• നിരീക്ഷകന്‍
  ഗോപിനാഥ് മഠത്തില്‍

ക്യാമറകള്‍ കള്ളം കണ്ടുപിടിക്കാന്‍ സ്ഥാപിക്കുന്ന ആധുനിക സംവിധാനമാണ്. നാടൊട്ടുക്ക് നടക്കുന്ന കുറ്റകൃത്യങ്ങള്‍ തെളിയിക്കാന്‍ പോലീസിനെ തെരുവുകളിലും ഇതര സ്ഥാപനങ്ങളിലും സ്ഥാപിച്ചിട്ടുള്ള ക്യാമറകള്‍ പ്രവര്‍ത്തനനിരതമാവുകയാണ്. ഇതിന്‍റെ പിന്നിലെ കള്ളക്കളികള്‍ ഒരിക്കല്‍ക്കൂടി ഓര്‍മ്മിപ്പിക്കുകയാണ്. ഇപ്പോള്‍ കേരള രാഷ്ട്രീയത്തില്‍ വിവാദമായിരിക്കുന്നത് ട്രാഫിക് നിയമലംഘനങ്ങളും മറ്റു കള്ളത്തരങ്ങളും കണ്ടുപിടിക്കാന്‍ നിര്‍മ്മിത ബുദ്ധി ക്യാമറ സ്ഥാപിക്കാനുള്ള കരാറില്‍ അടിമുടി ദുരൂഹതയും വന്‍വെട്ടിപ്പും നടന്നിരിക്കുന്നുവെന്നാണ്. ഒരര്‍ത്ഥത്തില്‍ പറഞ്ഞാല്‍ കള്ളത്തരത്തിന്‍റെ ചെറിയ ഞാഞ്ഞൂലുകളെ ഭീകര കള്ളത്തരത്തിന്‍റെ പെരുമ്പാമ്പ് വിഴുങ്ങിയിരിക്കുന്നു. ഈ കള്ളത്തരം കണ്ടുപിടിക്കാന്‍ ക്യാമറയില്ലാത്തതാണ് കേരളഭരണകൂടത്തിന് രക്ഷയായിരിക്കുന്നത്. പക്ഷേ, ജനമനസ്സെന്നത് നിര്‍മ്മിതബുദ്ധിക്യാമറകളെ വെല്ലുന്ന നിരീക്ഷണബോധമുള്ള ക്യാമറകളാണെന്ന് ആരും മനസ്സിലാക്കുന്നില്ല. ആ ക്യാമറ ഈ സംഭവം മാത്രമല്ല ഇതുപോലുള്ള മറ്റനേകം സംഭവങ്ങളും ശേഖരിച്ചുവച്ചിട്ടുണ്ട്. വേലി തന്നെ വിളവു തിന്നുന്ന അപൂര്‍വ്വവും കൗതുകകരവുമായ ക്യാമറാ ദുരൂഹതയ്ക്കുപിന്നില്‍ കെല്‍ട്രോണിന് മുഖ്യപങ്കാണുള്ളത്. 235.25 കോടിക്ക് പദ്ധതി നടപ്പാക്കാന്‍ കെല്‍ട്രോണിനാണ് സര്‍ക്കാര്‍ കരാറു നല്‍കിയത്. എന്നാല്‍, കെല്‍ട്രോണ്‍ ഈ കരാര്‍ മറിച്ചു നല്‍കിയപ്പോള്‍ 82.87 കോടിരൂപയ്ക്ക് മുഴുവന്‍ കാര്യങ്ങളും ചെയ്യാനുള്ള ചുമതലയാണ് രണ്ടുസ്വകാര്യകമ്പനികള്‍ ഏറ്റെടുത്തത്. എ.ഐ ക്യാമറ സ്ഥാപിക്കുന്നതില്‍ സര്‍ക്കാര്‍ കളിച്ച തിരിമറിയുടെ ആഴം അറിയണമെങ്കില്‍ കുറഞ്ഞ തുകയില്‍ നിന്ന് കൂടിയ തുകയിലേയ്ക്ക് എത്തുന്ന കോടികളുടെ ദൂരം അളന്നാല്‍ മതി. ഇതിനിടയിലെ നഷ്ടപ്പെട്ട കോടികള്‍ ആരുടെ പോക്കറ്റിനെ സംരക്ഷിക്കുകയും ഘനമുള്ളതാക്കിയെന്നും ഇതിന്‍റെ ഭാഗമായി അന്വേഷിക്കണം. നിര്‍മ്മിതബുദ്ധി ക്യാമറയ്ക്കുമാത്രം 4 ലക്ഷത്തോളം രൂപ വില വരുമെന്നാണ് കെല്‍ട്രോണ്‍ പറഞ്ഞത്. എന്നാല്‍ അതു സംബന്ധിച്ച രേഖകള്‍ വ്യക്തമാക്കുന്നത് ക്യാമറ വാങ്ങിയിരിക്കുന്നത് ഒരുലക്ഷത്തി ഇരുപത്തിമൂവായിരത്തില്‍പ്പരം രൂപയ്ക്കാണെന്നാണ്. ഇങ്ങനെ ഒരു കള്ളത്തരം ചമയ്ക്കാന്‍ കെല്‍ട്രോണിനെ ആരാണ് സഹായിക്കുന്നത്. മന്ത്രി രാജീവ് ഇതുസംബന്ധിച്ച് പല ലൊട്ടുലൊടുക്ക് ന്യായങ്ങള്‍ വിളമ്പുന്നെങ്കിലും രേഖീയമായി ഈ സത്യാവസ്ഥയെ അത് സ്പര്‍ശിക്കുന്നില്ല. പ്രതിപക്ഷ നേതാവ് സൂചിപ്പിച്ചതുപോലെ ഇത് ലാവലിനുമായി ബന്ധപ്പെട്ട അഴിമതിക്ക് തുല്യമായ രണ്ടാമത്തെ കേസ്സായി മാറിയിരിക്കുന്നു.
കേരളാഗവണ്‍മന്‍റ് തൊടുന്ന ഏതുകരാറുകളും പ്രത്യക്ഷത്തില്‍ അഴിമതിയില്‍ സംഗമിക്കുകയും പരോക്ഷമായി സര്‍ക്കാര്‍ പ്രതിനിധികള്‍ക്ക് പൊന്നു കൊയ്യുന്ന വിളഭൂമിയാകുകയും ചെയ്യുന്ന സ്ഥിതിയാണ് എന്നുള്ളത്. മുമ്പ് കോവിഡ് കാലത്ത് ആദ്യ പിണറായി സര്‍ക്കാര്‍ ഏര്‍പ്പെട്ട സ്പ്രിംഗ്ലര്‍ ഉള്‍പ്പെടെയുള്ള വിവാദകരാറുകളുടെ കാലം മുതല്‍ അവസാനത്തെ എ.ഐ. ക്യാമറ ഇടപാടുവരെ സാക്ഷ്യപ്പെടുത്തുന്നത് ഇടതുപക്ഷ സര്‍ക്കാരിന്‍റെ സ്വാര്‍ത്ഥ മോഹ ചിന്താപദ്ധതിയുടെ സാധൂകരണം മാത്രമാണ്. ആരെപ്പറ്റിച്ചും പത്തുപുത്തന്‍ പോക്കറ്റില്‍ വീഴണമെന്ന ശ്രദ്ധയോടെയാണ് പിണറായി സര്‍ക്കാരിന്‍റെ ഓരോ ചുവടുവയ്പ്പും. ഇപ്പോള്‍ കേള്‍ക്കുന്ന വാര്‍ത്ത തന്നെ നിര്‍മ്മിതബുദ്ധി ക്യാമറ സ്ഥാപിക്കുന്ന പദ്ധതിയില്‍ കരാറിലുടനീളം നടന്നത് ആസൂത്രിത അട്ടിമറിയാണെന്നാണ് എസ്ആര്‍ഐടി എന്ന കമ്പനിയെ ടെന്‍ഡര്‍ വ്യവസ്ഥപാലിക്കാന്‍ രണ്ട് ടെക്നോളജി കമ്പനികള്‍ പിന്നില്‍ നിന്ന് കളിച്ചുവെന്നാണ് പുറത്തുവരുന്ന വിവരം. ഈ കമ്പനികളെക്കുറിച്ചുള്ള ഒരുവിവരവും കരാറില്‍ ഒരിടത്തും രേഖപ്പെടുത്തിയിട്ടില്ല. മറഞ്ഞുനിന്ന് പിന്തുണച്ച ആ കമ്പനികളും അതിലെ ഒരു ഡയറക്ടറുമാണ് ഈ ക്യാമറ കച്ചവടത്തില്‍ അതിഗംഭീരമായ കളി സര്‍ക്കാരിന് വേണ്ടി കളിച്ചതെന്നാണ് അറിയുന്നത്. പദ്ധതി നടത്തിപ്പിനുള്ള കമ്പനികളെ കണ്ടെത്താന്‍ കെല്‍ട്രോണ്‍ വിളിച്ച ടെന്‍ഡറില്‍ പങ്കെടുക്കേണ്ടത് സാങ്കേതികമായും സാമ്പത്തികമായും യോഗ്യതയുള്ള യഥാര്‍ത്ഥ ഉപകരണസ്രഷ്ടാക്കള്‍ക്കും അംഗീകൃത വിതരണക്കാര്‍ക്കും മാത്രമേ അര്‍ഹതയുണ്ടായിരുന്നുള്ളൂ. എന്നാല്‍ കരാര്‍ ഏറ്റെടുത്ത എസ്ആര്‍ഐടിക്കാകട്ടെ ഇതുസംബന്ധിച്ച വ്യവസ്ഥകള്‍ പാലിക്കാന്‍ കഴിഞ്ഞില്ല. ഈ ഘട്ടത്തിലാണ് പ്രസ്തുത കമ്പനിയെ സഹായിക്കാന്‍ രണ്ടുകമ്പനികള്‍ എത്തുന്നത്. എഐ ക്യാമറാ സിസ്റ്റം, ട്രാഫിക് എന്‍ഫോഴ്സ്മെന്‍റ് ഉപകരണങ്ങള്‍ എന്നിവയെല്ലാം നിര്‍മ്മിക്കുന്ന സ്ഥാപനമാണ് തങ്ങളെന്നും അവയുടെ അംഗീകൃതവിതരണക്കാരാണ് എസ്ആര്‍ഐടി എന്ന് വിശ്വസിപ്പിച്ചുമാണ് ഇവര്‍ കെല്‍ട്രോണിനെ വിദഗ്ധമായി പറ്റിച്ചത്. ഏതായാലും ഓര്‍ക്കേണ്ടത് ഒരുകാര്യം മാത്രമാണ് സുതാര്യമായും നേര്‍വഴിയെ സഞ്ചരിക്കേണ്ടതുമായ ഒരു കരാര്‍ ഏതൊക്കെ വഴിയെ സഞ്ചരിച്ചാണ് നൂലാമാലകള്‍ സൃഷ്ടിച്ചതെന്നും അതില്‍നിന്ന് പണം അടിച്ചുമാറ്റാന്‍ ശ്രമിച്ചതെന്നുമാണ്. വളരെ ലളിതമായി നടക്കുന്ന കരാറുകളിലൊന്നിലും അഴിമതി നടക്കാന്‍ സാധ്യത കുറവാണ്. അങ്ങനെയുള്ള അവസരങ്ങളെ കുരുക്കില്‍പ്പെടുത്തി, ജനങ്ങളുടെ സാമാന്യബുദ്ധിക്കപ്പുറം സങ്കീര്‍ണ്ണമാക്കി നേട്ടം കൊയ്യാനിറങ്ങുന്ന സര്‍ക്കാര്‍ കമ്പനിയും അതിന് നേതൃത്വം കൊടുക്കുന്ന സര്‍ക്കാരുമാണ് ഇവിടെ പ്രച്ഛന്നവേഷം കെട്ടി നല്ലവരാകാന്‍ ശ്രമിക്കുന്നത്. അവരെ തിരിച്ചറിയേണ്ടത് കാലത്തിന്‍റെ ആവശ്യമാണ്. ഇന്ന് അധികാരത്തിന്‍റെ ആനപ്പുറത്തിരിക്കുന്നവര്‍ നാളെ യാഥാര്‍ത്ഥ്യത്തിന്‍റെ മണ്ണിലിറങ്ങുമ്പോള്‍ ജനം അവരെ ഒറ്റപ്പെടുത്തുമെന്നത് തീര്‍ച്ചയാണ്. അതിനായി കാത്തിരിക്കാം.
വാല്‍ക്കഷണം:
ലൈംഗിക അതിക്രമത്തിന് വിധേയരായ ഗുസ്തി വനിതാതാരങ്ങള്‍ നീതിക്കുവേണ്ടി നടത്തുന്ന സമരത്തെ അധികാരികള അടിച്ചമര്‍ത്തുകയാണ്. സ്ത്രീകളെ പോലീസ് മര്‍ദ്ദിക്കുകയും വലിച്ചിഴയ്ക്കുകയും ചെയ്തിരിക്കുന്നു. മെഡല്‍ നേടി നാടിന്‍റെ അഭിമാനം സംരക്ഷിച്ച ഇവരോടുള്ള ക്രൂരത പൊറുക്കാന്‍ കഴിയാത്തതാണ്.