| പിണറായിയുടെ ഹര്ജി തള്ളി |
|
കൊച്ചി: എസ്.എന്.സി ലാവലിന് കേസില് മുന് മുഖ്യമന്ത്രി എ.കെ ആന്റണിയെ സാക്ഷിയാക്കണമെന്നാവശ്യപ്പെട്ട് ഏഴാം പ്രതി സി.പി.എം സംസ്ഥാന സെക്രട്ടറി പിണറായി വിജയന് സമര്പ്പിച്ച ഹര്ജി സി.ബി.ഐ പ്രത്യേക കോടതി തള്ളി. കേസ് അന്വേഷണത്തിലും വിചാരണ നടപടികളിലും ഇടപെടാന് കോടതി വിസമ്മതിച്ചു. കേസ് അന്വേഷണം പൊലീസിന്റെയും വിചാരണ പ്രോസിക്യൂഷന്റെയും ഉത്തരവാദിത്വമാണെന്നും ഇത് സ്വതന്ത്രമായിരിക്കണമെന്നും ഈ മേഖലകളില് കോടതി ഇടപെടേണ്ട പ്രത്യേക സാഹചര്യമില്ലെന്നും സി.ബി.ഐ പ്രത്യേക കോടതി ജഡ്ജി കെ.പി ജ്യോതീന്ദ്രനാഥ് വ്യക്തമാക്കി. അന്വേഷണത്തിലും വിചാരണയിലും കോടതി ഇടപെടലുണ്ടായാല് ന്യായാധിപനും അന്വേഷണം നിയന്ത്രിക്കുന്ന ആളും ഒരാള് തന്നെയാകുമെന്നും കോടതി ചൂണ്ടിക്കാട്ടി. ക്രിമിനല് നീതിന്യായ സംവിധാനത്തില് പൊലീസിന് പ്രത്യേക പങ്കുണ്ട്. കേസ് അന്വേഷണം പൊലീസിന്റെ ചുമതലയാണ്. താന് മന്ത്രിയാകുന്നതിനു മുമ്പും സ്ഥാനമൊഴിഞ്ഞതിനു ശേഷവുമുള്ള കാര്യങ്ങളെക്കുറിച്ച് അന്വേഷണം നടത്താന് സി.ബി.ഐക്ക് നിര്ദേശം നല്കണമെന്ന പിണറായി വിജയന്റെ ആവശ്യം അനുവദിക്കാനാവില്ലെന്ന് കോടതി പറഞ്ഞു.
അന്വേഷണത്തിനു മേല്നോട്ടം വഹിക്കണമെന്ന ആവശ്യവും കോടതി തള്ളി. സി.ബി.ഐയുടെ അന്തിമ റിപ്പോര്ട്ടിന്റെ അടിസ്ഥാനത്തില് കോടതി നിര്ദേശാനുസരണമുള്ള തുടരന്വേഷണം പുരോഗമിക്കുകയാണെന്ന് കോടതി പറഞ്ഞു. ഇത് കോടതിയുടെ പ്രത്യേക അധികാരം ഉപയോഗിച്ചുള്ള അന്വേഷണമാണ്. കേസ് അന്വേഷണത്തിനു മേല്നോട്ടം വഹിക്കാനുള്ള അധികാരം ഹൈക്കോടതിക്കും സുപ്രീം കോടതിക്കും മാത്രമാണ് ഉള്ളത്.
അന്വേഷണ ഉദ്യോഗസ്ഥന് കേസ് അന്വേഷണവുമായി മുന്നോട്ടു പോകാവുന്നതാണെന്നും വിധിന്യായത്തിലെ യാതൊരു പരാമര്ശവും ഇക്കാര്യത്തില് പരിഗണിക്കേണ്ടതില്ലെന്നും കോടതി പറഞ്ഞു.
|
എ കെ ആന്റണിയെ സാക്ഷിയാക്കാനുള്ള തന്ത്രം കോടതി തടഞ്ഞു| < മുന് പേജ് | അടുത്തത് > |
|---|
-°C 