തിരുവനന്തപുരം: ഭീഷണിപ്പെടുത്തിയും ആരോപണങ്ങൾ ഉന്നയിച്ചും കേസെടുത്തും കോൺഗ്രസിനെ നിശബ്ദമാക്കാമെന്ന് കരുതിയെങ്കിലത് വ്യാമോഹമാണെന്നും പിണറായി സർക്കാരിന്റെ അഴിമതിക്കും ജനദ്രോഹഭരണത്തിനും എതിരായ കോൺഗ്രസിന്റെ പോരാട്ടം തുടരുമെന്നും കെപിസിസി പ്രസിഡന്റ് കെ.സുധാകരൻ എംപി.

മാത്യു കുഴൽനാടനെതിരെ സിപിഎം ഉന്നയിച്ച ആരോപണത്തിൽ കോൺഗ്രസിന് ഭയമില്ല. ഏത് അന്വേഷണത്തേയും നേരിടാൻ കോൺഗ്രസ് തയ്യാറാണ്. മടിയിൽ കനമില്ലെന്ന മുഖ്യമന്ത്രിയുടെ വാചക കസർത്ത് പോലെ വെറും വാക്കല്ല കോൺഗ്രസിന്റേത്. മാത്യു കുഴൽ നാടനെതിരായ ആരോപണത്തെ കോൺഗ്രസ് രാഷ്ട്രീയമായി നേരിടും. അധികാരം പൊതുസമ്പത്ത് കൊള്ളയടിക്കാൻ മാത്രം വിനിയോഗിക്കുന്ന സിപിഎമ്മിന്റെയും മുഖ്യമന്ത്രിയുടെയും ശൈലിയല്ല കോൺഗ്രസിന്.

Advertisement

inner ad

മുഖ്യമന്ത്രിക്കെതിരെയും അദ്ദേഹത്തിന്റെ സ്വജനപക്ഷ നിലപാടുകളെയും നിയമസഭയ്ക്ക് അകത്തും പുറത്തും ശക്തമായി തുറന്ന് കാട്ടിയ വ്യക്തിയാണ് മാത്യു. നിയമസഭയിൽ ചാട്ടുളിപോലുള്ള ചോദ്യങ്ങൾക്ക് മുന്നിൽ പതറിപ്പോയ മുഖ്യമന്ത്രി മാത്യുവിനെതിരെ ആക്രോശിച്ചത് നാം കണ്ടതാണ്. പ്രതികാരബുദ്ധിയാണ് സിപിഎമ്മിനെയും മുഖ്യമന്ത്രിയേയും നയിക്കുന്നത്. അതിന്റെ ഭാഗമാണ് കോൺഗ്രസ് നേതാക്കൾക്കെതിരെയും യുഡിഎഫ് ജനപ്രതിനിധികൾക്കും എതിരെ സിപിഎം ഉന്നയിക്കുന്ന ആരോപണങ്ങൾ. മുഖ്യമന്ത്രിയുടെ കുടുംബവുമായി ബന്ധപ്പെട്ട സാമ്പത്തിക ക്രമക്കേടുകളിലെ നഗ്നമായ സത്യങ്ങൾ ഭയരഹിതനായി ഉറക്കെ വിളിച്ച് പറഞ്ഞതിന്റെ പേരിൽ മാത്യു കുഴൽ നാടനെ വേട്ടയാടാമെന്ന് സിപിഎം കരുതണ്ട. സിപിഎം ഉന്നയിച്ച ആരോപണങ്ങൾക്ക് മാധ്യമങ്ങളെ നേരിൽ കണ്ട് മാത്യു കുഴൽ നാടൻ മറുപടി പറഞ്ഞിട്ടുണ്ട്. ഇതേ രീതിയിൽ മറുപടി പറയാൻ മുഖ്യമന്ത്രിയോ കുടുംബമോ തയ്യാറാകുമോ?.മുഖ്യമന്ത്രിയുടെ കുടുംബത്തിന് എതിരെ തുടർച്ചയായി ഉയരുന്ന ആരോപണങ്ങളിൽ നിന്ന് ശ്രദ്ധതിരിക്കാനുള്ള സിപിഎം തന്ത്രത്തിന്റെ ഭാഗമാണ് കോൺഗ്രസ് നേതാക്കൾക്കെതിരായ ആരോപണങ്ങൾ.

രാഷ്ട്രീയ പ്രതിയോഗികളെ അരിഞ്ഞ വീഴ്ത്താൻ എന്ത് ഹീനമാർഗവും സ്വീകരിക്കുക സിപിഎമ്മിന്റെ ശൈലിയും പാരമ്പര്യവുമാണ്. യൂത്ത് കോൺഗ്രസിന്റെ ചുണകുട്ടികളായിരുന്ന ഷുഹൈബിനെയും ശരത്‌ലാലിനെയും കൃപേഷിനേയും പാർട്ടി വിട്ടതിന്റെ പേരിൽ ടി.പി.ചന്ദ്രശേഖരനെയും മൃഗീയമായി വെട്ടി കൊലപ്പെടുത്തിയവരാണ് സിപിഎമ്മുകാർ. മുൻ മുഖ്യമന്ത്രി ഉമ്മൻചാണ്ടിയെ ഇല്ലാത്ത ആരോപണങ്ങളുടെ പേരിൽ ക്രൂശിച്ചതും വ്യക്തിഹത്യ നടത്തിയതും ആക്രമിച്ചതും ചെയ്തതും കേരളം മറന്നിട്ടില്ല.

Advertisement

inner ad

തന്റേടവും ആർജ്ജവും ധാർമിക മൂല്യവും ഉണ്ടെങ്കിൽ മുഖ്യമന്ത്രിക്കും അദ്ദേഹത്തിന്റെ കുടുംബത്തിനും സിപിഎം നേതാക്കൾക്കും എതിരെ ഉയർന്ന ആരോപണങ്ങളിൽ നിഷ്പക്ഷമായ അന്വേഷണം നടത്തണം. കുടുംബത്തിനെതിരെ ഉയരുന്ന ആരോപണങ്ങളിൽ അഗ്നിശുദ്ധി വരുത്തേണ്ട ധാർമിക ഉത്തരവാദിത്തം മുഖ്യമന്ത്രിക്കുണ്ട്. അതല്ലാതെ ന്യായീകരണത്തൊഴിലാളികളെ വച്ച് കവചം തീർക്കാൻ ശ്രമിക്കുന്നത് പരിഹാസ്യമാണെന്നും സുധാകരൻ പറഞ്ഞു.

Advertisement

inner ad