കോഴിക്കോട്: സംസ്ഥാന സെക്രട്ടറി എം.വി ഗോവിന്ദന്‍ ഏറ്റുപിടിച്ച് അപഹാസ്യനായ സാഹചര്യത്തില്‍ ‘ദേശാഭിമാനി’യില്‍ പ്രസിദ്ധീകരിച്ച വ്യാജ വാര്‍ത്തയെ കുറിച്ച് പാര്‍ട്ടിയുടെ ആഭ്യന്തര അന്വേഷണം. ദേശാഭിമാനി ജനറല്‍ മാനേജര്‍ കെ.ജെ തോമസ്, ചീഫ് എഡിറ്റര്‍ പുത്തലത്ത് ദിനേശന്‍ എന്നിവരോട് സിപിഎം നേതൃത്വം റിപ്പോര്‍ട്ട് തേടി. തുടര്‍ന്നാണ് വാര്‍ത്ത റിപ്പോര്‍ട്ട് ചെയ്ത ലേഖകന്റെ ‘സോഴ്‌സ്’് ഉള്‍പ്പെടെ അന്വേഷിക്കുന്നത്. ‘വിശ്വാസ്യതയുള്ള വാര്‍ത്ത’ എന്ന നിലയില്‍ കെ.സുധാകരനെതിരെ ഒന്നാം പേജില്‍ വാര്‍ത്ത വിന്യസിച്ചതോടെയാണ് എം.വി ഗോവിന്ദന്‍ അതേറ്റുപിടിച്ചതും കുഴിയില്‍ച്ചാടിയതും. സാധാരണ നിലയില്‍ ദേശാഭിമാനിയില്‍ പ്രസിദ്ധീകരിക്കുന്ന വാര്‍ത്തകളിന്മേല്‍ സിപിഎം നേതൃത്വം വിശദീകരണം തേടാറില്ല. എന്നാല്‍ ഞായറാഴ്ച പ്രസിദ്ധീകരിച്ച വാര്‍ത്തയില്‍ നിയമപരമായ കുരുക്കുണ്ടെന്നാണ് പാര്‍ട്ടി വിലയിരുത്തല്‍. മജിസ്‌ട്രേറ്റിന് മുമ്പാകെ സിആര്‍പിസി വകുപ്പ് 164 പ്രകാരം അതിജീവിത നല്‍കിയ രഹസ്യമൊഴി എങ്ങനെ പാര്‍ട്ടി പത്രത്തിന് കിട്ടി എന്നതുള്‍പ്പെടെ ഗൗരവമായ നിയമപ്രശ്‌നങ്ങള്‍ക്കും സിപിഎം മറുപടി പറയേണ്ടി വരികയാണ്. രഹസ്യമൊഴി ചോര്‍ത്തിക്കൊടുക്കുന്നതും കുറ്റമാണ്. ഇരയുടെ സ്വകാര്യതയെ ബാധിക്കുന്ന പേരോ സൂചനകളോ പരസ്യപ്പെടുത്തരുതെന്ന സുപ്രീംകോടതി വിധി നിലനില്‍ക്കുകയാണ്.

പാര്‍ട്ടി പത്രത്തില്‍ വന്ന കാര്യമാണ് താന്‍ പറഞ്ഞതെന്ന് വിശദീകരിച്ച് എം.വി ഗോവിന്ദന് ഒരുപരിധി വരെ കൈകഴുകാന്‍ സാധിച്ചേക്കും. എന്നാല്‍ നല്‍കിയ വാര്‍ത്ത വ്യാജമാണെന്ന് ദേശാഭിമാനിക്ക് തുറന്ന് സമ്മതിക്കേണ്ടിവരും. കാരണം, ക്രിമിനല്‍ നടപടിച്ചട്ടത്തിലെ വകുപ്പ് 319 പ്രകാരം പീഡിപ്പിക്കപ്പെടുന്നയാളെ രക്ഷിക്കാനുള്ള നിയമപരമായ ബാധ്യത അവിടെയുള്ളയാള്‍ക്കുണ്ടെന്നിരിക്കെ, ദേശാഭിമാനി പറയുന്നതു പോലെ കെ.സുധാകരന്‍ അവിടെ ഉണ്ടായിരുന്നെങ്കില്‍ കേസില്‍ പ്രതിചേര്‍ക്കപ്പെടേണ്ടതാണ്. പിണറായി വിജയന് കീഴിലെ അന്വേഷണം സംഘം എന്തുകൊണ്ട് അത് ചെയ്തില്ലെന്ന ചോദ്യം വരുമ്പോള്‍ ക്രൈംബ്രാഞ്ചും പ്രതിക്കൂട്ടിലാവും. അത് ഒഴിവാക്കാന്‍ ദേശാഭിമാനി വാര്‍ത്തയെ സര്‍ക്കാറിനും തള്ളിപ്പറയേണ്ടി വരും. അപകടം മണത്ത ക്രൈംബ്രാഞ്ച് നേരത്തെ തന്നെ വാര്‍ത്ത നിഷേധിച്ചിരുന്നു. ചുരുക്കത്തില്‍, സര്‍ക്കാറിനെയും പാര്‍ട്ടി സെക്രട്ടറിയെയും കുഴക്കിയ വാര്‍ത്ത വ്യാജനായിരുന്നുവെന്ന് ദേശാഭിമാനിക്കും സമ്മതിക്കേണ്ടി വരും. നിയമപ്രശ്‌നം അവിടംകൊണ്ടും തീരുന്നില്ല. എം.വി ഗോവിന്ദനെതിരെ കെ.സുധാകരന്‍ മാനനഷ്ടക്കേസും ഗൂഢാലോചന കേസും ഫയല്‍ ചെയ്യാനുള്ള സാധ്യതയാണ് സിപിഎം ഭയക്കുന്നത്. ഇത്തരത്തില്‍ ഒരു വാര്‍ത്ത പടച്ചുണ്ടാക്കിയതിന് പിന്നില്‍ മുഖ്യമന്ത്രിയുടെ ഓഫിസിലെ രണ്ട് പ്രമുഖരുടെ പങ്കും സംശയിക്കുന്നുണ്ട്. അതിലൊരാള്‍ ദേശാഭിമാനിയില്‍ ഉന്നത പദവി വഹിച്ചയാളും മറ്റൊരാള്‍ കണ്ണൂരില്‍ നിന്നുള്ള പ്രമുഖനുമാണ്. വ്യാജ വാര്‍ത്തകള്‍ക്കെതിരെ എഡിറ്റോറിയലെഴുതി മഷിയുണങ്ങും മുമ്പ് വ്യാജ വാര്‍ത്ത നല്‍കി നാണംകെടേണ്ടി വന്നതില്‍ ദേശാഭിമാനിയിലും ഭിന്നത ശക്തമാണ്.

Advertisement

inner ad