തിരുവനന്തപുരം: മുന്‍ മുഖ്യമന്ത്രി ലീഡര്‍ കെ. കരുണാകരന്‍റെ  സ്മരണയ്ക്കായി തലസ്ഥാനത്തൊരുങ്ങുന്ന ബഹുനില സ്മാരക മന്ദിരത്തിന്‍റെ നിർമ്മാണ പ്രവർത്തനങ്ങൾക്ക് തുടക്കമായി. നന്ദാവനം എ ആർ ക്യാമ്പിന് സമീപം നിർമ്മിക്കുന്ന മന്ദിരത്തിന്‍റെ നിർമ്മാണോദ്ഘാടനം എ ഐ സി സി ജനറൽ സെക്രട്ടറി കെ സി വേണുഗോപാൽ നിർവ്വഹിച്ചു. 13 നിലകളിലായി ഒരു ലക്ഷം ചതുരശ്ര അടിയിലാണ് കോൺഗ്രസ് പ്രവർത്തകരുടെ ചിരകാല സ്വപ്നമായ കരുണാകരൻ സെൻറർ ഉയരുന്നത്.  ഉമ്മൻചാണ്ടി സർക്കാർ അനുവദിച്ച 37 സെന്‍റ്  സ്ഥലത്താണ് കെ കരുണാകരൻ ഫൗണ്ടേഷന്‍ ലീഡർക്കുള്ള സ്മാരകം ഒരുക്കുന്നത്. പ്രൗഢഗംഭീരമായ ചടങ്ങിൽ എഐസിസി ജനറൽ സെക്രട്ടറി കെ സി വേണുഗോപാൽ സ്മാരക മന്ദിരത്തിന്‍റെ നിർമ്മാണ പ്രവർത്തനങ്ങൾ ഉദ്ഘാടനം ചെയ്തു.

കേരളത്തിന്‍റെ  അടിസ്ഥാന വികസനത്തിന് നെടുംതൂണായി നിന്ന മുഖ്യമന്ത്രിയും കരുത്തിന്‍റെ  പ്രതീകമായി ഐക്യ ജനാധിപത്യ മുന്നണിയെ മാറ്റിയ നേതാവുമായിരുന്നു കെ കരുണാകരൻ എന്ന് ചടങ്ങിൽ അധ്യക്ഷത കെപിസിസി പ്രസിഡന്‍റ്  കെ സുധാകരൻ എംപി പറഞ്ഞു.പഠനഗവേഷണ കേന്ദ്രം, ലീഡര്‍ഷിപ്പ് ട്രെയിനിംഗ് ഇന്‍സ്റ്റിറ്റ്യൂട്ട്, റഫറന്‍സ് ലൈബ്രറി, ചിത്രരചനാ കേന്ദ്രം, കാരുണ്യ ഹെല്‍പ് ഡെസ്‌ക്, ഓഡിറ്റോറിയം, കോണ്‍ഫറന്‍സ് ഹാള്‍ തുടങ്ങിയവയാണ് സ്മാരക മന്ദിരത്തിൽ വിഭാവ ചെയ്തിരിക്കുന്നത്. ഇതിന്‍റെ  ത്രിഡി മോഡൽ പത്മജ വേണുഗോപാലിന് നൽകി എ ഐ സി സി ജനറൽ സെക്രട്ടറി താരിഖ് അൻവർ പ്രകാശനം ചെയ്തു.

Advertisement

head

നിര്‍മ്മാണ ധനശേഖരണാര്‍ത്ഥം പുറത്തിറക്കുന്ന കൂപ്പൺ വിതരണം ഡിസിസി പ്രസിഡന്‍റ്  പാലോട് രവിയ്ക്കു നൽകി മുന്‍ പ്രതിപക്ഷ നേതാവ് രമേശ് ചെന്നിത്തല ഉദ്ഘടനം ചെയ്തു. സ്മാര മന്ദിരത്തിന്‍റെ  ലോഗോ യു.ഡി.എഫ് കണ്‍വീനര്‍ എം.എം. ഹസ്സന്‍ പ്രകാശനം ചെയ്തു.
കെ.കരുണാകരന്‍ ഫൗണ്ടേഷന്‍ വൈസ് ചെയര്‍മാന്‍ കെ.മുരളീധരന്‍ എംപി ആമുഖ പ്രഭാഷണം നടത്തി.
18 മാസത്തിനുള്ളിൽ സമയബന്ധിതമായി ലീഡർ സ്മാരകം യാഥാർഥ്യമാക്കുവാനാണ് ലക്ഷ്യമിട്ടിരിക്കുന്നത്. കെപിസിസി ഭാരവാഹികളും നേതാക്കളും നൂറുകണക്കിന് പ്രവർത്തകരും ചടങ്ങിൽ പങ്കെടുത്തു. പരിപാടിയുടെ ഭാഗമായി ലീഡറുടെ അപൂർവ്വ ചിത്രങ്ങളുടെ പ്രദർശനവും ഒരുക്കിയിരുന്നു

Advertisement

head

കൊല്ലം:  കാലാതിവര്‍ത്തിയായ കവിതകള്‍ എഴുതിയ കവി അയ്യപ്പന്റെ യഥാര്‍ത്ഥ
സ്മൃതിപാഠങ്ങളാണ് എസ് സുധീശന്റെ ഓസ്യത്തില്‍ ഇല്ലാത്ത രഹസ്യങ്ങളെന്ന നോവലെന്ന്  എഐസിസി സെക്രട്ടറി  പി സി വിഷ്ണുനാഥ് എംഎല്‍എ അഭിപ്രായപ്പെട്ടു. ഓസ്യത്തില്‍ ഇല്ലാത്ത രഹസ്യങ്ങളുടെ രണ്ടാം പതിപ്പ് പ്രകാശനം നിര്‍വഹിച്ചു സംസാരിക്കുകയായിരുന്നു അദ്ദേഹം. അയ്യപ്പന്റെ കുത്തഴിഞ്ഞതെന്ന്  നമുക്ക് തോന്നുന്ന രാവുകളിലാണ് അദ്ദേഹത്തിന്റെ ഏറ്റവും നല്ല കവിതകള്‍ പിറന്നിട്ടുള്ളത്. ലഹരിയുടെ ഉന്മാദത്തില്‍ ഒപ്പമുള്ളവര്‍ ഉറങ്ങുമ്പോള്‍ അയ്യപ്പന്റെ മനസ്സില്‍ കവിത നൃത്തം ചെയ്യുകയായിരുന്നുവെന്ന്  വിഷ്ണുനാഥ് പറഞ്ഞു. ജി ആര്‍ ഇന്ദുഗോപന്‍ പുസ്തകം ഏറ്റുവാങ്ങി.
അനുകരണീയമല്ല അയ്യപ്പന്റെ ജീവിതമെങ്കിലും അദ്ദേഹം സമൂഹത്തോടും സ്വന്തം ജീവിതത്തോടും നടത്തിയ കലഹം നമ്മെ ഇരുത്തി ചിന്തിപ്പിക്കുന്നമെന്ന് അയ്യപ്പന്‍ സ്മൃതി അവതരിപ്പിച്ച് സംസാരിച്ച മുല്ലക്കര രത്‌നാകരന്‍ അഭിപ്രായപ്പെട്ടു.മുന്‍ ഭാഷാ ഇന്‍സ്റ്റിറ്റ്യൂട്ട് ഡയറക്ടര്‍ ഡോ എം ആര്‍ തമ്പാന്‍ അധ്യക്ഷത വഹിച്ചു. അയ്യപ്പന്‍ കവിതകളില്‍ ഗവേഷണം നടത്തുന്ന ഡോ മുഹമ്മദ് കബീര്‍ പ്രസംഗിച്ചു.
ഹരിതം ബുക്‌സ്  ഉടമ പ്രതാപന്‍ തായാട്ട് സ്വാഗതവും,ഡോ നടക്കല്‍ ശശി കൃതജ്ഞതയും പറഞ്ഞു. വിശ്വന്‍ കുടിക്കോട് അയ്യപ്പന്‍ കവിത ആലപിച്ചു.

Advertisement

head

തിരുവനന്തപുരം: എഴുത്തുകാരൻ എം സുകുമാരന്റെ സ്മരണാർഥം ഏർപ്പെടുത്തിയ സാഹിത്യ പുരസ്‌കാരം സുഭാഷ് ചന്ദ്രന്. സമുദ്രശില എന്ന നോവലിനാണ് പുരസ്‌കാരം. അമ്പതിനായിരം രൂപയും പ്രശസ്തിപത്രവുമടങ്ങുന്നതാണ് അവാർഡ്. പ്രഭാവർമ, ആർ പാർവതിദേവി, പ്രൊഫ. വിഎൻ മുരളി, പ്രമോദ് പയ്യന്നൂർ എന്നിവരടങ്ങിയ ജൂറിയാണ് പുരസ്‌കാരം നിർണയിച്ചത്. സെപ്റ്റംബർ അവസാനം തിരുവനന്തപുരത്ത് വച്ച് അവാർഡ് സമ്മാനിക്കും. ഏജീസ് ഓഫീസിലെ ജീവനക്കാരുടെയും പെൻഷൻകാരുടേയും സംഘടനകളായ ഓഡിറ്റ് ആൻഡ് അക്കൗണ്ട്‌സ് അസോസിയേഷനും ഓഡിറ്റ് ആൻഡ് അക്കൗണ്ട്‌സ് പെൻഷനേഴ്‌സ് അസോസിയേഷനും എം സുകുമാരന്റെ കുടുംബാംഗങ്ങളും ചേർന്ന് രൂപീകരിച്ച എം സുകുമാരൻ ഫൗണ്ടേഷൻ ട്രസ്റ്റാണ് പുരസ്‌കാരം ഏർപ്പെടുത്തിയത്.