പാലക്കാട്: ഓടിക്കൊണ്ടിരുന്ന വന്ദേഭാരത് എക്‌സ്പ്രസ് വഴിയില്‍ കുടുങ്ങി. ഷൊര്‍ണൂര്‍ റെയില്‍വേ സ്റ്റേഷന് സമീപമാണ് തിരുവനന്തപുരത്തേക്കുള്ള വന്ദേഭാരത് എക്‌സ്പ്രസ് കുടുങ്ങിയത്. വൈകീട്ട് ആറ് മണിയോടെയായിരുന്നു ഓടിക്കൊണ്ടിരിക്കുന്ന ട്രെയിന്‍ പെട്ടെന്ന് നിന്നത്. സാങ്കേതിക തകറാണെന്നാണ് ഔദ്യോഗിക വിശദീകരണം.
ഏകദേശം 45 മിനുറ്റിലേറെ ഇവിടെ കുടുങ്ങിയതായാണ് വിവരം. തകാരാര്‍ പരിഹരിക്കാനുള്ള ശ്രമങ്ങള്‍ തുടര്‍ന്ന് വരുകയാണെന്നാണ് റെയില്‍വേ അറിയിച്ചിട്ടുള്ളത്. രാത്രി ഷൊര്‍ണൂര്‍ റെയില്‍വേ സ്റ്റേഷനില്‍ വണ്ടി എത്തിച്ച് തകരാര്‍ പരിഹരിക്കുമെന്നാണ് ഔദ്യോഗികമായി അറിയിച്ചിരിക്കുന്നത്. വഴിയില്‍ ട്രെയിന്‍ കുടുങ്ങിയതോടെ വാതില്‍ തുറക്കാനാവാതെ യാത്രക്കാര്‍ കുടുങ്ങി. എയര്‍കണ്ടീഷനും പണിമുടക്കിയിരിക്കുകയാണ്. ഷൊര്‍ണൂര്‍ സ്റ്റേഷന്‍ വിട്ടയുടനെയായിരുന്നു ട്രെയിന്‍ വേഗത കുറഞ്ഞ് നിശ്ചലമായത്. രാത്രി 10.30ന് തിരുവനന്തപുരത്ത് എത്തേണ്ട ട്രെയിന്‍ എട്ട് മണി അടുക്കുമ്പോഴും ഇവിടെനിന്ന് പുറപ്പെട്ടിട്ടില്ല.

തിരുവനന്തപുരം: പാലക്കാട് എംഎൽഎയായി തെരഞ്ഞെടുക്കപ്പെട്ട ശേഷം, തെരഞ്ഞെടുപ്പ് പ്രചാരണ വേളയിൽ ഏറ്റവും അധികം ഉയർത്തിക്കാട്ടിയ നെൽ കർഷകരുടെ പ്രശ്നങ്ങളുമായി ബന്ധപ്പെട്ട് രാഹുൽ മാങ്കൂട്ടത്തിൽ എംഎൽഎ മുഖ്യമന്ത്രി പിണറായി വിജയന് നിവേദനം നൽകി. സത്യപ്രതിജ്ഞ ചടങ്ങിന് ശേഷമാണ് മുഖ്യമന്ത്രിയെ സന്ദർശിച്ച് രാഹുൽ നിവേദനം നൽകിയത്. നെല്ലിന്റെ സംഭരണവുമായി ബന്ധപ്പെട്ട് കർഷകർ വലിയ ദുരിതത്തിൽ ആണെന്നും താങ്ങുവില വർദ്ധിപ്പിക്കണമെന്നും എംഎൽഎ നിവേദനത്തിൽ ആവശ്യപ്പെടുന്നു. തെരഞ്ഞെടുപ്പ് പ്രചാരണ വേളയിൽ മന്ത്രിമാരും എൽഡിഎഫ് എംഎൽഎമാരും നെൽ കർഷകർ ഒട്ടേറെ വാഗ്ദാനങ്ങൾ നൽകിയെന്നും അത് നടപ്പാക്കുന്നതിന് വേണ്ടിയുള്ള ശ്രമങ്ങൾ ഉണ്ടാകണമെന്നും രാഹുൽ ചൂണ്ടിക്കാട്ടി. നെല്ലിന് കിലോയ്ക്ക് 31 രൂപ എങ്കിലും നൽകി കർഷകരിൽ നിന്നും നെല്ല് സംഭരിക്കണം, സംഭരിച്ച നെല്ലിന്റെ വില ഉടൻതന്നെ കർഷകരുടെ അക്കൗണ്ടിലേക്ക് നൽകണം, കുടിശ്ശികയായിട്ടുള്ള ആനുകൂല്യങ്ങൾ ഉടൻ കൈമാറണം, സംഭരണം കുറ്റമറ്റ രീതിയിൽ നടപ്പാക്കാൻ കൃത്യമായ സംവിധാനം ഉണ്ടാകണം, സംഭരണത്തിൽ ഇടനിലക്കാരെ ഒഴിവാക്കണം, രാസവള വില വർധന ഉൾപ്പെടെയുള്ള വിഷയങ്ങളിൽ ഇടപെടൽ ഉറപ്പുവരുത്തണം തുടങ്ങിയ ആവശ്യങ്ങളും നിവേദനത്തിൽ ഉണ്ട്.

പാലക്കാട്‌: രാഹുൽ മാങ്കൂട്ടത്തിൽ നിയമസഭാംഗമായി നാളെ സത്യപ്രതിജ്ഞ ചെയ്യും. തിരുവനന്തപുരം ശങ്കരനാരായണൻ തമ്പി മെമ്പേഴ്സ് ഹാളിൽ ബുധനാഴ്ച ഉച്ചയ്ക്ക് 12ന് ആണ് പാലക്കാടിന്റെ ജനപ്രതിനിധിയായി സത്യപ്രതിജ്ഞ ചെയ്യുന്നത്.