാണിതെന്നും അവർ ചൂണ്ടിക്കാട്ടി. ഡോ. വന്ദനയ്ക്കു മതിയായ ചികിത്സ നൽകിയില്ലെന്നും അതിനുള്ള സൗകര്യം താലൂക്ക് ആശുപത്രിയിൽ ഇല്ലായിരുന്നു എന്നും സഹപ്രവർത്തകർ.
ഡോ. വന്ദനയുടെ ചിതയടങ്ങി. മുട്ടുചിറയിലെ വീട്ടിലത്തി ബാഷ്പാഞ്ജലി അർപ്പിച്ച് എല്ലാവരും മടങ്ങി. ആ വീട്ടിലിപ്പോൾ ഡോ. വന്ദനയുടെ മാതാപിതാക്കൾ മാത്രമാണുള്ളത്. അവരെ എന്തു പറഞ്ഞ് സമാധാനിപ്പിക്കും? അവർക്ക് ആരാണിനി സുരക്ഷ ഒരുക്കുക. ആ വീടിന്റെ ആകെ പ്രതീക്ഷയായിരുന്നു വന്ദന. പ്രതി സന്ദീപ് മദ്യലഹരി മൂലമുള്ള അബോധാവസ്ഥയിലായിരുന്നു എന്നാണ് കേരളം മുഴുവൻ പ്രചരിക്കുന്നത്. അതു പ്രതിക്കു നീതിപീഠത്തിനു മുന്നിൽ ഇളവ് ലഭിക്കാനുള്ള സാധ്യത ഒരുക്കും. കൃത്യം നടത്തുമ്പോൾ അയാൾ പൂർണ ആരോ​ഗ്യവാനായിരുന്നു. കുത്താനുപയോ​ഗിച്ച പ്രത്യേകതരം കത്രിക, അയാൾ സൂക്ഷിച്ചും കൃത്യതയോടെയുമാണ് ഉപയോ​ഗിച്ചത്. കൃത്യം നടത്തിയ ശേഷം അതു വൃത്തിയാക്കി രഹസ്യമായി ഒളിപ്പിക്കാനും ശ്രമിച്ചു. ഇയാളെ തടയാനോ പിന്തിരിപ്പിക്കാനോ പൊലീസ് അടക്കം ആരുമുണ്ടായിരുന്നില്ല. അവരും സ്വയം രക്ഷയ്ക്കായി പിന്തിരിയുകയായിരുന്നു. ജസ്റ്റിസ് ദേവൻ രാമചന്ദ്രൻ ചോദിച്ചതു പോലെ ഇവരുടെ കൈയിൽ ഒരു ലാത്തിപോലുമില്ലായിരുന്നു. ഒരു പൊലീസുകാരൻ നൂറു പേരെ ഇടിച്ചു വീഴ്ത്തുന്ന സിനിമ സ്റ്റൈൽ പ്രതിരോധം വേണമെന്നു ഞങ്ങൾ ആവശ്യപ്പടുന്നില്ല. പക്ഷേ, അക്രമാസക്തനായ ഒരാളെ ചികിത്സയ്ക്ക കൊണ്ടുവരുമ്പോൾ ഡോകറ്ററുടെ ജീവൻ സംരക്ഷിക്കാനുള്ള തയാറെടുപ്പുകൾ കൂടി വേണം. കുറഞ്ഞപക്ഷം പ്രതിയെ വിലങ്ങ് വയ്ക്കണമായിരുന്നു എന്നും ഡോക്റ്റർമാർ പറഞ്ഞു.
ഡോ. വന്ദനയു‌ടെ കൊലപാതകത്തിന് പൊതു സമൂഹവും നമ്മുടെ ഭരണ- നിയമ വ്യവസ്ഥയുമൊക്കെ ഉത്തരവാദികളാണ്. അതു തിരുത്താനുള്ള ഉത്തരവാദിത്വമാണ് പൊതുസമൂഹം ഏറ്റെടുക്കേണ്ടത്. കഴിഞ്ഞ രണ്ടു ദിവസം മാധ്യമങ്ങളിൽ വന്ദന നിറഞ്ഞു നിന്നു. അതിനു തൊട്ടു മുൻപ് താനൂരിൽ ബോട്ട് മുങ്ങിയതായിരുന്നു വാർത്ത. വന്ദന കൊല്ലപ്പെട്ടപ്പോൾ ബോട്ടപകടം മുങ്ങിപ്പോയി. ശനിയാഴ്ച ഒരു തെരഞ്ഞെടുപ്പ് ഫലം വരാനിരിക്കുന്നു. അതോടെ ഡോ. വന്ദനെയും വിസ്മൃതിയിലാവും. അങ്ങനെ മറക്കപ്പെടേണ്ട ആളോ സംഭവമോ അല്ല വന്ദനയെന്നും ഡോക്റ്റർമാർ പറഞ്ഞു.
അക്രമം ചെറുക്കാനുള്ള അനുഭവ സമ്പത്ത് വന്ദനയ്ക്കില്ലായിരുന്നു എന്ന തരത്തിൽ ആരോ​ഗ്യ മന്ത്രി നടത്തിയ പ്രസ്താവനയും യുവ ഡോക്റ്റർമാർ ഖണ്ഡിച്ചു. രോ​ഗം വരുന്നവരെയും അവശത അനുഭവിക്കുന്നവരെയും പരിചരിക്കാനുള്ള പരിശീലനമാണ് തങ്ങൾക്ക് ലഭിക്കുന്നത്. അല്ലാതെ കരാട്ടെയും കുംഭുവുമല്ല. മറ്റുള്ളവരുടെ ജീവൻ രക്ഷിക്കാനാണ് ഞങ്ങൾ ശ്രമിക്കുന്നത്. അതിനിടെ തങ്ങളുടെ ജീവനെടുക്കുമെന്ന് കരുതി പ്രതിരോധ സംവിധാനങ്ങൾ സ്വീരിക്കാനാവില്ല. പൊതു സമൂഹമാണ് ഡോക്റ്റർമാരുടെ സുരക്ഷ ഉറപ്പ് വരുത്തേണ്ട്. അതിനു പറ്റിയ ശക്തമായ നിയമ സംരക്ഷണം വേണം. ഇവിടെ അതുണ്ടായില്ല.
വിചാരണ പൂർത്തിയാകുന്നതു വരെ ജയിലിൽ സുരക്ഷിതമായി താമസിച്ച് മെച്ചപ്പെട്ട ഭക്ഷണം കഴിച്ചു കൊഴുത്തു തടിക്കാനുള്ള സാഹചര്യം പ്രതിക്കു ലഭിക്കരുത്. എത്രയും വേ​ഗം വിചാരണ പൂർത്തിയാക്കി പരമാവധി ശിക്ഷ ഉറപ്പാക്കണം. ഇനിയൊരു വന്ദനയ്ക്കും ഈ ​ഗതി വരില്ലെന്ന് എല്ലാവരെയും ബോധ്യപ്പെടുത്തുന്ന നിയമനടപടികളും ശിക്ഷയും ഉറപ്പാക്കമെന്നും ഡോക്റ്റർമാർ ആവശ്യപ്പെട്ടു.