​* ഗോപിനാഥ് മഠത്തിൽ

അഴിമതിയുടെ ചാറ്റൽമഴ നനഞ്ഞുനിൽക്കുകയാണ് കേരളസർക്കാരും അതിനുനേതൃത്വം നൽകുന്ന മുഖ്യമന്ത്രിയും. അദ്ദേഹം ആ മഴ നനഞ്ഞുനിൽക്കുന്നതല്ലാതെ സ്വയം പ്രതിരോധത്തിൻറെ മാർഗ്ഗമായി കുട ചൂടുന്നില്ലെന്നതാണ് ഏറെ കൗതുകകരം. എന്നാൽ പ്രതിരോധ പ്രതികരണമായി മൗനത്തെ കുടയാക്കുന്ന വ്യത്യസ്ത ശൈലി സ്വീകരിക്കുന്നുമുണ്ട്. അത് മുമ്പും മുഖ്യമന്ത്രി സ്വീകരിച്ച ഒരു രീതി തന്നെ. അഴിമതി മഴയായി തനിക്കുമേൽ വർഷിക്കുമ്പോൾ തികഞ്ഞ നിശബ്ദത പാലിക്കുകയും ആ മഴയുടെ തിമിർപ്പ് കുറയുമ്പോൾ പ്രത്യേകം പാകപ്പെടുത്തിയ വാക്കുകളിലൂടെ പ്രതിരോധത്തിൻറെ ഇരുമ്പുകവചം അണിയാനുള്ള ശ്രമം. ഇപ്പോഴത്തെ നിർമ്മിതൻറെ ക്യാമറകളുമായി ബന്ധപ്പെട്ടുള്ള വിഷയത്തിൽ മാത്രമല്ല മുഖ്യമന്ത്രി ഇങ്ങനൊരു നയം സ്വീകരിച്ചത്. സ്വപ്നാസുരേഷ് മുമ്പ് തൻറെ കുടുംബത്തിന് നേരെ നടത്തിയ ആരോപണങ്ങൾക്കെതിരെയും പ്രതികരിച്ചത് മൗനത്തിലൂടെയായിരുന്നു. ഈ മൗനം കണ്ട് മനസ്സുമടുത്തിട്ടാണ് ഒടുവിൽ പാട്ടി സെക്രട്ടറി എം.വി. ഗോവിന്ദൻ സ്വപ്നയ്ക്കെതിരെ മുരടനക്കിയത്. അന്നങ്ങനെ നനയുന്ന മുഖ്യമന്ത്രിക്ക് ഗോവിന്ദൻമാഷ് കുടപിടിക്കാനെത്തിയതും ഒരു വിവാദമായിരുന്നു. ഇപ്പോൾ ഏ.ഐ. (ആർട്ടിഫിഷൻ ഇൻറലിജൻസ്) ക്യാമറാവിവാദത്തിൽ ആകെ നനഞ്ഞ് വശംകെട്ടിരിക്കുന്ന മുഖ്യമന്ത്രിക്ക് കുടയുമായത് സിപിഎം കേന്ദ്രകമ്മിറ്റിയംഗം എ.കെ. ബാലനും മന്ത്രി പി.രാജീവുമാണ്. അവർക്കുമാത്രമേ മുഖ്യമന്ത്രിയുടെ അപാരമായ മൗനത്തിൽ ഉൽക്കണ്ഠയും അഴിമതിയിൽ കുളിച്ചുനിന്ന് കിടുങ്ങുന്നതിൽ കരുണയും തോന്നിയുള്ളൂ. പലവിഷയങ്ങളിലും മുഖ്യമന്ത്രിയെ ന്യായീകരിക്കുകയും പ്രതിരോധവാക്ശരങ്ങൾ എയ്യുകയും ചെയ്തിട്ടുള്ള ബാലൻ മുഖ്യമന്ത്രിയുടെ രക്ഷകനായി എത്തിയതിൽ അത്ഭുതപ്പെടാനില്ല. വിജിലൻസ് അന്വേഷണം നടക്കുന്ന ഏഐ ക്യാമറ വിഷയത്തിൽ വീണ്ടും വീണ്ടും മുഖ്യമന്ത്രി മറുപടി പറയണമെന്നുവച്ചാൽ അതിന് മനസ്സില്ലെന്നാണ് എ.കെ. ബാലൻ മുഖ്യമന്ത്രിക്ക് വേണ്ടിപറഞ്ഞത്. എവിടെയും നിർമ്മിതബുദ്ധികളുടെ കടന്നുകയറ്റമാണ് സർവനാശനത്തിനും കാരണം. അത് ക്യാമറയിൽ മാത്രമല്ല ഏതുകാര്യത്തിലും അങ്ങനെ തന്നെയാണ്. പാർട്ടിക്കാര്യത്തിലും അങ്ങനെയാവാനേ തരമുള്ളൂ. അത്തരത്തിൽ ഒരു നിർമ്മിതബുദ്ധിയുടെ പ്രഭവ കേന്ദ്രമാണ് എ.കെ.ബാലൻ. ഏത് അപകടാവസ്ഥയിലും മുഖ്യമന്ത്രിയെയും പാർട്ടിയെയും നിർമ്മിതബുദ്ധി പ്രസ്താവനയിലൂടെ കേൾവിക്കാരിൽ ആശയക്കുഴപ്പം സൃഷ്ടിക്കുകയും അതിലൂടെ പാർട്ടിക്കും മുഖ്യമന്ത്രിക്കും അൽപ്പം ആശ്വാസം നൽകുകയും ചെയ്യുക എന്നതാണ് നടപ്പുരീതി. പലരീതിയിലും വമ്പിച്ച അഴിമതി ഏ.ഐ ക്യാമറാ ഇടപാടിൽ നടന്നിട്ടുണ്ടെന്നതിന് വ്യക്തമായ തെളിവുകളുമായി അച്ചടി-ദൃശ്യമാധ്യമങ്ങൾ രംഗത്തുനിലകൊള്ളുമ്പോഴാണ് മുഖ്യമന്ത്രി തികഞ്ഞ നിസംഗത പുലർത്തുന്നതും ആ നിസംഗതയേയും മൗനത്തെയും വെള്ളപൂശിക്കൊണ്ട് ബാലൻറെയും രാജീവിൻറെയുമൊക്കെ പ്രസ്ഥാവനകൾ പുറത്തുവന്നതും. സിപിഎമ്മിൽ ആക്രമണത്തെ ചെറുക്കാൻ പലതരത്തിൽ ആളുകൾ പ്രവൃത്തി എടുക്കുന്നുണ്ട്. കായികമായി നേരിടേണ്ടവരെ അങ്ങനെ എതിരിടാൻ ഒരുവിഭാഗത്തെ വളർത്തുന്നതുപോലെ തന്നെ ബൗദ്ധികമായി നേരിടേണ്ടവരെ നിർമ്മിതബുദ്ധി പ്രഹരത്തിലൂടെ കീഴ്പ്പെടുത്താൻ ശ്രമിക്കുന്നവരും ആ പാർട്ടിയിലുണ്ട്. മുമ്പ് എസ്.രാമചന്ദ്രൻപിള്ളയും എം.എം.ബേബിയുമൊക്കെയായിരുന്നു വക്താക്കളെങ്കിൽ ഇപ്പോൾ ആ സ്ഥാനം പ്രധാനമായും കൈയാളുന്നത് എ.കെ. ബാലനാണ്. എത്ര പ്രതിരോധ വാക്കുകൾ മുഖ്യമന്ത്രിക്കുവേണ്ടി അദ്ദേഹം നിരത്തിയാലും അനന്തമായ വിവാദ സാഗരത്തിലൂടെ പ്രതികൂല കാലാവസ്ഥയ്ക്കെതിരെ തോണി തുഴയുന്ന മുഖ്യമന്ത്രിയെ രക്ഷിക്കാൻ അത് പര്യാപ്തമാണോ എന്ന് ചിന്തിക്കണം. വെറുതെ ബാലിശമായ പ്രസ്താവനകൾകൊണ്ട് മുഖ്യമന്ത്രിക്ക് പ്രതിരോധത്തിൻറെ ഇരുമ്പുകൂട് തീർക്കുകയാണ് അവരുടെ ശ്രമം. ഏ.ഐ ക്യാമറ ഉൾപ്പെടെയുള്ള പല വിഷയങ്ങളിലും രാഷ്ട്രീയകേരളം ഉന്നയിച്ചിട്ടുള്ള സത്യസന്ധമായ ചോദ്യങ്ങൾക്ക് വ്യക്തമായ ഉത്തരം നൽകാൻ കഴിയുന്നുമില്ല. ഒരുതരം പരിഹാസവും ഗർവ്വും നിറഞ്ഞ സംഭാഷണങ്ങൾ കൊണ്ട് വസ്തുതകൾക്കുനേരെ മുറംകൊണ്ട് മറപിടിക്കാനുള്ള ശ്രമം മാത്രമാണിത്. മന്ത്രി രാജീവ് ഈ സർക്കാരിൻറെയും വിവാദത്തിൻറെയും ഭാഗമാണ്. അതുകൊണ്ട് അദ്ദേഹത്തിനും ഏ.ഐ ക്യാമറാ ഇടപാടുകളെ ന്യായീകരിക്കുക അല്ലാതെ മറ്റു മാർഗ്ഗമില്ല.
നിർമ്മിത ബുദ്ധിയും നിർബന്ധബുദ്ധിയും ഇഴപാകിയ സംഭാഷണം കൊണ്ട് രാജാവ് നഗ്നനല്ല എന്ന് വരുത്തിത്തീർക്കാനുള്ള ശ്രമം അദ്ദേഹത്തിൻറെ ഭാഗത്തുനിന്നും ഉണ്ടായി. ഏ.ഐ ക്യാമറാ പദ്ധതിയിൽ ഉപ കരാർ എടുത്ത കമ്പനിയുമായി മുഖ്യമന്ത്രിയുടെ ബന്ധുവിന് ബന്ധമുണ്ടെന്ന് പറഞ്ഞ് ആരോപണമുന്നയിക്കുന്നതിൻറെ അടിസ്ഥാനം എന്താണെന്നാണ് അദ്ദേഹത്തിന് മനസ്സിലാകാത്തത്. നേരം വെളുക്കുമ്പോൾ മുതൽ വൈകുന്നേരം വരെ പ്രതിപക്ഷനേതാവ് വി.ഡി. സതീശനും രമേശ് ചെന്നിത്തലയും കൈരളി ഒഴിച്ചുള്ള സകലമാന ചാനലുകളും ഇത്രമാത്രം അഴിമതിയെപ്പറ്റിയുള്ള അടിസ്ഥാന വിവരങ്ങൾ നൽകിയിട്ടും മന്ത്രി രാജീവന് അത് മനസ്സിലായില്ലെങ്കിൽ അത് താങ്കൾ ആ മന്ത്രിസഭയുടെ ഭാഗമായതുകൊണ്ട് മാത്രമാണ്. താങ്കൾ വസ്തുതകൾക്കുനേരെ പാർട്ടി-സർക്കാർ ലക്ഷ്യങ്ങൾക്ക് അനുകൂലമായി ഉറക്കം നടിച്ചിരിക്കുമ്പോൾ ആരെകൊണ്ടാണ് ഉണർത്താനാവുക. കൊമ്പുവിളിച്ചാലും കുഴലുവിളിച്ചാലും ദേഹത്ത് ചാടിക്കിടന്ന് നൃത്തം ചവിട്ടിയാലും ഉണരാത്ത ഏകപക്ഷീയമായ ഈ അന്ധമായ ഉറക്കം എത്രനാൾ തുടരുമെന്ന് ആർക്കറിയാം?

Advertisement

inner ad

വാൽക്കഷണം:
കേരളത്തെ പ്രബുദ്ധമാക്കിയതിൽ ചലച്ചിത്രശാഖയ്ക്ക് വലിയ പങ്കുണ്ട്. അടൂർ ഗോപാലകൃഷ്ണൻ, അരവിന്ദൻ, പി.എ.ബക്കർ, എം.പി.സുകുമാരൻനായർ തുടങ്ങിയവരുടെ ചിത്രങ്ങൾ അതിൽ പ്രധാന പങ്കുവഹിക്കുന്നു. ഇപ്പോൾ ദ കേരള സ്റ്റോറി എന്ന ചിത്രം കേരളത്തിലെ മുസ്ലീം ജനവിഭാഗങ്ങളെ നൊമ്പരപ്പെടുത്തി പ്രദർശിപ്പിക്കാൻ സുപ്രീംകോടതി അനുമതി നൽകിയിരിക്കുന്നു. കേരളത്തിലെ മുസ്ലീങ്ങൾക്കിടയിൽ ഐ.എസ് തീവ്രവാദത്തിൻറെ അനുകൂല ചായ്വുണ്ടെന്ന് വരുത്തിത്തീർക്കുന്ന ഈ ചിത്രം ബിജെപി നിർബന്ധബുദ്ധിയുടെ ഉൽപ്പന്നമാണ്. 90 ലക്ഷം മുസ്ലീങ്ങൾ ഉള്ള സംസ്ഥാനത്ത് കേവലം മൂന്നുപേർ പോയാൽ അവരെല്ലാം തീവ്രവാദികളാണെന്ന് പ്രചരിപ്പിക്കുന്ന ആശയമാണ് ആ സിനിമയുടേത്. കേരളത്തിൻറെ മതനിരപേക്ഷത തകർക്കുന്ന ഈ ആസൂത്രിത അജണ്ട അടുത്തവർഷത്തെ തിരഞ്ഞെടുപ്പിനെ മുൻനിർത്തിയുള്ള കലക്കവെള്ളത്തിലെ മീൻപിടിക്കൽ തന്നെയാണ്.

Advertisement

inner ad